"İordaniya - lyubov moya "kitabının təqdimat mərasimi keçirilib

Tədbirdə kitabın İordaniya-Azərbaycan münasibətlərinin daha da genişləndirilməsinə əvəzsiz töhfə olduğu qeyd olunub

Əmmanda Azərbaycanın İordaniya Haşimilər Krallığındakı səfirinin həyat yoldaşı, Azərbaycan və Rusiya Yazıçılar ittifaqlarının, habelə, Beynəlxalq Rəssamlar Federasiyasının üzvü Elvira Araslının "İordaniya - lyubov moya" ("İordaniya - mənim məhəbbətim") kitabının təqdimat mərasimi keçirilib. Mədəniyyət və Turizm İdarəsindən verilən məlumata görə, İordaniya mədəniyyət nazirinin müavini Cireys Səmavinin himayəsi altında təşkil edilmiş mərasimdə 100-dən çox yerli və xarici qonaq, o cümlədən, C.Səmavi, İordaniya Yazıçılar İttifaqının nümayəndələri, ölkənin dövlət qurumlarının rəsmiləri, İordaniya-Azərbaycan dostluq cəmiyyətinin baş katibi və idarə heyətinin üzvləri, ölkədə akkreditə olunmuş diplomatik nümayəndəliklərin rəhbərləri və yüksək rütbəli əməkdaşları, çeçen və çərkəz icmalarının rəhbərləri, tanınmış iş adamları, elmi dairələrin, yerli ictimaiyyətin və ölkədə yaşayan həmyerlilərimizin təmsilçiləri iştirak ediblər. Səfirliyin mərasim keçirilən zallarında Elvira Araslının əl işləri, o cümlədən, rəsm nümunələri, kollajları, təkəlduz üslubundakı əsərləri, dünyanın müxtəlif dillərinə tərcümə olunmuş 10-dan çox kitabı nümayiş etdirilib. Tədbiri səfirliyin birinci katibi K.Murtuzov açaraq, iştirakçılara təqdimatı keçirilən kitab və onun müəllifi haqqında ətraflı məlumat verib. Müəllif E.Araslı belə bir kitabın yazılması ideyasının yaranma tarixçəsini, əsərin ərsəyə gəlməsi üçün dörd il ərzində İordaniyanı qarış-qarış gəzdiyini, bu ölkənin təbii gözəllikləri, tarixi-mədəni və dini abidələri ilə tanış olduğunu, yaşlı nəsil və bədəvi tayfalarının nümayəndələri ilə görüşərək dost xalq, onun adət-ənənələri haqqında məlumat topladığını diqqətə çatdırıb. O, kitabının adını təsadüfi olaraq "İordaniya - mənim məhəbbətim" qoymadığını, bu adın onun qardaş ölkəyə və onun dost xalqına bəslədiyi səmimi hisslərlə bağlı olduğunu vurğulayıb. Təqdimat mərasimində İordaniya mədəniyyət nazirinin müavini C.Səmavi, Gürcüstanın, Qazaxıstanın və Ukraynanın Əmmandakı səfirləri çıxış edərək, yeni kitab və onun müəllifi haqqında xoş sözlər söyləmiş, bu əsərin digər xarici dillərə də tərcümə edilməsinin zəruriliyini qeyd etmişlər. Bu kitabın İordaniya-Azərbaycan münasibətlərinin daha da genişləndirilməsinə əvəzsiz töhfə olduğu bildirilib. Mərasim ziyafətlə və İordaniyada yaşayan həmyerlimiz İ.İbrahimovanın arfada ifa etdiyi musiqi nömrələri ilə davam edib.

Zümrüd

Səs.- 2011.- 1 fevral.- S. 12.