Ölkəmizdə gənclər siyasəti uğurla həyata keçirilir

Dövlət başçısı tərəfindən gənclərə göstərilən qayğı danılmazdır

Əsası Ümummilli Lider Heydər Əliyev tərəfindən qoyulmuş ölkəmizdə aparılan gənclər siyasəti bu gün də öz müsbət nəticələrini verməkdədir. Ulu Öndər gənc nəslə öz qayğısını əsirgəməmiş, gənclərin ictimai-siyasi həyatda fəal iştirak etməsini, onların sosial ehtiyaclarını, yüksək səviyyədə təhsil almalarını, asudə vaxtlarını səmərəli keçirmələrini, hüquqlarının müdafiəsini, ümumiyyətlə, gənclərin hərtərəfli inkişafını təmin etmişdir. 1993-cü ilin iyununda Ümummilli Liderimiz xalqın təkidi ilə hakimiyyətə qayıtdığı andan etibarən Azərbaycan gəncliyini ölkənin taleyi üçün mühüm işlər görməyə çağırmışdı. Məhz elə 1993-cü ildən etibarən dövlət gənclər siyasəti öz işinə başlamışdır. Dövlət gənclər siyasəti gənclərin cəmiyyətdə layiqli yer tutmasını təmin etmək üçün yaradılmış və uğurla həyata keçirilmişdir.

Gənclərin hərtərəfli inkişafı ölkənin sosial-iqtisadi, elmi inkişafı ilə sıx əlaqədar olmuşdur. Ulu Öndərin hakimiyyətə qayıdışından sonra gənclərlə bağlı həyata keçirilən siyasətin xronoloji ardıcıllığına nəzərə salsaq, görərik ki, ötən illər ərzində istər Ümummilli Lider Heydər Əliyev, istərsə də onun davamçısı olan cənab Prezident İlham Əliyevin rəhbərliyi və birbaşa təşəbbüsü ilə genişmiqyaslı tədbirlər həyata keçirmiş və bir sıra problemlər öz müsbət həllini tapmışdır.

1994-cü ildə Ümummilli Lider Heydər Əliyev Gənclər və İdman Nazirliyinin yaradılması haqqında fərman imzalamışdır. Qısa müddət ərzində Gənclər və İdman Nazirliyi gənc nəslin inkişafı üçün mühüm işlər görmüşdür. 1995-1996-cı illərdə "Şahin", "Marş irəli" hərbi idman oyunları bərpa edilmiş və gənclərin inkişafı naminə iki minə yaxın tədbirlər həyata keçirilmişdir.

1996-cı il fevralın 2-də Azərbaycan Respublikasının Prezidenti Heydər Əliyevin Gənclərin I Forumunun keçirilməsi haqqında Sərəncam imzalaması gənclər siyasətinin həyata keçirilməsi istiqamətində çox mühüm bir addım olmuşdur. Həmin forumda 2000-dək nümayəndə iştirak etmiş və problemlərin həlli istiqamətində tədbirlərin keçirilməsi nəzərdə tutulmuşdu. Forum zamanı Heydər Əliyev öz çıxışında gənclər qarşısında duran əsas məqsədləri də göstərmişdir. O, ölkəmizin ərazi bütövlüyünun təmin edilməsinin Azərbaycan gəncliyinin qarşısında duran mühüm vəzifələrdən biri olduğunu qeyd etmişdir. "Hər bir gənc orduya səfərbər olmağa hazır olmalı və orduda xidmət etməyi özünə şərəf bilməlidir" sözləri artıq hər bir gəncin yaddaşına həkk edilmişdir. Prezident Heydər Əliyev 1997-ci ilin fevralın 1-də forum nümayəndələrini qəbul etmiş və forumun əhəmiyyətini nəzərə alaraq, onun keçirildiyi 2 fevral tarixini "Azərbaycan gəncləri günü" elan etmişdir.

