Ölkə turizmi dünya standartları səviyyəsinə yüksəlir

Prezident İlham Əliyevin göstərişi ilə 2011-ci ildən etibarən Azərbaycan Turizm İnstitutunda kollec və peşə məktəbləri yaradılır

Son illər ölkəmizdə həyata keçirilən islahatlar iqtisadiyyatın inkişafına, makroiqtisadi göstəricilərin davamlı artımına təkan verir. Bu nailiyyətlərin əldə edilməsində turizm sənayesinin də müəyyən payı var. Azərbaycanda "2010-2014-cü illərdə turizmin inkişafına dair Dövlət Proqramı"nın təsdiq edilməsi haqqında Sərəncam ilk olaraq ölkəmizdə turizm sənayesinin və infrastrukturunun daha da inkişafına və möhkəmləndirilməsinə təkan verməkdədir. Belə ki, dövlət başçısının imzaladığı müvafiq Sərəncam turizm sahəsində dövlət və bələdiyyə orqanlarının əlaqəli fəaliyyətini daha da gücləndirir.

Bununla da turizm sərvətləri, qorunan obyektlər, bu sərvətlərdən istifadə hüquqları müəyyənləşməklə, turizm fəaliyyətinə başlama, turizm sahəsində attestasiya və tanınma, turizm sahəsində əlaqələrin hüquqi tənzimlənməsi üsulları mütərəqqi xarakter alaraq, müasir tələblər əsasında gerçəkləşir. Turizmdə təhlükəsizlik və sığorta işlərinin həyata keçirilməsi də müasir dövrümüzdə yeni xarakter alır. Bu baxımdan da müxtəlif turizm sahələri üzrə infrastrukturun yenilənməsi və yaradılması xarici turistlərin respublikamıza marağını artırır. Bu isə xarici valyutanın ölkəyə axınını gücləndirir.

Görülən kompleks işlərin nəticəsi olaraq ölkəyə gələn turistlərin sayı ilbəil artır və ölkədə fəaliyyət göstərən turizm şirkətləri şəbəkəsi genişlənir. Hazırda respublikada 123 turizm müəssisəsi lisenziya əsasında fəaliyyət göstərir və 2002-ci ilə nisbətən onların sayı 3 dəfədən çox artmışdır.

Bununla yanaşı, turizmin inkişafı və turizm sektorunun ölkə iqtisadiyyatının aparıcı sahələrindən birinə çevrilməsi bu gün Azərbaycanda ən mühüm vəzifə olaraq qarşıda durur. Son illər Azərbaycanda əldə olunmuş sosial-iqtisadi irəliləyiş bu vəzifənin yeni imkanlara adekvat səviyyədə həllinə şərait yaradır. 2011-ci ilin Prezident İlham Əliyev tərəfindən "Turizm ili" elan edilməsi turizmin inkişafına daha da böyük imkanlar açacaqdır. Ölkəmizin turizm potensialının işlək hala gətirilməsi üçün müasir tələblərə cavab verən infrastrukturun qurulması, bu sahənin dünya standartları səviyyəsinə qaldırılması istiqamətində bir sıra mühüm tədbirlər həyata keçirəcək. Artıq bu işlə bağlı tədbirlər planı hazırlanmış və işçi qrupu yaradılmışdır. Bu günə qədər ölkəmizin turizm sahəsində əldə olunan nəticələri daha geniş inkişaf üçün böyük zəmin yaradır. 2011-ci ilin "Turizm ili" elan olunması, yaxın vaxtlarda paytaxtımızda yeni 5 beşulduzlu mehmanxananın açılması, turist marşrutlarının təmir-bərpası, turizmin inkişafına təkan verən infrastrukturun təkmilləşdirilməsi ölkəmizin turizm sənayesi üçün xüsusilə uğurlu olacağını əsaslandıran amillərdir. Təbii ki, ixtisaslı kadrların bu sahədə fəaliyyəti də önəm kəsb edən faktorlardandır. Bu baxımdan Azərbaycan Turizm İnstitutunun fəaliyyəti də diqqətə çəkilməlidir.

