AKADEMİK İSMAYIL HACIYEV - 60

FƏDAKAR ALİM VƏ İCTİMAİ-SİYASİ XADİM

...Oxuduğu mühazirələr həm elmilik baxımından dolğun olduğuna görə, həm özünəməxsus pedaqoji ustalığa söykəndiyindən, həm də ən son elmi yenilikləri ehtiva etdiyindən onun dərslərində auditoriyamız tələbələrlə ağzına qədər dolu olardı. Seminar dərslərimiz o qədər canlı, o qədər maraqlı keçirdi ki, dəqiqələrin bir-biri ilə necə ötüşdüyünün fərqinə varmırdıq. Bizə həmişə elə gəlirdi ki, II kursda öyrəndiyimiz Siyasi tarix, III kursda bizə tədris edilən Azərbaycan tarixi (müasir dövr) fənlərinin mühazirə və seminarları yalnız başlanğıcdan və sondan ibarətdir. Lakin bu başlanğıcla sonun arasındakı biz tələbələrə çox qısa görünən zaman məsafəsinə elə dərin elmi biliklər sığırdı ki, tənəffüslərdə tələbə yoldaşlarımızla bir yerə toplaşaraq, bir tərəfdən mövcud dərsliklərin köhnəlmiş ideoloji konsepsiyaya söykəndiyi, yenilərinin isə hələ ortaya çıxmadığı bir vaxtda milli tariximizə dair əldə etdiyimiz yeni biliklərin yaratdığı məmnunluq hisslərini bölüşür, digər tərəfdən tanıdığımız digər müəllimlərdən özünün zəngin və çox əhatəli mütaliəsi ilə fərqlənən fənn müəlliminin qibtəediləcək operativliklə ən son, bəzən hətta iki-üç gün əvvəl elmi dövriyyəyə daxil edilmiş məlumatları tələbələrə dərhal çatdırmaq məharətinə heyrət etməyə bilmirdik.

Başqa sözlə, tənəffüslərdə də həmin dərslərdə olduğumuzu hiss edirdik, bu qısa "dərslərdə" müəllimimiz şəxsən iştirak etməsə də, onun öyrətdiyi biliklər məsuliyyətli elmi müzakirələrə vadar edirdi. Çünki bu dərslərdə biz öz ixtisasını dərindən bilən, tələbələrinə tədris etdiyi fənni sevə-sevə öyrədən əsil pedaqoqu, tarix elminin sirlərinə yüksək səviyyədə bələd olan, bu, elmin ən son nailiyyətlərini tələbələrlə bölüşən gözəl alimi, eyni zamanda, zəngin milli mənəviyyat mücəssəməsi olan, öz ali əxlaqi və insani keyfiyyətləri ilə tələbələr üçün nümunəyə çevrilən dəyərli bir insanı görürdük...

İllər bir-birini qovdu, tələbəlik həyatımız bitdi. Tale mənə öz əziz müəllimlərimlə eyni kollektivdə - doğma Naxçıvan Dövlət Universitetində birgə, çiyin-çiyinə çalışmaq şərəfini nəsib etdi. Bu, mənim üçün ona görə dəyərli idi ki, əmək fəaliyyətim dövründə də bu gözəl insanlardan bilavasitə yararlanmaq, onlardan öyrənmək imkanı əldə etdim. Heç şübhəsiz ki, son dərəcə böyük məsuliyyətlə yanaşdığım elmi-pedaqoji fəaliyyətimdə mənim üçün artıq çox hörmətli İsmayıl müəllimin şəxsiyyətində təcəssüm edən universitet müəlliminin ən yüksək nümunəsi, etalonu var idi. Başqa sözlə, on ildən artıqdır ki, müəllim kimi universitetin auditoriyalarına daxil olanda hiss etdiyim məsuliyyəti məndə formalaşdıran, tələbələrlə söhbətlərimdə dəfələrlə haqqında söhbət açıb danışmaqdan yorulmadığım müəllimlərimin sırasında birinci yerdə duran, həm də mənim namizədlik dissertasiyası üzərində işlədiyim vaxtlarda elmi rəhbərim olmuş İsmayıl müəllimdir. Bu insan bütün tələbələrin sevimlisinə çevrilən müəllimimiz, bu gün nəinki özünü, hətta dediyi hər bir dərsi unutmadığımız, artıq bütün ölkəmizin elmi-siyasi ictimaiyyətinin tanıdığı AMEA Naxçıvan Bölməsinin sədri, Azərbaycan Respublikası Milli Məclisinin deputatı, Naxçıvan Dövlət Universitetinin professoru, əməkdar elm xadimi, akademik İsmayıl Hacıyevdir.

