ABŞ paytaxtında "Könlüm keçir Qarabağdan" adlı sərgi açılıb

ABŞ-ın Qarabağ Fondu vaşinqtonlu sənətsevərlərə Azərbaycan mənşəli amerikalı rəssamların işləri ilə tanış olmaq üçün daha bir imkan yaratmışdır. Xəbər verdiyimiz kimi, yanvarın sonunda ABŞ paytaxtının mərkəzi "Edison Place Gallery" salonunda Azərbaycan mənşəli rəssam Əbülfəz Bahadurinin əsərlərindən ibarət təşkil olunmuş "Bölünmüş rənglər: Odlar yurdundan abstrakt mənzərələr" sərgisi böyük maraqla qarşılanmışdı. Bu həftə isə "Edison Place Gallery" salonunda "Könlüm keçir Qarabağdan" adlı ongünlük sərgi açılmışdır. İlk gündən çoxsaylı tamaşaçı cəlb edən sərgidə ABŞ-da yaşayan istedadlı rəssamlar Yavər Rzayev və Leyla Rzayevanın əsərləri nümayiş etdirilir.

Yavər Rzayevin işlərində onun doğulub boya-başa çatdığı Ağdamın təbiəti, Qarabağın bənzərsiz Cıdır düzü, İsabulağı, Tərtər və Qarqar çaylarının mənzərələri təsvir olunur. Səməd Vurğunun məşhur şeirinin parçasından ilham alan rəssam sərginin açılış mərasimində bildirmişdir ki, ABŞ-ın Qarabağ Fondundan təklif alan kimi işə başlamış və iki ay ərzində yağlı boya ilə 12 əsər çəkmişdir. O demişdir: "Amerikadakı dostlarıma və tanışlarıma doğma Qarabağımı göstərmək mənim çoxdankı arzum idi. İndi mən bir neçə saat ərzində dünyanın bir başından o biri başına gedə bilirəm. Lakin təəssüf ki, doğma Qarabağ bölgəsinə gedə bilmirəm.

Bu sərgidəki əsərlər mənə boya-başa çatdığım yerlərə, xəyalən də olsa, səyahət etməyə imkan vermişdir. Bu "səyahətə" özümlə bərabər, sərgiyə gələn tamaşaçılarımı da apara bilirəm". Leyla Rzayevanın əsərlərində də Azərbaycanın əsrarəngiz təbiəti əsas mövzudur. "Babamın evi", "İmarətlər" adlı əsərlərində Leyla Azərbaycana bağlılığını, onun mədəniyyətindən ilhamlandığını aydın nümayiş etdirə bilmişdir. Hər iki rəssamın əsərləri ABŞ-ın müxtəlif sərgi salonlarında dəfələrlə nümayiş etdirilsə də, onlar Qarabağ Fondu tərəfindən təşkil edilən bu sərginin xüsusi əhəmiyyət daşıdığı bildirmişlər.

Zümrüd

Səs.- 2011.- 12 fevral.- S. 12.