Hüquqi dövlət və qlobal ekoloji
problemlər
Müasir qlobal problemlərin
meydana gəlməsinin əsas səbəbi cəmiyyət,
insan və təbiət arasındakı ziddiyyətlərdir.
Bu ziddiyyətlərə ekoloji problemləri də aid etmək
olar. Təbiət və cəmiyyətin
qarşılıqlı münasibətləri və bu
münasibətlərin təsiri nəticəsində meydana
çıxan qlobal ekoloji problemlərin səbəblərinin
öyrənilməsi günümüzün ən aktual məsələlərindən
biridir. Son illər dünyada
baş vermiş qlobal ekoloji dəyişikliklər
insanların sağlamlığına və ətraf mühitə
öz mənfi təsirini göstərmişdir. Ekspertlərin
hesablamalarına görə, inkişaf etmiş ölkələrdə
inkişaf etməkdə olan ölkələrə nisbətən
əhali 16 il artıq yaşayır.
İnsanların
sağlamlığına mənfi təsir edən qlobal ekoloji
problemlərin aradan qaldırılması və onların həlli
yollarının öyrənilməsi çox vacibdir. Alimlərin
hesablamalarına görə uzunömürlülüyün
sirri əsasən havanın tərkibində kükürd 4
oksidin aşağı və suyun təmiz olmasıdır.
Bunun üçün ilk növbədə müəssisələrdə
tullantısız texnologiyanın tətbiq olunması, əsasən,
iri yaşayış məntəqələrində şirin
su təchizatının yaxşılaşdırılması,
torpaqların şoranlaşmasının və meşələrin
qırılmasının qarşısının
alınması vacib faktorlardan biridir.
Vaqif Cəliloğlunun
fikrincə, indi heç kim şübhə etmir ki, ekoloji
durum, ətraf mühitin mühafizəsi aktuallığına
görə əsrin ən böyük problemlərindən
biridir. Bəşərin gələcəyini şübhə
altına qoyan bu problem atom bombasının yaratdığı
faciə ilə müqayisə edilə bilər. Artıq
elmi-texniki nailiyyətlərin, yeni texnologiyaların
inkişafı nəticəsində alternativ enerji növlərinin,
materialların, kimyəvi birləşmələrin istifadəsinin
təbiətə müdaxilə etməsi göz
qabağındadır.
Sürətli və hərtərəfli
inkişafın təbiətə təsirinin neqativ tərəfləri
hələ tam öyrənilməsə də, fəqət,
artıq məlumdur ki, təsirli və təcili tədbirlər
görülməsə, nəinki flora və fauna aləminin, hətta
bəşərin özünün yaşaması qeyri-müəyyən
olacaq.
Mövcud kritik vəziyyətin səbəblərindən
biri, şübhəsiz ki, adi insanların, hətta mütəxəssislərin
faciənin miqyasını bilməməsi, biganəlik, adi
ekoloji savadsızlıqdır. Dünya okeanının təbii
prosesləri tənzimləmə rolunu itirməsi, meşə
fondunun azalması, meqapolislərin minlərlə hektar
münbit torpağı udması, on minlərlə zavod, fabrik,
elektrik stansiyaların atmosferə tulladığı zəhərli
maddə və qazların təsiri, bitki və heyvan növlərinin
məhvi problemlərin yalnız bir hissəsidir. Buraya quruda yer
olmadığı üçün zəhərli
tullantıların dəniz və çaylara
axıdılması nəticəsində içməli su
qıtlığı, azon təbəqəsinin zədələnməsi,
qlobal istiləşmə, təmiz hava defisiti və digər
amilləri də əlavə etsək, aydın olur ki, yer
üzündə yaşamağa məhkum olan insan artıq bu
şansdan məhrum olacaq. Bu isə əsrlər boyu təbiətdə
yaranan tarazlığa son qoyulması deməkdir. Artıq
insanın meymundan əmələ gəldiyini iddia edən
Ç.Darvinin “Biz təbiəti dəyişdirəcək və
ondan istədiyimizi alacağıq” arzusu yerinə yetirilməkdədir.