Akademik İsmayıl Hacıyev 1994-1995-ci tədris ilində bizə siyasi tarix fənnini tədris edərkən, Ulu Öndər Heydər Əliyevin Azərbaycana ilk rəhbərliyi dövründə ölkəmizə bəxş etdiyi kursda dahi ali təhsil ocağı olan Naxçıvan Dövlət Universitetinin tarix ixtisasının ikinci kursunda oxuyurduq. 1967-ci ildən Azərbaycan Dövlət Pedaqoji İnstitutununu filialı kimi fəaliyyətə başlayıb, 1972-ci ildə müstəqil Dövlət Pedaqoji İnstitutuna çevrilən universitetimizdə İ.Hacıyev 1978-ci ildən assistent kimi fəaliyyətə başlamışdı. Bizə tarix elminin ən yeni elmi biliklərini tədris edərkən o, artıq tarix elmləri namizədi (1992), dosent (1995) idi.

Qeyd edək ki, XX əsrin 80-ci illərinin sonu-90-cı illərinin əvvəllərində ölkəni öz girdabına alan anarxiya və başıpozuqluq, bütövlükdə, təhsil sisteminə olduğu kimi, Naxçıvan Dövlət Universitetinə də öz ciddi mənfi təsirini göstərmişdi. Ümummilli Liderimizin Azərbaycanda hakimiyyətə qayıdışından sonra ölkəmizdə baş verən pozitiv dəyişikliklər 1996-cı ilin sonlarından başlayaraq Naxçıvan Dövlət Universitetinin həyatında da sürətlə öz əksini tapmağa başladı. 1996-cı ilin oktyabrında universitetin rəhbərliyində ciddi kadr dəyişiklikləri edildi, tanınmış elm adamı və ictimai xadim, filologiya elmləri doktoru, professor İsa Həbibbəyli rektor vəzifəsinə təyin olundu. Məhz bundan sonra dövlət rəhbərliyinin ölkədə ictimai-siyasi sabitliyi bərqərar etmək üçün həyata keçirdiyi siyasətə adekvat olaraq bu ali təhsil ocağında da qısa müddətdə anarxiya dövrünün bütün mənfi təsirləri aradan qaldırıldı, universitet yeni, sürətli və dönməz inkişaf yoluna qədəm qoydu. 1996-cı ilin oktyabrında İsmayıl Hacıyev universitetin elmi işlər üzrə, 1997-ci ilin yanvar ayında isə tədris işləri üzrə prorektoru vəzifəsinə təyin olundu və 2003-cü ilin yanvar ayınadək bu vəzifədə çalışdı.

