İqtisadi islahatlar aqrar sektorun inkişafını sürətləndirir

Məmməd Musayev: "2010-cu ildə Azərbaycan Sahibkarlığa Kömək Fondu tərəfindən 115 milyon manat güzəştli kreditlər verilib"

Dünən Yeni Azərbaycan Partiyasının mərkəzi qərargahında keçirilən ənənəvi mətbuat konfransında Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının və "Aqrarkredit" Səhmdar Kredit Təşkilatı İdarə Heyətinin sədri Məmməd Musayev ötən ildə əldə olunan nailiyyətlərdən və cari ildə görüləcək işlər barədə məlumat verdi.

M.Musayev Azərbaycanda sahibkarlıq fəaliyyətinə göstərilən diqqətin artırıldığını qeyd edərək, kənd təsərrüfatının, regionların, kiçik və orta sahibkarlığın inkişafından, sahibkarlıq mühitinin yaxşılaşdırılmasından söz açdı. Bildirdi ki, Azərbaycanda biznes mühitinin yaradılması və ixrac potensialının artırılması məsələləri dövlətimizin başçısının ən çox diqqət yetirdiyi məqamlardan biridir. Bu məqsədlə xaricdəki səfirliklərimiz, xarici dövlətlərin və beynəlxalq təşkilatların ölkəmizdə fəaliyyət göstərən diplomatik nümayəndəlikləri ilə geniş iş aparılmalıdır.

Azərbaycanın dünya bazarına ixrac olunan məhsullarına böyük maraq olduğunu qeyd edən M.Musayev ölkədə istehsal edilən məhsulların rəqabət qabiliyyətinin artırılması və dünya miqyasında brendə çevrilməsi üçün iri investisiyaların ayrılmasına ehtiyac olduğunu bildirdi. ASK-nın Azərbaycan hökuməti ilə yaxından əməkdaşlıq etdiyini bildirən M.Musayev vurğuladı ki, məqsəd sahibkarlara keyfiyyətli kredit xidmətinin göstərilməsi, sahibkarlıq fəaliyyətinin yaxşılaşdırılması və biznes mühitinin inkişafını təmin etməkdir. Sahibkarların hüquqi biliklərinin artırılması üçün ASK tərəfindən hüquqi xidmət göstərilir.

Həyata keçirilən dövlət proqramlarının regionların inkişafına təkan verdiyini söyləyən M.Musayev onu da bildirdi ki, "Regionların sosial-iqtisadi inkişafı Dövlət Proqramı (2004-2008-ci illər)" 760 mindən çox yeni iş yeri açılmışdır: "Görülmüş tədbirlərin nəticəsidir ki, ötən ilin yekunları bazar iqtisadiyyatı yolunu seçmiş Azərbaycanda sosial məsələlərin həllini daim diqqət mərkəzində saxlamağa imkan vermişdir. 2010-cu ilin dövlət büdcəsində sosialyönümlü xərclər əhəmiyyətli dərəcədə artmış, yoxsulluğun və işsizliyin aradan qaldırılması istiqamətində əhəmiyyətli nəticələr əldə olunmuşdur".

Sonra konfederasiyanın prezidenti Məmməd Musayev ötən ilin iqtisadi göstəriciləri haqqında məlumat verməklə yanaşı, həm də qarşıda duran vəzifələr barədə açıqlama verdi: "Ötən il ÜDM 5,5, əhalinin pul gəlirləri 12,3 faiz artıb, inflyasiyanın həcmi isə 5,7 faiz olub. O, yoxsulluq səviyyəsinin ilk dəfə birrəqəmliyə düşərək 9,1 faiz təşkil edib".

2010-cu ildə 70 min iş yerinin açıldığını söyləyən ASK prezidenti bunun 53 minin daimi iş yerinin olduğunu vurğuladı. Ölkənin valyuta ehtiyatlarının 29,1 milyard dollar olduğunu ifadə edən M.Musayev 2010-cu ildə Azərbaycan Sahibkarlığa Kömək Fondu tərəfindən 115 milyon manat güzəştli kreditlərin verildiyini söylədi: "İl ərzində 12 min müştəriyə kredit vermişik. 2010-cu ildə Sahibkarlar Konfederasiyası biznes mühitinin yaxşılaşdırılması, sahibkarların inkişafı üçün mühüm işlər görüb. Azərbaycan Sahibkarlar Konfederasiyası müxtəlif nazirliklərlə il ərzində əməkdaşlıq edib. Vergilər Nazirliyi, Maliyyə Nazirliyi, Qiymətli Kağızlar Komitəsi, Neft Fondu və digər qurumlarla əməkdaşlıq edirik. Məqsəd də Azərbaycan sahibkarlarına daha yaxşı biznes mühitinin yaradılması və ölkənin iqtisadi potensialının yüksəldilməsidir. 2010-cu ildə Beynəlxalq İşəgötürənlər Təşkilatında daimi üzvlüyə daxil olmuşuq".

M.Musayev belə bir fikri də söylədi ki, Sahibkarlar Konfederasiyasının 2011-ci ildə bir başqa hədəfi vergi terminallarının yaradılması olacaq: "Vergi terminalları sahibkarlara şərait yaradacaq ki, vergi işçiləri ilə görüşmədən vergiləri ödəsinlər. Artıq 16 rayonda belə bir terminal fəaliyyət göstərir. Bu il ən azı 20 rayonda belə terminallar yaradılacaq".

ASK prezidentinin sözlərinə görə, Konfederasiyanın təkliflərindən biri də fiziki şəxslərin gəlir vergisinə aiddir: "İndi 2 min manatdan yuxarı əmək haqqından vergi 30%-lə tutulur. Biz bu rəqəmin 3 mindən yuxarı qaldırılmasını təklif edirik.

RƏFİQƏ KAMALQIZI

Səs.- 2011.- 5 fevral.- S. 6.