İranın Azərbaycanda təxribat yaratmaq planları iflasa uğradı

Azyaşlı qızların məktəbə çadrada gəlməsi tələblərinin dini əsası yoxdur, bu, daha çox siyasi çalarlar daşıyır

Azərbaycanda vicdan və dini etiqad azadlığı tam təmin olunub, hər bir vətəndaşın hüquq və azadlıqları dövlət tərəfindən təmin olunur və qorunur. Lakin yaradılmış əlverişli şəraitdən sui-istifadə edən bir sıra yerli radikal dindarlar xarici dairələrin dəstəyi və təhriki ilə dini sabitliyi pozmaq, ölkəni dinlərarası ziddiyyətlər meydanına çevirmək istəyir, Azərbaycanı sivil, demokratik inkişaf yolundan döndərmək məqsədilə əməli tədbirlər həyata keçirməyə cəhd göstərirlər. Çox təəssüf ki, bu cəhdlər cənub qonşumuz İrandan qaynaqlanır.

Məktəblilərə hicab (çadra) tələbinin heç bir hüquqi, mənəvi əsası yoxdur

Bir müddətdir ki, İrandan verilən tapşırıq əsasında ölkədəki bəzi radikal dini qruplar orta məktəblərdə azyaşlı qızların dərsə çadrada gəlməsi tələbləri ilə gündəmə gəlməyə çalışırlar. Təbii ki, burada məqsəd əslində, xüsusi sifariş əsasında cəmiyyətdə qarşıdurma yaratmaq, iğtişaş törətməkdir.

Çadra (ərəbcə- hicab) məsələsində ölkə ictimaiyyəti, ziyalılar ortaya vətəndaş mövqeyi qoyaraq bəyan etdilər ki, orta məktəblərdə şagirdlərin hicabla dərsə gəlməsi heç bir kriteriyaya sığımır. Azərbaycan dünyəvi və hüquqi dövlətdir, dövlət-vətəndaş münasibətləri buna əsaslanır. Azərbaycanda dövlətin dinə münasibəti dünyəvilik prinsipinə söykənir. Azərbaycan məktəbləri də dünyəvi məktəblərdir. Dünyəvi məktəblərin də prinsipləri ondan ibarətdir ki, dünyəvilik qaydalarını gerçəkləşdirsin. Yəni, məktəblinin məktəb geyimi var və Azərbaycanın təhsil ocaqları dini mədrəsə deyil.

Heç bir valideyn azyaşlı övladının başını bağlayıb məktəbə göndərə bilməz. Bu, heç də dini azadlığı məhdudlaşdırmaq deyil, bu, əslində, həmin uşağın azadlığını əlindən almaqdır. Qoy həmin uşaq böyüsün, həyata özünün baxışları formalaşsın, ondan sonra özü müəyyən etsin ki, hicabdan istifadə etsin, ya yox. Ümumiyyətlə, insanın din seçimi azaddır, bəlkə həmin uşaq yetkinlik yaşına çatdıqda şüurlu şəkildə araşdıracaq və başqa dini seçəcək və ya ateist olacaq? Bu, onun öz təbii və kontitusion hüququdur. Heç bir qüvvənin bu hüququ onun əlindən almaq haqqı yoxdur.

Millət vəkili Siyavuş Novruzovun sözləri ilə desək, əgər dinə xidmət etmək istəyirlərsə, Peyğəmbərin kəlamlarına əməl etsinlər. Həmin kəlamın birində deyilir ki, "Bir gün elmlə məşğul olmaq, qırx il ibadət etməkdən üstündür". Yəni, İranda molla alnını qırx il möhürə döyüncə, bir gün məktəbə, universitetə getsin, orada bir elmlə məşğul olsun.

"Alimin mürəkkəbi, şəhidin qanından üstündür"-deyən islam dini elmə, inkişafa, tərəqqiyə üstünlük verir. Daha demir ki, bir neçə molla hakimiyyəti ələ keçirib xalqı cəhalətdə, savadsızlıqda boğsun. Ona görə də, hesab edirəm ki, biz Peyğəmbərin kəlamlarından və "Qurani-Kərim"dən irəli gələn müddəaları yerinə yetirməliyik, daha hansısa dövlətin mollasının, axundunun dediyini yox...

18 yaşına çatana qədər gənclərin tərbiyəsi üçün dövlət məsuliyyət daşıyır

Konstitusiyamıza görə, Azərbaycanda uşaqlar 18 yaşına çatana qədər onların tərbiyəsi üçün dövlət də məsuliyyət daşıyır. Orta məktəblərdə öz övladının gələcək taleyini istiqamətləndirən valideynlər də bilsinlər ki, gənclərin sabahı üçün təkcə onlar deyil, dövlət də məsuliyyət daşıyır. Dünyəvi dövlətin dünyəvi məktəbinin prinsipini pozmaq, vətəndaşın dövlət qarşısındakı borclarını gerçəkləşdirməməsi deməkdir.

Əgər dövlətin vətəndaş qarşısında məsuliyyəti varsa, vətəndaşın da dövlət qarşısında vəzifələri var. O vəzifələrdən biri də layiqli övlad böyütməkdir. Azərbaycanda uşaqlar 18 yaşına çatana qədər həmin gənclərin tərbiyəsinə dövlət məsuliyyət hissi ilə yanaşır və onların dini, dünyəvi dünyagörüşünün formalaşması üçün əlindən gələni edir. Əgər 18 yaşından sonra gənc dünyəvi təhsil ocaqlarında deyil, dini təhsil ocaqlarında təhsil alacaqsa, onun geyiminə dövlət müdaxilə etmir.

Azərbaycan Konstitusiyasında uşaqların dini hərəkətlərə sövq edilməsi ilə bağlı bənd yoxdur. Azərbaycan sivil ölkədir, hər bir insanın dini azadlığı təmin olunub. Ölkədə mütləq sivil dövlətin əsasları orta məktəbdə ən yüksək səviyyədə təmin edilir. Konstitusiyada insan haqlarının bütün tərəfləri həll olunub. Heç kimin konstitusiyanın bəndlərini dəyişməyə ixtiyarı yoxdur.

Yeni Azərbaycan Partiyası (YAP) İcra katibinin müavini, millət vəkili Siyavuş Novruzov APA-ya müsahibəsində bildirib ki, dünyanın hər yerində orta məktəblərdə, bəzi ölkələrdə isə ali məktəblərdə də məktəbli forması tətbiq edilir. Hətta bəzi ölkələrdə dərsə hicabla getmək istəyənlər üçün ayrıca məktəb təşkil olunub. Ancaq ümumilikdə, dünya ölkələrinin məktəblərində forma tətbiq olunur və bu, bizdə də belədir. Şagird də məktəbə həmin məktəbin müəyyənləşdirdiyi formada getməlidir.

Elçin Bayramlı

Səs.- 2011.- 2 fevral.- S. 10.