Heç şübhəsiz ki, bilavasitə, Ümummilli Liderimiz Heydər Əliyevin ölkəmizə rəhbərlik etdiyi dövrdən başlayaraq həyata keçirilən təhsil və elm siyasətinin, Naxçıvan Muxtar Respublikası rəhbərliyinin ardıcıl və tükənməz qayğısının sayəsində Naxçıvan Dövlət Universiteti həmin illər ərzində Azərbaycan ali məktəbləri ailəsinin ən inkişaf etmiş təhsil ocaqlarından birinə çevrildi. Bu inkişafda prorektor kimi işinə novatorcasına münasibəti, təşkilatçılıq məharəti və ədalətli prinsipiallığı ilə İsmayıl Hacıyevin böyük xidmətləri oldu. Bu zamanadək universitetin tarix-filologiya fakültəsinin dekan müavini (1985-ci il), Naxçıvan Özəl Universitetində elmi işlər üzrə prorektor (1994-95-ci illər il) və "İctimai elmlər" kafedrasının müdiri (1995-ci il) vəzifələrində elmi-pedaqoji təşkilatçılıq qabiliyyətini göstərə bilmişdi. Amma Naxçıvan Dövlət Universitetinin birinci prorektoru kimi hörmətli alim bu rəhbərlik postunda özünü ən yüksək səviyyədə ifadə etdi və təsdiqlədi. Eyni zamanda, bu illərdə İsmayıl müəllim gərgin elmi axtarışlarını davam etdirdi, müxtəlif beynəlxalq və respublika səviyyəli simpozium və konfranslarda iştirak və tariximizin ən aktual elmi problemlərinə dair məzmunlu, birmənalı qəbul olunan maraqlı çıxışlar etdi, elmi məqalə, kitab və monoqrafiyalarında apardığı tədqiqatların mühüm nəticələrini şərh etdi, geniş ictimai fəaliyyətlə məşğul oldu. İ.Hacıyev 1999-cu il sentyabrın 4-də maraqlı və yorulmaz elmi axtarışların bəhrəsi kimi "Naxçıvan Muxtar Respublikası Azərbaycanın milli dövlətçilik tarixində" mövzusunda doktorluq dissertasiyasını böyük uğurla müdafiə etdi. Bu qədər geniş spektrli fəaliyyət görkəmli alim və ictimai xadim İsmayıl Hacıyevin bir şəxsiyyət kimi obrazının kamil cizgilərlə zənginləşdiyinin sübutu və Azərbaycan cəmiyyətinə təqdimatı üçün mühüm bir mərhələ təşkil etdi.

Bu mərhələdə artıq XXI əsrin başlanğıcında, özünün yeni intibahı ərəfəsində Azərbaycanın ayrılmaz tərkib hissəsi olan Naxçıvan Muxtar Respublikasının elmi mühitində böyük bir canlanma müşahidə olunurdu. Azərbaycan Respublikasının Prezidenti Heydər Əliyevin 2002-ci ilin avqust ayında imzaladığı Sərəncamla AMEA-nın nəzdindəki Naxçıvan Elm Mərkəzi səlahiyyətləri, strukturu, maddi-texniki, elmi-təşkilatı bazası, kadr potensialı genişləndirilərək, bir sözlə, əslində, forma və məzmunu tamamilə dəyişdirilərək daha optimal və çevik fəaliyyət göstərən elmi müəssisəyə - tərkibində dörd elmi-tədqiqat institutunu, Astrofizika Rəsədxanası və Əlyazmalar Fondunu birləşdirən AMEA-nın Naxçıvan Bölməsinə çevrildi. Heç şübhəsiz ki, Naxçıvan diyarının tarixini, mədəniyyətini, təbiətini daha səmərəli və əhatəli şəkildə öyrənməyə yönəldilmiş bu mühüm addım Azərbaycan dövlətinin elmə göstərdiyi qayğının daha bir əməli nəticəsi idi.

2003-cü il yanvar ayının 15-də tarix elmləri doktoru İsmayıl Hacıyev AMEA Naxçıvan Bölməsinin sədri vəzifəsinə təyin edildi, aprelin 22-də AMEA-nın həqiqi üzvü seçildi. Müstəqillik dövrünün ötən mərhələsinin təcrübəsi göstərdi ki, Heydər Əliyev dövlətçilik məktəbinin yetirməsi olanlar onun siyasi fəlsəfəsindən yararlandıqlarından, Azərbaycan ictimai-siyasi mühitinin ən uğurlu xadimləridir. Çünki bu görkəmli şəxsiyyətin özünün idarəetmə ilə bağlı aksiomaya çevrilmiş bir fikri var: "Rəhbərlik etmək, yəni adamları öyrətmək və tərbiyələndirmək üçün gərək mənəvi haqqın olsun".

