“Zərif imzalar"

Müasir Azərbaycan qadını hər sahədə özünün potensial imkanlarından yararlanaraq, cəmiyyətin aparıcı qüvvəsinə çevrilmişdir. Şərq intellektindən, dəyərlərindən bəhrələnən Azərbaycan qadını müasir həyatımızda Qərb dünyasına inteqrasiya olduğumuz zaman da dəyərləri qoruyub saxlayır. Avropanın insan düşüncəsinə müsbət təsiri olan ölçüləri, təcrübəni əxz edərək, bəşəri düşüncələrin fövqündə özünü təsdiqləyir. Bu dəyərlər Azərbaycan qadınında tarix boyu formalaşmışdır.

Yaşadığımız illərin tarixində Azərbaycan qadınının nəyə qadir olması hər kəsə bəllidir. Elə bir sahə yoxdur ki, Azərbaycan qadını kişilərlə bərabər işləməsin. Azərbaycan qadınının fəal rolu müxtəlif əsrlərdə öz əksini tapıb. Burla Xatun, Selcan xatun, Nüşabə, Nigar xanım, Məshəti Gəncəvi, Heyran xanım, Xurşidbanu Natəvan, Həcər xanım, Nigar Şıxlinskaya, İzzət Orucova, Ədilə Şaxtaxtinskaya, Püstəxanım Əzizbəyova, Fatma Muxtarova, Şövkət Məmmədova, İzzət Seyidova, Gülnaz Salamova, Ceyran Topçubaşova, Aynur Sofiyeva, Zemfira Meftaheddinova və onlarla belə qadınlarımız müxtəlif sahələrdə liderlik məktəbi yaradaraq, novatorçu kimi tarixə iz salmışdılar. Bu gün də onların məktəbinin davamçıları yetişməkdədir. Bu yaxınlarda çapdan çıxan "Zərif imzalar" ensikopediyası da məhz dünyada ən ağır və məsuliyyətli sənətlərdən biri olan jurnalistikaya - Azərbaycan jurnalist qadınlarına həsr olunub. Zərif çiyinlərində böyük bir məsuliyyəti gəzdirən Azərbaycanın jurnalist qadınlarının fəaliyyətindən bəhs edən nümunədə saysız insan təxəyyülü və onların istedad, bacarıq və intellekti ilə tanış oluruq.

Kitabın tərtibçisi olan Sevil Yusifovadır. Ensiklopediya Azərbaycan Jurnalist Qadınlar Assosiasiyasının layihəsi əsasında hazırlanmışdır. Belə bir layihənin həyata keçirilmə ideyası 2009-cu ildə keçirilən Azərbaycan Qadın Jurnalistlər Forumunda qərara alınmışdır. Kitab milli mətbuat tariximizdə ilk dəfə olaraq nəfis tərtibatla işıq üzü görmüşdür. "Zərif imzalar"ın ikinci cildi tərtibçi tərəfindən çapa hazırlanır.

Ensiklopediya Azərbaycanın tanınmış ziyalılırı olan Fatma Abdullazadə, Leyla Əliyeva, Sona Vəliyeva, Elmira Axundova, Ayna Sultanova, Lalə Kazımova, Mailə Muradxanlı, Fəridə Ləman kimi fəaliyyəti, imzası ilə cəmiyyətdə tanınan insanlarla tanışlıqdır. Bu tanışlığın coğrafiyası genişdir. Belə bir ideyanın reallaşmasında əsas məqsəd Azərbaycan mətbuatının zərif imzalarını beynəlxalq aləmdə tanıtmaqdır. Eyni zamanda, cəmiyyətə örnək olan xanımların fəaliyyət dairəsi ilə yetişən nəsli tanış edib, tərbiyələndirmək məqsədi daşıyır.

Artıq Amerika, Türkiyə, London kitabxanalarının hər birinə 20 nüsxə hədiyyə olunub. Yaxın günlərdə isə Amerika universitetlərinin kitabxanalarına hədiyyə olunacaq.

NƏZAKƏT ƏLƏDDİNQIZI

Səs.- 2011.- 12 fevral.- S. 12.