Azərbaycan
Respublikası zəngin təbii
sərvətlərə və inkişaf etmiş sənaye sahələrinə
malik olan bir dövlətdir. Lakin uzun illərdən bəri
yığılıb qalmış ekoloji problemlər
vaxtında öz həllini tapmadığı
üçün respublikamızın ətraf mühiti həddindən
artıq çirkləndirilmişdir. Hazırda
respublikamızda həllini təcili tələb edən bir
sıra ekoloji problemlər vardır: su hövzələrinin,
o cümlədən, Xəzər dənizinin məişət
və sənaye sularının tullantıları ilə
çirkləndirilməsi, Xəzər dənizinin səviyyəsinin
dəyişməsi ilə əlaqədar vurulan ziyanlar, atmosfer havasına zərərli
qazların yol verilən normadan artıq atılması,
biomüxtəlifliyin azalması,
torpaqların eroziyaya uğraması və
şoranlaşması, sənaye və məişət
tullantılarının utilizasiyası və s.
1992-ci ildə Birləşmiş
Millətlər Təşkilatının təşəbbüsü
ilə Rio-de-Janeyro şəhərində keçirilmiş
beynəlxalq konfransda qeyd edildiyi kimi, dünyanın gələcək
inkişafı ilk növbədə ekoloji problemlərin necə
həll olunmasından asılı olacaqdır. Bu konfransda
dünyada mövcud olan ətraf
mühit problemlərinin həlli yolları çox ciddi şəkildə
nəzərdən keçirilmiş və mühüm qərarlar,
o cümlədən, artıq bütün beynəlxalq ekoloji təşkilatların
proqram sənədinə çevrilmiş “Dayanıqlı
inkişaf” konsepsiyası qəbul edilmişdir. Bu
konsepsiyada iqtisadi
inkişafın ekoloji tarazlıqla vəhdət təşkil
etməsi,
üstünlüyün ətraf mühitin qorunmasına
verilməsi, ekoloji problemlərin ilk növbədə həll
olunması, gələcək nəsillərin imkanları məhdudlaşdırılmadan
çağdaş nəsillərin rifahının
yaxşılaşdırılması ön xəttə
çəkilmişdir. Buna nail olmaq üçün ilk
növbədə iqtisadiyyatın
səmərəliliyinin yüksəldilməsi və ətraf
mühitin qorunması təmin
olunmalıdır.
Rio konfransının
davamı kimi 2002-ci ildə Yohannesburq şəhərində
keçirilmiş dünya sammitində dayanıqlı
inkişaf prinsipləri bir daha təsdiqlənərək
onların reallaşdırılması üçün zəruri
tədbirlərin görülməsi xüsusi
vurğulanmışdır.
İndiki dövrdə
ətraf mühitlə bağlı mövcud vəziyyət hər
bir ölkəni ekoloji problemləri ümumbəşəri
kontekstə çıxarmağa məcbur etmişdir. Bu
gün artıq ətraf mühitin mühafizəsi məsələləri
aparıcı beynəlxalq təşkilatların proqram sənədlərində
öz əksini tapmışdır.
Azərbaycan
Respublikası son illər sosial və iqtisadi inkişaf sahələrində
kifayət qədər nailiyyətlər əldə
etmişdir ki, bu da milli və beynəlxalq sənədlərdə
öz əksini tapmışdır. Sosial və iqtisadi sahələrdəki
nailiyyətlərin artmasının dayanıqlı olması
ölkə tərəfindən əsas prioritet qismində qəbul
edilmişdir. Ölkənin ekoloji strategiyası, ətraf
mühitin qorunması sahəsində fəaliyyətin
koordinasiyasının gücləndirilməsi yolu ilə milli,
beynəlxalq və regional səviyyələrdə təbii
ehtiyatların mühafizəsi, elmə əsaslanan inkişaf
prinsiplərinin tətbiqi, indiki və gələcək nəsillərin
maraqlarını təmin edən ölkənin iqtisadi və insan
resurslarının istifadəsində
davamlılığın təminatına yönəlmişdir.
Azərbaycan
Respublikası müstəqillik əldə etdikdən və
bazar iqtisadiyyatı yolunu seçdikdən sonra, ölkəmizdə
ətraf mühitin mühafizəsi sahəsində ekoloji siyasət
yeni vüsət almış və formalaşmağa
başlamışdır. Bu, həm də ekoloji məsələlərin
ümumbəşəri bir problem kimi qəbul edilməsi ilə
də izah edilir.
Respublikamızda bu
dövrdə ekoloji siyasətə dair ilk sənəd kimi
“Dayanıqlı inkişaf” prinsiplərinə əsaslanan “Azərbaycan
Respublikasının ekoloji Konsepsiyası”nı qeyd etmək
olar. Bu konsepsiyada respublikamız üçün ətraf
mühitin mühafizəsi baxımından üstün əhəmiyyətli
olan problemlərin həlli üzrə əsas prinsiplər
öz əksini tapmışdı.