Bu mənada, gözəl insan və ziyalı, dəyərli alim İsmayıl Hacıyevin bu təyinatı qısa müddətdə özünü doğrultdu. Dövlətin maddi-texniki bazanın möhkəmləndirilməsi, elmi-tədqiqat institutları üçün əsas və yardımçı binaların tikilməsi, bir sözlə, işləmək üçün zəruri şəraitin yaradılması istiqamətində atdığı çevik addımlara İ.Hacıyevin rəhbərliyi və təşkilatçılığı ilə AMEA Naxçıvan Bölməsinin elmi kontingenti adekvat operativliklə cavab verdi. 2005-ci ildə iki cilddən ibarət "Naxçıvan Ensiklopediyası", "Azərbaycan Milli Elmlər Akademiyasının Naxçıvan Bölməsi" kitabı, 2008-ci ildə "Naxçıvan abidələri" ensiklopediyası (Azərbaycan və ingilis dillərində), "Naxçıvanın tarixi atlası", "Naxçıvanın folklor antologiyası" (I cild), "Naxçıvan Muxtar Respublikasının Qırmızı kitabı" (I və II cildlər), "Naxçıvan teatrının salnaməsi (1883-2008)" və b. nəşr olundu.

Akademik İ.Hacıyev bu illərdə öz elmi axtarışlarını da yorulmadan davam etdirdi, Azərbaycanda, qonşu ölkələrdə saysız-hesabsız elmi konfranslar, simpoziumlar, elmi məcmuələr onun iştirakı və qiymətli məruzələri, məqalələri və elmi əsərləri ilə dəyər qazandı. "Heydər Əliyev və milli-tarixi yaddaşın bərpası" (2003) monoqrafiyası, "Naxçıvan Muxtar Respublikası - 80" (2004; həmmüəllif) kitabı, "Mustafa Kamal Atatürk və Naxçıvan" (2007) (akademik İsa Həbibbəyli ilə birlikdə), "Azərbaycan Respublikasının ictimai-siyasi və mədəni həyatında qadınların iştirakı (1941-1945-ci illər)" (2008), "İntibahın 15 ili" (2010; İ.Həbibbəyli, B.İsmayılovla birgə) monoqrafiyaları, "Azərbaycan Xalq Cümhuriyyəti və Naxçıvan" (2010) kitabı işıq üzü gördü, 2003-2010-cu illərdə 140-dan artıq elmi məqaləsi dərc edildi.

Bütün bu qeyd edilənlərlə bərabər həm də tarixi-əməli və elmi-nəzəri təcrübə cəmiyyətdə gedən proseslərdə şəxsiyyətin müəyyənedici rolunun nəzərə alınmasını zəruri edir. Bu baxımdan, son illərdə Naxçıvan elmi mühitinin sürətli yüksəlişə nail olunmasında akademik İsmayıl Hacıyevin və onun rəhbərlik etdiyi AMEA Naxçıvan Bölməsinin özünəməxsus yeri və rolu vardır. Öz ömrünü, fəaliyyətini bütövlükdə, elmə bağlamış, məhsuldar, zəngin bir ömür yolu keçmiş bu böyük şəxsiyyətin uzun illərdir ağır blokada şəraitində Naxçıvanda mühüm elmi nailiyyətlərə imza atdığı danılmazdır. 26 kitab və monoqrafiyanın, 230-dan çox elmi məqalənin müəllifi olan görkəmli alimin imzası bu elmi əsərlərin həyata vəsiqə alması ilə yanaşı, elmi rəhbər kimi 16 nəfər elmlər doktoru və fəlsəfə doktorlarının yetişməsində də əhəmiyyətli rol oynamışdır. O, 2006-cı ildən AMEA Naxçıvan Bölməsində Dissertasiya Şurasının sədri, Bölmənin "Xəbərlər" jurnalının baş redaktoru və daha 10-a yaxın elmi məcmuə və jurnalın redaksiya heyətinin üzvüdür.