Bildiyimiz kimi, Azərbaycan Respublikasının Prezidenti İlham Əliyevin 2005-ci il 25 avqust tarixli Sərəncamına əsasən, Azərbaycan Respublikası Mədəniyyət və Turizm Nazirliyinin nəzdində Azərbaycan Turizm İnstitutunun yaradılması məhz turizm sahəsinin inkişafına yönəlmiş bir addım idi. ATİ-nin yaradılması ilə ölkəmizdə turizm sənayesinin əsas göstəricisi olan kadr potensialının artırılmasına təkan verilmişdir. İnstitut bu sahədə kadr hazırlığını həyata keçirməklə yanaşı, mövcud turizm sənayesi işçilərinin peşə vərdişlərinin təkmilləşdirilməsi üçün qısamüddətli kurslar da təşkil etməkdədir.

İnstitutda təhsil prosesində beynəlxalq təcrübədən geniş istifadə edilir, dünyanın bir sıra tanınmış ali məktəbləri ilə qarşılıqlı əməkdaşlıq həyata keçirilir. İnstitut 6 illik fəaliyyət dövründə turizm təhsili sahəsində bir sıra problemlərin həllinə səy göstərməklə yanaşı, xarici təcrübənin öyrənilməsi, yerli ərazidə turizm potensialının tədqiqi, xidmət səviyyəsinin yüksəldilməsi üçün ikinci təhsilin həyata keçirilməsi və peşəyönümlü qısamüddətli kursların təşkili, bələdçi-tərcüməçilərin hazırlanması, Avropa ölkələrində ATİ-nin diplomunun tanınması üçün istiqamətində bir sıra uğurlara imza atmışdır. Bütün bu uğurlar bir məqsədə doğru yönəlmişdir - ölkəni turizm məkanına çevirmək. Turizmə ayrılan diqqətin davamı olaraq ölkə başçısının göstərişi ilə 2011-ci ildən etibarən Azərbaycan Turizm İnstitutunun nəzdində kollec və peşə məktəbləri, eyni zamanda, müxtəlif ixtisaslar üzrə hazırlıq kursları fəaliyyətə başlayacaq. Artıq yeni ilin ilk ayında ön büro kursları fəaliyyətə başlayıb. 8 nəfərdən ibarət ön büro üzrə birinci qrup formalaşıb və dərslərə başlayıb. Peşə kurslarının bir neçə istiqamətdə keçirilməsi nəzərdə tutulur. Bunlardan birincisi, turoperator və turagent fəaliyyətidir. İkincisi, nömrə və mətbəx, üçüncüsü, qidalanma və kulinariya, dördüncüsü, restoran və bar, beşincisi hotel xidmətləri və ön büro işləridir, altıncısı isə, xüsusilə, Şahdağ kompleksi üçün texniki kadrların hazırlığıdır. Turoperator-turagent və bələdçi kursları üzrə də artıq 10 nəfərlik qrup yaradılıb. Turizm sahəsində ixtisas kurslarının artırılması, peşəkarlığın yüksəldilməsi ölkəmizdə turizmin inkişafı üçün əsas şərtlərdən biri - turizm obyektlərinin, tarixi yerlərin, mədəniyyət abidələrinin gələn turistlərə lazım olan səviyyədə təqdim olunmasına xidmət edir.

Turizm sektorunda yalnız ali təhsilli kadrlarla kifayətlənmək mümkün deyil. Bu sahədə peşəkar vərdişlərə malik olan peşə təhsilli insanlara da böyük ehtiyac var. 2010-cu ildə qəbul olunmuş Dövlət Proqramında ATİ-nin nəzdində Milli Təlim Mərkəzinin yaradılması da nəzərdə tutulur. Burada əsasən orta məktəbin yuxarı sinif şagirdlərinə və ya orta təhsilini başa vurmuş şəxslərə xüsusi dil və peşə hazırlıqları keçməklə kadr hazırlığını həyata keçiriləcək.

NƏZAKƏT

Səs.- 2011.- 3 fevral.- S. 8.