Ölkəmizin iqtisadi göstəriciləri durmadan artmaqdadır

Nəsimi rayonunda sosial-iqtisadi yekunlar müzakirə olunub

Dünən Nəsimi rayonun 2010-cu ildə sosial-iqtisadi inkişaf istiqamətində görülən işlərə yekun vurularaq, 2011-ci il üçün qarşıda duran vəzifələrin müzakirəsi ilə bağlı geniş tədbiri keçirildi. Tədbir iştirakçıları ilk öncə rayonun mərkəzində ucaldılan Ümummilli Liderimiz Heydər Əliyevin abidəsinin ziyarət edərək, abidə önünə əklil və tər çiçək dəstələri düzdülər.

Sonra tədbir Azərbaycan Dövlət Tibb Universitetinin akt zalında davam etdi. Hesabat yığıncağında məruzə ilə çıxış edən Nəsimi rayon icra hakimiyyətinin başçısı Nəsib Məhəməliyevin ötən il Azərbaycan Respublikasının Prezidenti cənab İlham Əliyevin rəhbərliyi altında respublikanın sosial-iqtisadi inkişafı sahəsində əldə olunan nailiyyətlər barədə məlumat verdi.

N.Məhəməliyev Azərbaycan dövlətinin çox uğurlu sosial-iqtisadi siyasət həyata keçirdiyini, yeni iş yerləri açıldığını və regionların yüksək inkişafının təmin olunduğunu vurğuladı. Regionların sosial-iqtisadi inkişafına dair Dövlət Proqramına uyğun olaraq, Azərbaycanın sosial-iqtisadi uğurlarının paytaxtla yanaşı, bütün bölgələrini əhatə etdiyini bildirən N.Məhəməliyev əsası Ulu Öndər Heydər Əliyev tərəfindən qoyulmuş iqtisadi strategiyanın Prezident İlham Əliyev tərəfindən uğurla davam etdirdiyi daxili və xarici siyasət xəttinin, düşünülmüş iqtisadi və hüquqi islahatların real nəticələrinin ötən ilin yekunlarında özünün bariz əksini tapdığını vurğuladı: "Belə ki, 2010-cu ildə ÜDM 41 milyard manatı ötmüşdür. Sənaye artımı 2,6 faiz, qeyri-neft sektorunun artım tempi 7,6 faiz olmuşdur. Həmçinin, əhalinin pul gəlirləri 12,3 faiz, inflyasiya isə 5,7 faizə çatıb. İlin yekunlarına görə yoxsulluğun səviyyəsi son 7 ildə yoxsulluq səviyyəsi 5 dəfə azalıbdır. Həmçinin, ötən il ölkə iqtisadiyyatına 15,5 milyard dollar investisiya qoyulub ki, bununda 9,3 milyardı qeyri-neft sektorunun payına düşür. Bu, çox önəmli bir faktordur və ölkə iqtisadiyyatının neft sektorundan asılılığını azaltmaq məqsədi daşıyır. Regionların inkişaf proqramının icrasına başlandıqdan, yəni 2004-cü ilin fevralından bu günə qədər 900 mindən artıq iş yeri açılıbdır ki, bu da respublikada işsizlik probleminin aradan qaldırılmasında əsas amil olub".

Ölkəmizdə davam edən inkişaf tendensiyasının Bakının Nəsimi rayonunun sosial-iqtisadi inkişafında da özünü gösərdiyini vurğulayan icra hakimiyyətinin başçısı N.Məhəməliyev bildirdi ki, ötən il rayonda ilin yekunlarına görə sənaye müəssisələri üzrə ümumi məhsul buraxılışının həcmi 907250,2 min manat, sənaye məhsulunun həcmi 106412,7 min manat, tikinti-quraşdırma işlərinin həcmi isə 286753,3 min manat olubdur: "2010-ci ildə rayon üzrə pərakəndə əmtəə dövriyyəsi 640960,8 min manat olubdur ki, bu da keçən illə müqayisədə 0,8 faiz artım deməkdir. Əhaliyə göstərilən pullu xidmətlərin həcmi isə ötən illə müqayisədə 15,1 faiz artaraq 608403,7 min manata çatıbdır. Həmçinin, ötən ildə əhalinin orta aylıq əmək haqqı ötən illə müqayisədə 12,7 faiz artaraq 365,8 manat olub".