Cəmiyyətin inkişafında mühüm rol oynayan şəxsiyyətlərin həyatı şəxsilikdən, dar çərçivədən çıxır, ictimailəşir və ictimai inkişafın hərəkətverici qüvvəsinə çevrilmiş olur. Elə buradaca Ümummilli Liderimiz Heydər Əliyevin belə bir müdrik kəlamını da xatırlatmaq tamamilə yerinə düşür: "Ziyalılıq kütləvi ola bilməz. Alim, yazıçı, bəstəkar, rəssam - bunlar fitri istedada malik insanlardır". Bu mənada, akademik İsmayıl Hacıyev, sözün həqiqi mənasında, Azərbaycan ziyalı mühitinin tanınmış üzvlərindən olan dəyərli alim, görkəmli ictimai xadimlərdəndir. Özündə bütün insani xüsusiyyətlərlə əsil ziyalılığın hər bir komponentini ehtiva edən bu görkəmli alim kamil şəxsiyyət bütövlüyünün mücəssəməsidir.

İctimailəşmiş həyatı, elmi-pedaqoji və ictimai-siyasi fəaliyyəti İsmayıl Hacıyevin obrazını dolğun ifadə etmək üçün onu bütün çalarları ilə xarakterizə etmək zərurətini yaradır: hər şeydən əvvəl, o, prinsipial, ciddi, səmimi və ədalətli insandır - bu xüsusiyyətləri ilə müsahibinə qeyri-iradi psixoloji təsir göstərir, eyni insani xüsusiyyətləri qarşısındakı insana da tərbiyəvi müstəvidə aşılayır, İsmayıl Hacıyevin ali insani keyfiyyətlərini obrazlı şəkildə belə ifadə etmək olar: əgər akademiklik yalnız elmə görə deyil, ali insani xüsusiyyətlərə görə verilsəydi, o, çox gənc yaşlarından bu titula layiq görülərdi; İsmayıl Hacıyev gözəl müəllimdir - tələbələr öz müəllimlərini sevir, onunla fəal ünsiyyətə, bu ünsiyyətdən daha çox mənimsəməyə can atır, elmin ən son nailiyyətlərinin əks olunduğu mühazirələrindən maksimum biliklər əldə etməyə çalışırlar; o, görkəmli və şöhrətli alimdir - əməkdar elm xadimidir (2009), AMEA-nın (2003) və Nyu-York Elmlər Akademiyasının həqiqi üzvüdür (2002), Naxçıvan MR Ali Məclisinin (2011) və Azərbaycan Respublikası Təhsil Nazirliyinin (2000, 2003) Fəxri Fərmanları ilə təltif olunmuşdur, Azərbaycan elmi qarşısındakı xidmətlərinə görə akademik Yusif Məmmədəliyev adına mükafat və medalla təltif olunmuşdur (2007), 2001-ci ildə ABŞ-ın Bioqrafiya İnstitutu tərəfindən "İlin adamı" adına, 2010-cu ildə qızıl medala layiq görülmüşdür; o, tanınmış ictimai-siyasi xadimdir - İsmayıl Hacıyev 2000-2005-ci illərdə II çağırış Naxçıvan MR Ali Məclisinin, 2005-2010-cu illərdə III çağırış Azərbaycan Respublikası Milli Məclisinin deputatı kimi ölkəmizdə qanunyaradıcılığı prosesinin fəal iştirakçısı olmuş, 2010-cu ildə IV çağırış Milli Məclis üzvlüyünə yenidən seçilmiş və hazırda ölkə parlamentinin İnsan Hüquqları Komitəsinin üzvü kimi demokratik, hüquqi dövlət quruculuğu prosesinə öz töhfəsini verir; Dünya Azərbaycanlılarının I (2001) və II (2006) Qurultaylarının, Tunisdə İnformasiya Cəmiyyəti üzrə Dünya Sammitinin (2005), Türk dünyası dövlət və cəmiyyətlərinin dostluq, qardaşlıq və işbirliyinə aid X Qurultaylarının (2006) nümayəndəsi olmuşdur. Ölkəmizi və elmimizi Böyük Britaniya, Rusiya, Türkiyə, İran, Misir, Tunis, Qazaxıstan, Türkmənistan, Xorvatiya və s. kimi yaxın və uzaq ölkələrdə ləyaqətlə və yüksək səviyyədə təmsil edən görkəmli elm xadimi 35-dən çox beynəlxalq simpozium və konfransların fəal iştirakçısı olmuşdur.

