Dünya ölkələrində Azərbaycanın Ümummilli Lideri Heydər Əliyevin xatirəsinə həsr olunmuş anım mərasimləri keçirilir

Dünyanın bir sıra ölkələrində məskunlaşmış azərbaycanlılar Azərbaycan xalqının Ümummilli Lideri Heydər Əliyevin xatirəsini ehtiramla yad edir, Ulu Öndərin həyat və fəaliyyətindən bəhs edən konfrans, dəyirmi masa, sərgilər keçirirlər. Diasporla İş üzrə Dövlət Komitəsindən aldığımız məlumata görə, Rusiya Federasiyasının Moskva, Sankt-Peterburq, Yekaterinburq və digər şəhərlərində Ümumrusiya Azərbaycan Konqresi, Heydər Əliyev Fondunun Rusiya nümayəndəliyi və Rusiyanın Azərbaycanlı Gənclər Təşkilatının təşkilatçılığı ilə anım mərasimləri, dəyirmi masa və konfranslar keçirilir.

Ümummilli Lideri Ukrayna, Belarus, Estoniya, Litva, Latviya və Moldovada yaşayan azərbaycanlılar da anırlar. Avropanın ayrı-ayrı ölkələrində, o cümlədən, Almaniya, Fransa, İtaliyada, habelə, Danimarka, İsveç, Niderland krallıqlarında, Polşa, Rumıniya, Macarıstan, Finlandiya, Çexiyada Azərbaycan xalqının Ümummilli Liderinin xatirəsinə həsr olunmuş tədbirlər keçirilir.

ALMANİYA

Almaniyanın Berlin, Drezden, Frankfurt şəhərlərində keçirilmiş anım mərasimi və xatirə gecələrində toplaşanlara Ümummilli Liderin şərəfli həyat yolu, onun Azərbaycan xalqı və dövlət qarşısında misilsiz xidmətlərindən danışılıb, Ulu Öndər haqqında sənədli film nümayiş etdirilib. Almaniyadakı Azərbaycan diaspor təşkilatlarının təşəbbüsü, Azərbaycan Respublikasının bu ölkədəki səfirliyi və Diasporla İş üzrə Dövlət Komitəsinin dəstəyi ilə keçirilən tədbirlərdə azərbaycanlılarla yanaşı, yerli ictimaiyyətin nümayəndələri, türk, yəhudi, rus və digər millətlərin nümayəndələri iştirak ediblər.

ANKARA

Heydər Əliyevin xatirəsinə həsr olunmuş anım mərasimləri Türkiyənin bir sıra şəhərlərində də keçirilir. Ankarada Ümummilli Liderin xatirəsinə həsr olunmuş anım mərasimi keçiriləcəkdir. Anım tədbirində Azərbaycan Respublikası Prezident Administrasiyasının İctimai-siyasi məsələlər şöbəsinin müdiri Əli Həsənov, Diasporla İş üzrə Dövlət Komitəsinin sədri Nazim İbrahimov, Azərbaycan Milli Məclisinin üzvləri iştirak ediblər. Tədbir iştirakçıları Ankaradakı Heydər Əliyev Parkında Ulu Öndərin abidəsi önünə əklil qoyublar.

PARİS

Parisdə Ümummilli Lider Heydər Əliyevin xatirəsinə həsr olunmuş anma mərasimi keçirilmişdir.Tədbirdə iştirak edən Milli Məclisin deputatları, Azərbaycan diasporunun təmsilçiləri və tələbələr əvvəlcə Ulu Öndər Heydər Əliyevin xatirəsini bir dəqiqəlik sükutla yad etmişlər.

Mərasimi giriş sözü ilə açan səfir Elçin Əmirbəyov müasir müstəqil Azərbaycan dövlətinin memarı və qurucusu Ümummilli Lider Heydər Əliyevin ölkəmizin ağır günlərində hakimiyyətə qayıdışından sonra respublikamızda vətəndaş müharibəsinin qarşısının alındığını, onun yürütdüyü uğurlu daxili siyasət nəticəsində xalqla hakimiyyətin daha da yaxınlaşdığını, qısa müddətdə iqtisadi yüksəlişə nail olunduğunu xatırlatmışdır. Bildirilmişdir ki, Heydər Əliyevin apardığı uzaqgörən daxili və xarici siyasət nəticəsində Azərbaycan beynəlxalq arenada nüfuzu artan, güclü ölkəyə çevrilmişdir. Yaxın keçmişimizə nəzər saldıqda, müasir tariximizin hər bir səhifəsində dahi şəxsiyyət, təcrübəli dövlət başçısı, uzaqgörən siyasətçi Heydər Əliyevin silinməz izlərini görürük. Əbədiyyətə qovuşmuş bu Böyük İnsanın əziz xatirəsi daim qəlbimizdə yaşayacaqdır.