Natiq onu da vurğuladı ki, ötən ilin ölkəmizdə "Ekologiya ili" elan edilməsi ilə bağlı rayonun H.Seyidzadə, 20 Yanvar, Cavadxan, S.Vurğun küçələri, "Vaqif", "Azadlıq", "Neftçilər", "Tbilisi" prospektlərində, mikrorayon ərazisindəki məhəllələrdə, mövcud park və bağlarda, ümumilikdə, 25000 yaxın ağac və dekorativ gül kolları əkilmiş, rayon ərazisində yeni-yeni yaşıllıq zolaqları salınmışdır. Təşkil edilən iməciliklərdə 10000 artıq rayon sakini iştirak etmişdir. Bakıxanov küçəsi, 643-cü məhəllədə Nəsimi rayon icra hakimiyyətinin yeni inzibati binasının tikintisinə başlanılmış və hal-hazırda tikinti işləri davam etdirilir. Rayon ərazisində dağ yəhudiləri icması üçün sinaqoqun tikintisinə başlanılmış, Hacı Əjdərbəy məscidinin (Göy məscid) yeni korpusunun inşasına başlamaq üçün hazırlıq işləri başa çatdırılmışdır. Ötən ildən təmirinə başlanılmış "Zabitlər" parkında aparılan yenidənqurma və abadlıq işləri tamamlanmaq üzrədir. Bakıxanov küçəsində yerləşən parkda müasir Türkiyə dövlətinin qurucusu Mustafa Kamal Atatürkün abidəsi ucaldılmış, abidənin ətrafında genişmiqyaslı abadlıq və yenidənqurma işləri aparılmışdır. Bülbül prospekti ilə 28 May küçəsinin kəsişməsində yerləşən piyada keçidində başlanılmış əsaslı yenidənqurma işləri başa çatdırılmışdır. Hər üç tədbirin açılış mərasimlərində ölkə Prezidenti cənab İlham Əliyev iştirak edibdir.

Nəsimi rayon icra hakimiyyətinin başçısı onu da bildirib ki, rayon ərazisində 38 təhsil müəssisəsi, o cümlədən, 29 ümumtəhsil məktəbi, 2 xüsusi məktəb, Heydər Əliyev adına müasir Təhsil Kompleksi, Bakı Slavyan Universitetinin nəzdində məktəb-lisey kompleksi, Atatürk liseyi və 5 məktəbdənkənar tərbiyə müəssisəsi, 44 körpələr evi-uşaq bağçası fəaliyyət göstərir. N.Məhəməliyev ölkə Prezidenti İlham Əliyevin Sərəncamı ilə keçirilən "İlin ən yaxşı ümumtəhsil məktəbi" respublika müsabiqəsində keçən il Nəsimi rayonunun 5, 164 saylı orta məktəbləri və 13 nəfər müəllim həmin qaliblər sırasında olublar. 5 oktyabr Müəllimlər Günü ərəfəsində isə ölkə Prezidentinin Sərəncamı ilə bir nəfər müəllim "Tərəqqi" medalı ilə təltif edilib: "Həmçinin, 115 saylı körpələr evi-uşaq bağçası üçün yeni iki mərtəbəli korpus tikilərək istifadəyə verilmiş, 76 saylı körpələr evi-uşaq bağçasında və eşitmə qabiliyyəti pozulmuş uşaqların respublika ixtisaslaşdırılmış körpələr evi-uşaq bağçasında əsaslı təmir işləri aparılır. Onu da qeyd edim ki, ötən il məktəblərin maddi-texniki bazası daha da möhkəmlənmiş, məktəblərin kompyüterləşməsi işləri davam etdirilmiş, ümumtəhsil məktəblərində vahid məktəbli formasının tətbiqi ilə bağlı işlər başa çatdırılmışdır. Xüsusi olaraq vurğulamaq istərdim ki, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, millət vəkili Mehriban xanım Əliyevanın təşəbbüsü ilə 2010/2011-ci tədris ili ərəfəsində bütün birinci sinif şagirdlərinə məktəbli ləvazimatları hədiyyə edilmiş, il ərzində rayonda fəaliyyət göstərən yardımçı məktəblərə müntəzəm diqqət və qayğı göstərilmişdir".

Rayon rəhbəri ötən il ərzində məcburi dövlət sosial sığortası qaydalarını, mütəmadi olaraq pozan, qeydiyyatdan yayınan 368 fiziki şəxsə qarşı protokolun tərtib edildiyini və həmin şəxslərin 9936 manat məbləğində cərimələndiyini vurğulayıb: "Onu da qeyd edim ki, pensiyaların ödənilməsi üçün 39160,2 min manat vəsait xərclənibdir ki, bu da ötən ilin müvafiq dövründən 2564,2 min manat və yaxud 7,0 faiz çoxdur. Həmin vəsaitin 37870 min manatı Respublika Fondundan köçürülmüş, 1290,2 min manat isə yerli sığorta edənlərdən toplanmışdır. Nəsimi rayonu ərazisində 2453 ailə olmaqla, 10682 nəfər məcburi köçkün məskunlaşmışdır. Onlardan 821 ailə, 3823 nəfəri yataqxanalarda, 854 ailə 3479 nəfəri qohum və şəxsi mənzillərdə, 557 ailə 2430 nəfər zəbt olunmuş mənzillərdə yaşayırlar".

Daha sonra hesabat məruzəsi ətrafında çıxışlar oldu. Məruzə ətrafında çıxış edən Azərbaycan Respublikası Prezidenti Administrasiyasının məsul işçisi Tağı Tağıyev və digər natiqlər Nəsimi rayonunun hesabatını uğurlu hesab etdilər.

Tədbirdə Milli Məclisin üzvləri Ziyad Səmədzadə və Məlahət İbrahimqızı iştirak edib.

Yığıncağın sonunda iştirakçılar adından ölkə Prezidenti cənab İlham Əliyevə müraciət qəbul olunub.

RƏFİQƏ KAMALQIZI

Səs.- 2011.- 10 fevral.- S. 7.