“Azərbaycanda korrupsiyaya qarşı mübarizədə əsas məqsəd inkişafa mane olan neqativ halları aradan qaldırmaqdır”

Azərbaycanda korrupsiyaya qarşı mübarizənin aparılmasında əsas məqsəd ölkənin inkişafına mane olan neqativ halları aradan qaldırmaqdır. Bunu cümə günü Trend-ə müsahibəsində Prezident Administrasiyasının (PA) İctimai-siyasi məsələlər şöbəsinin müdiri Əli Həsənov bildirib. "Azərbaycanda korrupsiyaya qarşı mübarizənin aparılmasında əsas məqsədlərdən biri də ölkənin daxili və xarici imicinə xələl gətirən məsələləri birdəfəlik aradan qaldırmaq, ölkəmizdə həm əhalinin narazılığına səbəb olan amillərə son qoymaq, həm də iş adamlarının fəaliyyətinə mane olan halların qarşısını almaqdır", - Həsənov deyib.

PA rəsmisi bildirib ki, korrupsiyaya qarşı mübarizə kampaniya deyil. "2010-cu ilin yekunları ilə bağlı yanvarın 14-də Prezident İlham Əiliyevin keçirdiyi Nazirlər Kabinetinin genişlənmiş iclasında bu məsələ cənab Prezident tərəfindən irəli sürüldü və qeyd olundu ki, Azərbaycan 2010-cu ildə və müstəqillik dövründə bütün sahələrdə ciddi irəliləyişlər əldə etdiyi, dinamik inkişafa nail olduğu, daxili, xarici siyasətdə mühüm uğurlar əldə etdiyi halda bəzi məsələlər var ki, onlara nail ola bilməmişik. Onların sırasında da cənab prezident xarici siyasətdə və beynəlxalq münasibətdə Dağlıq Qarabağ problemini, daxili siyasətdə isə hələ də sahibkarlığa mane olan halların mövcudluğunu, ölkədə sahibkarlıq obyektlərinin qeyri-qanuni yoxlamalara məruz qaldığını, ölkənin işguzar imicinə mənfi təsir göstərən korrupsiya və rüşvət hallarının mövcud olduğunu bəyan etdi və bu hallara qarşı ciddi mübarizəyə çağırdı.

Həmin müşavirədən sonra ölkə başçısının tapşırığına müvafiq olaraq bir çox tədbirlər, o cümlədən Korrupsiyaya Qarşı Mübarizə üzrə Komissiyanın müvafiq toplantısı, nazirliklərin, komitələrin və digər orqanların mərkəzləşmiş kollegiya toplantıları, yoxlayıcı təşkilatların fəaliyyətinin təkmilləşdirilməsi məqsədilə Nazirlər Kabineti və digər qurumların müvafiq toplantıları keçirildi və bu toplantılar davam etdirilir", - Həsənov deyib.

Səs.- 2011.- 12 fevral.- S. 4.