Bütün bunlar akademik İsmayıl Hacıyevin bütöv, kamil şəxsiyyətinin ayrı-ayrı cizgiləri olmaqla, elmi-ictimai fəaliyyətinin, siyasi dünyagörüşü sisteminin zənginliyini şərtləndirir. Birbaşa qeyd edək ki, Ümummilli Lider Heydər Əliyevin müstəqil dövlətçilik və azadlıq ideyalarının fəal tədqiqatçısı və təbliğatçisi olan alim öz siyasi görüşlərində aydın mövqeli, qətiyyətli Heydər Əliyevçi, ardıcıl yeni azərbaycançı və dönməz etatistdir. Azərbaycan dövlətçiliyinə və xalqına xidmət onun yalnız ictimai-siyasi dünyagörüşünün deyil, həm də bir alim, ziyalı və şəxsiyyət kimi ən ümdə amalıdır. O, tələbə auditoriyasından tutmuş ən yüksək səviyyəli elmi simpoziumlaradək, ali dövlət tədbirlərindəki bütün nitqlərindən tutmuş monoqrafiyalarına qədər, həmişə və hər yerdə Azərbaycan dövlətçiliyinin, Azərbaycançılıq ideologiyasının elmi-siyasi təhlilinə böyük diqqətlə yanaşır. Həm siyasi əqidəsinə, həm də ideoloji baxışlarına görə özünün vətənpərvər Azərbaycançı obrazını çəkinmədən ifadə edir, öz elmi əsərləri ilə bugünkü və gələcək nəsilləri milli ruha kökləyir, qarşısındakı auditoriyaya uğurla inandırıcı və istiqamətverici təsir göstərir. Burada Ulu Öndər Heydər Əliyevin ölməz ideyalarının akademik İsmayıl Hacıyevin ziyalı-vətəndaş mövqeyinin özülünü təşkil etdiyi bariz görünür: "Müstəqil Azərbaycan dövlətinin əsas ideyası Azərbaycançılıqdır. Hər bir azərbaycanlı öz milli mənsubiyyətinə görə qürur hissi keçirməlidir və biz azərbayjançılığı - Azərbayjan dilini, mədəniyyətini, milli-mənəvi dəyərlərini, adət-ənənələrini yaşatmalıyıq".

Görkəmli alim özünün milli dövlətçilik və mənəvi-əxlaqi müstəvidə dünyagörüşünü ifadə edən ideyaları ilə mütərəqqi konservatordur, onun milli məsələlərdəki mənəvi dəyərlərin yüksək tutulduğu ictimai-siyasi mövqeyini elm təşkilatçısı və müəssisə rəhbəri kimi yenilikçiliyi tamamlayır, zənginləşdirir. İsmayıl Hacıyevin ictimai-siyasi görüşlərinin kökündə möhkəm dövlətçilik əqidəsi dayanır, ölkəmizə, Vətənimizə münasibətdə istənilən mövqeyə bu prizmadan münasibət göstərilir ki, bu da tanınmış ictimai-siyasi xadimin bu portretinin qabarıq cizgisi kimi özünü aşkar büruzə verir və cəmiyyət tərəfindən rəğbətlə qarşılanır. Görkəmli alimin Ümummilli Liderimizin dövlətçilik təliminin ayrı-ayrı məsələləri üzrə apardığı araşdırmalar, Azərbaycançılıq, vətənçilik və milli dövlətçilik təliminin məhək daşı olan Əliyevşünaslıq təliminə konseptual yanaşma tərzi "Heydər Əliyev və milli-tarixi yaddaşın bərpası" monoqrafiyasında, "Heydər Əliyev və Azərbaycan tarixi məsələləri", "Heydər Əliyev və Naxçıvanda elmin inkişafı", "Heydər Əliyevin milli tarix konsepsiyası", "Heydər Əliyevin həyatı və fəaliyyətinin Naxçıvan dövrləri", "Heydər Əliyev və Naxçıvanın görkəmli tarixi şəxsiyyətləri" və s. bu kimi onlarla elmi məqalə və əsərlərində özünü qabarıq şəkildə göstərir.