1996-cı il iyun ayının 29-da "Gənclik" Beynəlxalq Turizm Mərkəzində XXVI Yay Olimpiya oyunlarına idmançılarımızı məhz özü yola salması onun gənclərə qarşı səmimi və qayğıkeş münasibətini bir daha göstərdi.

1999-cu il martın 2-3 də II Forumun keçirilməsi isə Ulu Öndərin "Dövlət Gənclər Siyasəti"nin həyata keçirilməsi ilə bağlı Fərmanının imazalanması ilə yadda qalmışdır.

1999-cu ilin fevral ayının 17-də "Gənclərdə vətənpərvərlik və vətəndaşlıq hisslərinin yüksəldilməsi" proqramı, 1999-cu il 29 iyul tarixində Azərbaycan Respublikasının Prezidenti "Dövlət Gənclər Siyasəti haqqında", "Azərbaycan Respublikasında dövlət gənclər siyasətinin həyata keçirilməsi ilə bağlı tədbirlər planı" haqqında fərmanlar Ulu Öndərin öz fəaliyyətində gənclərə verdiyi yüksək diqqət və qiyməti göstərmiş oldu. 1999-cu ildə bir gənc olaraq cənab İlham Əliyevin YAP-ın II qurultayında partiya Sədrinin birinci müavini seçilməsi bütün gənclərin sevincinə səbəb olmuşdur.

2001-ci il sentyabrın 3-də Ümummilli Lider Heydər Əliyev elmə böyük ehtiramını bildirərək "Azərbaycan Respublikasının ali məktəb tələbələri üçün Prezident təqaüdünün təsis edilməsi haqqında" Fərman imzalamışdır. Bu Fərmanın imzalanması ali məktəblərdə təhsil alan gənclərə öz elmi fəaliyyətlərində daha böyük uğurlar əldə etməsi üçün böyük bir stimul mənbəyi olmuşdur. "Gənclər siyasəti haqqında" Azərbaycan Respublikasının Qanununda gənclərin mənəvi-əxlaqi tərbiyəsi və mədəni həyatda iştirakı, istedadlı gənclərə dövlət qayğısı, gənclərin sağlamlığının qorunması və fiziki inkişafı, məşğulluqlarının təmin edilməsi, gənc ailələrə dövlət yardımı kimi proseslər göstərilmişdir. 2003-cü ilin oktyabr ayında Azərbaycan gəncliyi Ümummilli Liderin siyasi xəttini davam etdirən İlham Əliyevi Prezident seçmişdir. Digər sahələrdə olduğu kimi gənclər siyasətinin həyata keçirilməsi sahəsində də Ulu Öndərin siyasətini davam etdirən Prezident İlham Əliyev, öz növbəsində, gənclərə qarşı daim böyük diqqət göstərmiş, onların problemləri ilə maraqlanmış və bu problemlərin aradan qaldırılması üçün müvafiq addımlar atmışdır. 2003-cü il 13 oktyabrda gənclərin III Forumu, 2005-ci ildə isə IV Forumu keçirilmişdir. Gənclərin inkişafı naminə Prezident İlham Əliyev 2005-ci ildə "Azərbaycan Gəncliyi Dövlət Proqramının təsdiq edilməsi haqqında" Sərəncam imzalamışdır.

2007-ci il Prezident İlham Əliyev tərəfindən "Gənclər ili" elan edildi. Bu da gənc nəslə olan diqqəti bir daha nümayiş etdirmiş oldu. 2007-ci il ərzində gənclərin problemlərinin həlli istiqamətində çox mühüm addımlar atılmış, bu sahədə ölkəmizdə, eləcə də, dünyanın müxtəlif yerlərində bir sıra tədbirlər keçirilmişdir ki, bu da dünyada yaşayan azərbaycanlı gənclərin bir mərkəz ətrafında birləşməsinə şərait yaratmışdır.

GÜNEL MƏLİKLİ

Səs.- 2011.- 2 fevral.- S. 2.