Azərbaycan Respublikasında
yürüdülən ekoloji siyasətin əsas məqsədi
indiki və gələcək nəsillərin
ehtiyaclarının təmin
edilməsi naminə mövcud
ekoloji sistemlərin, iqtisadi potensialın qorunması və təbii
ehtiyatlardan səmərəli istifadə edilməsi ilə
davamlı inkişafın təmin edilməsindən ibarətdir.
Bunu gerçəkləşdirmək məqsədi ilə təbii
ehtiyatlardan istifadə yolları işlənib
hazırlanmalı və iqtisadiyyatın inkişafı
davamlılıq prinsipləri əsasında həyata
keçirilməlidir.
İnkişafın
ekoloji baxımdan davamlı olmasını təmin etmək
üçün iqtisadi fəaliyyət zamanı meydana
çıxan ciddi ekoloji problemləri aradan qaldırmaq,
onların ətraf mühitə mənfi təsirinin minimuma endirilməsi tələb
olunur.
Müasir dövrdə
yaranmış ekoloji durumu və sosial-iqtisadi vəziyyəti nəzərə
alaraq respublikamızın ekoloji siyasətinin
aşağıdakı üç əsas istiqamətlərini müəyyənləşdirmək
olar:
ekoloji təhlükəsizliyin
təmin olunmasını əsas götürərək, ətraf
mühitin çirklənməsinin minimuma endirilməsi və
mühafizəsinin tənzimlənməsi məqsədilə
davamlı inkişaf prinsipləri üzrə mütərəqqi
üsulların tətbiq edilməsi;
indiki və gələcək nəsllərin tələbatını ödəmək
məqsədilə təbii sərvətlərdən səmərəli
istifadə etmək, alternativ, qeyri-ənənəvi metodlar
vasitəsilə tükənməyən enerji mənbələrindən
yararlanmaq və enerji effektivliyinə nail olunması;
qlobal ekoloji problemlər
üzrə milli səviyyədə tələbatların qiymətləndirilməsi,
həlli yollarının müyyənləşdirilməsi,
beynəlxalq təşkilatlarla əlaqələrin genişləndirilməsi,
eləcə də, milli potensial imkanlardan istifadə etməklə
həyata keçirilməsinin təmin edilməsi.
Ekoloji
siyasətin əsas istiqamətləri üzrə
qarşıya qoyulmuş məqsədə çatmaq
üçün aşağıdakı vəzifə və
prinsiplər əsas götürülməlidir.
ətraf mühitin
keyfiyyətinin yaxşılaşdırılması
üçün iqtisadi və insan potensialının idarə
edilməsinin müasir üsullarından istifadə edilməsi;
indiki və gələcək
nəsillərin rifahının
yaxşılaşdırılmasını təmin edən, stimullaşdıran iqtisadi modellərin,
texnologiyaların yaradılması və istifadəsi;
eyni və müxtəlif
nəsillərin nümayəndələri arasında təminatın
ədalətlilik prinsipləri əsasında həyata
keçirilməsi;
insanın həyat fəaliyyətini
təmin edə biləcək ekosistemlərin və biomüxtəlifliyin
təbii mühitinin olduğu kimi
qorunub saxlanılması.
Prinsiplər:
qısamüddətli
və uzunmüddətli iqtisadi, ekoloji və sosial nəticələr
və ehtimal edilən fəsadlar nəzərə
alınmaqla qərarların qəbul
edilmə prosesinin həyata keçirilməsi və bu prosesdə
alternativ variantların nəzərə alınması;
ətraf mühitin
mühafizəsi sahəsində qərarlar hazırlanarkən
ictimai və qeyri-hökumət təşkilatlarının
nümayəndələrinin cəlb edilməsinin genişləndirilməsi;
ətraf mühitin hər
hansı komponentinin bərpa
olunmayan dərəcədə pozulmasına səbəb ola biləcək
fəaliyyətin
qarşısının alınması;
ətraf mühitin
mühafizəsinin təmin edilməsi üçün
aztullantılı, güclü və çoxşaxəli
iqtisadi inkişafın təmin edilməsi;
beynəlxalq təşkilatlar
və inkişaf etmiş ölkələrlə ətraf
mühitin mühafizəsi sahəsində əlaqələrin
genişləndirilməsi;
əhali
arasında ekoloji təbliğatın və maarifləndirmənin
gücləndirilməsi.
Vahid Ömərov,fəsəfə üzrə
fəlsəfə doktoru
Səs.- 2011.- 14 dekabr.- S. 10.