Akademik İsmayıl Hacıyevin elmi fəaliyyəti, ziyalılığı, vətənpərvərliyi, şəxsiyyətinin bütövlüyü, Ulu Öndər Heydər Əliyevin azadlıq və müstəqil dövlətçilik ideyalarının tədqiqi və təbliği onun Yeni Azərbaycan Partiyası sıralarında aktiv siyasi fəaliyyətinin mayasını təşkil edir. O, istər muxtar respublika miqyaslı, istərsə də, respublika miqyaslı partiya tədbirlərinin fəal iştirakçısıdır. On beş ilə yaxındır ki o, üzvü olduğu Yeni Azərbaycan Partiyasının elmi-siyasi kontingentində ləyaqətlə təmsil olunur. Elə buna görədir ki, ən ali partiya tədbirlərində və orqanlarında görkəmli akademikin iştirakı tamamilə təbii qarşılanır. İsmayıl Hacıyev Yeni Azərbaycan Partiyasının III (2005) və IV (2008) Qurultaylarında təmsil olunmuşdur, YAP Naxçıvan MR Təşkilatının III (2004) və IV (2007) konfranslarında təşkilatın Siyasi Şurasının üzvü seçilmişdir.

Akademik İsmayıl Hacıyev ciddi elmi əsaslara istinad edən zəngin intellekti, vətənpərvər, işgüzar, təəssübkeş, dövlətçi əqidəyə, qanunun aliliyinə və tarixi milli əxlaqa söykənən, ümumbəşəri ideyalarla zəngin dünyagörüşə malik olan görkəmli ictimai-siyasi xadimdir. Onun yüksək səviyyəli innovasiyalılığı, geniş ictimai-siyasi məlumatlılığı, düşüncə konstruktivliyi, müasir beynəlxalq proseslər barəsindəki geniş siyasi informasiyalılığı, nitqlərindəki siyasi savadlılıq İsmayıl Hacıyevin ictimai-siyasi xadim kimi portretinin kamilliyini təmin edən başlıca xarakterik cizgilərdir.

Bütün cəmiyyətlər təbii inkişaf qanunauyğunluqları ilə yanaşı, ayrı-ayrı lider şəxsiyyətlərinin fəaliyyətinin nəticəsi olaraq inkişaf edir. Öz həyatının kamillik dövrünü haqlamış Azərbaycan aliminin hələ bundan sonra da elmimizin və cəmiyyətimizin inkişafında böyük xidmətləri olacağı şübhəsizdir. Çünki artıq böyük şəxsiyyətinin özünütəsdiqi prosesini çoxdan keçmiş İsmayıl müəllimin fəaliyyəti öz sərhədlərini daha da genişləndirərək özünün yetirmələrini hazırlamaqla cəmiyyətə təqdim etmək, vətənin və dövlətçiliyin inkişafına həm də ardıcılları vasitəsilə yeni-yeni töhfələr vermək istiqamətində də uğurlarla zənginləşmişdir. Heç bir tərəddüdsüz qeyd etməliyik ki, əməkdar elm xadimi, AMEA-nın həqiqi üzvü, tarix elmləri doktoru, professor İsmayıl Hacıyev cəmiyyətin inkişafında belə bir geniş fəaliyyət sahibi olan görkəmli alim və ictimai-siyasi xadimdir.

ELMAN CƏFƏRLİ

Səs.- 2011.- 9 fevral.- S. 5-6.