Milli Məclisin deputatı Rafael Hüseynov Ümummilli Lider Heydər Əliyevin Azərbaycan tarixindəki əvəzsiz xidmətlərindən söhbət açmışdır. Ulu Öndər Heydər Əliyevin Vətən və xalq qarşısındakı misilsiz xidmətlərini vurğulayaraq qeyd etmişdir ki, Ümummilli Lider dövlətimizin və xalqımızın gələcəkdə də firavan yaşamasının möhkəm təməlini qoymuşdur. Natiq müasir Azərbaycan dövlətinin qurucusu Heydər Əliyevin uzaqgörən siyasətinin Onun layiqli davamçısı Prezident İlham Əliyev tərəfindən uğurla davam etdirildiyini diqqətə çatdırmışdır. Ümummilli Lider Heydər Əliyevin yadigarı olan müasir Azərbaycan, gündən-günə qüvvətlənir, çiçəklənir, gələcəyə qətiyyətlə və inamla addımlayaraq Prezident İlham Əliyevin siyasəti nəticəsində inkişaf dövrünü yaşayır.

Milli Məclisin üzvü Rövşən Rzayev, Üzeyir Hacıbəyli adına Bakı Musiqi Akademiyasının rektoru, xalq artisti, professor Fərhad Bədəlbəyli də çıxışlarında Ulu Öndər Heydər Əliyevin Vətənə və xalqa məhəbbətindən, zəngin dövlətçilik təcrübəsindən, eləcə də, Dahi Şəxsiyyətlə bağlı xatirələrindən söhbət açmışlar.

Anma mərasimində ehsan süfrəsi açılmışdır.

Sonda Qarabağ muğam ustalarının ifasında musiqi proqramı təqdim olunmuşdur.

QAHİRƏ

Azərbaycan Respublikasının Misir Ərəb Respublikasındakı səfirliyində Ümummilli Lider Heydər Əliyevin xatirəsinə həsr olunmuş anma mərasimi keçirilmişdir. Tədbirdə çıxış edən səfir Şahin Abdullayev Ümummilli Lider Heydər Əliyevin şanlı həyat yoluna nəzər salmış və müasir Azərbaycanın uğurlu inkişafının Heydər Əliyevin adı ilə bağlı olduğunu bildirmişdir. Heydər Əliyevin öz həyatını Azərbaycanın çiçəklənməsinə və inkişafına həsr etdiyini diqqətə çatdıran səfir Heydər Əliyev dühasının və irsinin xalqın yaddaşında əbədi olaraq xoş xatirələrlə qalacağını vurğulamışdır.

Ulu Öndər Heydər Əliyevin əziz xatirəsi bir dəqiqəlik sükutla yad edilmişdir. Tədbirdə Misirdə yaşayan Azərbaycan icmasının üzvləri, Qahirə, Ayn-Şəms və Əl-Əzhar universitetlərində təhsil alan azərbaycanlı tələbələr, səfirliyin əməkdaşları və onların ailə üzvləri iştirak etmişlər.

MAQDEBURQ

Almaniyanın Saxsen-Anhalt vilayəti üzrə Alman-Azərbaycan Mədəniyyət Cəmiyyətinin və Almaniyadakı Azərbaycan Diasporunun Mərkəzi Şurasının təşəbbüsü və Azərbaycan Respublikasının Almaniyadakı səfirliyinin, Diasporla İş üzrə Dövlət Komitəsinin və Almaniyadakı Azərbaycanlıların Koordinasiya Mərkəzinin dəstəyi ilə Maqdeburq şəhərində Ümummilli Lider Heydər Əliyevin xatirəsinə həsr olunmuş anım mərasimi keçirilmişdir.

Tədbirdə hər iki təşkilatın üzvləri, eləcə də, digər icmalardan olan cəmiyyət sədrləri iştirak etmişlər. Anım mərasiminin açılışında Alman-Azərbaycan Mədəniyyət Cəmiyyətinin sədri Yaşar Millnits-Niftəliyev Ümummilli Lider Heydər Əliyevin həyat yolundan, Azərbaycanın inkişafı üçün göstərdiyi xidmətlər barədə məruzə ilə çıxış etmişdir. Tədbir iştirakçıları Ulu Öndərin xatirəsini bir dəqiqəlik sükutla yad etmişlər.

NƏZAKƏT

Səs.- 2011.- 13 dekabr.- S. 4.