"Neqativ halların aradan qaldırılması təkcə dövlətin yox, hər bir insanın vətəndaşlıq və mənəvi borcudur"

YAP Siyasi Şurasının üzvü, iqtisadçı-ekspert Aydın Hüseynovun SİA-ya müsahibəsi

- Ölkə Prezidenti cənab İlham Əliyev məcburi köçkün ailələrinin mənzil-məişət şəraitinin yaxşılaşdırılmasına dair əlavə tədbirlər haqqında sərəncam imzalayıb. Bu, həmin kateqoriyadan olan insanların dövlətin qayğısı ilə əhatə olunduğunu deməyə əsas verirmi?

- Bəli, Prezidentin sərəncamı həm birbaşa əsas verir, həm də bu mənzil-mənzil şəraitinin yaxşılaşdırılmasının bariz nümunəsi deməkdir. Bu, məcburi köçkünlərin sosial və mənzil şəraitinin yaxşılaşdırılması ilə bağlı verilən birinci sərəncam deyil. Məcburi köçkün və qaçqınlar hər zaman ölkə Prezidentinin diqqət mərkəzində olub və onların problemlərinin həlli mərhələ-mərhələ həyata keçirilib. Hələ 1998-ci ildə ölkə Prezidenti İlham Əliyev Qaradağ rayonundan millət vəkili olarkən məcburi köçqün və qaçqınlar üçün həmin ərazidə Ümid qəsəbəsinin salınması fikri ilə çıxış etdi. Onlar üçün ilk dəfə olaraq qəsəbə salındı. Bildiyiniz kimi, məcburi köçkünlər əsasən Bakı şəhərində məskunlaşıblar. Son dövrdə məcburi köçkünlərin həyat və və mənzil şəraitinin yaxşılaşdırlması ilə əlaqədar Dövlət Neft Fondundan xeyli vəsait ayrılıb və onların yaşaması üçün evlər tikilərək istifadəyə verilib. Lakin qaçqın və məcburi köçkünlərin konkret olaraq həyat şəraitini müasir tərzdə qurulması, onların müəyyən çətinliklərinin aradan qaldırılması üçün sərəncamdan irəli gələn digər məsələlərin həlli həm Maliyyə, İqtisadi İnkişaf nazirliklərinin və aidiyyəti qurumlara müvafiq tapşırıqlar verilib. Bu halların aradan qaldırılması üçün də sərəncamın müvafiq bəndlərini həyata keçirmək lazımdır.

- Aydın müəllim, 2010-cu ilin yekunlarına dair Nazirlər Kabinetində keçirilmiş iclasda və bölgələrdə dəfələrlə vətəndaşarla keçirilmiş görüşlərdə sənab Prezident tərəfindən vurğulanıb ki, sahibkarlığın inkişafına şərait yaradılsın. Müxtəlif dövlət orqanları tərəfindən qanunsuz müdaxilə və bu kimi neqativ hallar aradan qaldırılmalıdır. Sizcə, hansı müsbət dəyişikliklər baş verib?

- İlk növbədə sahibkarlara öz hüquqlarının verilməsi, eyni zamanda onların fəaliyyətindəki şəffaflığın qorunması üçün Prezident sərəncam imzalayıb və bu may ayından etibarən tətbiq olunacaq. Bu onların yoxlanması ilə bağlıdır. Həm yoxlayan orqanlar, həm də yoxlanan təşkilatların, sahibkarların fəaliyyəti reysterdə öz əksini tapacaq. Reysterin fərqləndirici xüsusiyyəti ondan ibarətdir ki, o eyni zamanda dövlətin informasiya mənbəyi kimi saxlanılır. Bu il də çoxlu sayda yoxlamalar həyata keçirilib. Artıq lüzumsuz yoxlamaların aradan qaldırılması reyster xidmətinin vasitəsi ilə tənzimlənəcək. Üç aydan bir bununla əlaqədar olaraq Ədliyyə Nazirliyində müvafiq məlumatlar toplanılacaq və bu barədə ölkə başçısına, dövlət rəsmilərinə mütəmadi məlumatlar veriləcək. Burada təkcə yoxlayan qurumların deyil, həm də yoxlanan təşkilatların da məsuliyyət məsələsi var. Dövlət büdcəsindən ayrılan vəsaitlərin son təyinatına qədər məqsədyönlü və səmərəli xərclənməsi üçün onların yoxlanılması və qeydə alınması vacibdir.

- Korrupsiya və rüşvətxorluğa qarşı mübarizə tədbirlərinin dövlət siyasətinə çevrilməsi hansı müsbət nəticələrini verməkdədir?

- Korrupsiyaya qarşı Milli Strategiya şəklində addımların atılması ilə bağlı 2007-ci ildə prezident tərəfindən proqram təsdiqlənib. Bu mərhələ-mərhələ həyata keçirilib. Korrupsiyaya qarşı mübarizəni hər kəs aparmalıdır. Ümumiyyətlə, bütün dövlətlərdə olduğu kimi, bizdə də iqtisadiyyatın inkişafı müəyyən mərhələlərlə gedir. Əgər iqtisadiyyatda keçid mərhələsi varsa, bu dövrdə istənilən neqativ hallar ortaya çıxır. Bu prosesin özünün nəticəsi olaraq neqativ hallar aşkarlanır. Artıq prezidentimiz elan etdi ki, bizdə iqtisadiyyatdakı keçid mərhələsi başa çatıb. 2008-ci ildə dayanıqlı inkişaf mərhələsinə qədəm qoymuşuq. Eyni zamanda, son dövrlər dünyada baş verən qlobal maliyyə böhranı da sübut etdi ki, Azərbaycandakı iqtisadi inkişaf dayanıqlıdır və özünü qorumaq qabiliyyətinə malikdir. Artıq bu il ölkəmizin 30 milyard manata yaxın ehtiyatları var. Təkcə dövlət büdcəsinin xərc hissəsi 12 milyard manat məbləği əhatə edib. Bu da bir daha ölkə iqtisadiyyatıın düzgün şəkildə inkişaf etdirilməsinin təzahürüdür və Azərbaycan investisiya qoyulan, digər ölkələrdə investisiya qoyuluşunu həyata keçirən ölkə çevrilib. Korrupsiya ilə mübarizinin dövlət siyasətinə çevrilməsi artıq iqtisadiyyatımızın keçid mərhələsinin arxada qaldığını bir daha sübut etdi. Gələcəkdə dinamik inkişafa malik olan iqtisadiyyatımızın tələblərindən irəli gələn məsələdir ki, neqativ hallar olmasın. İnanırıq ki, ümumiyyətlə yaxın müddətdə bu terminin işlənməsinə ehtiyac qalmayacaq. Azərbaycan iqtisadiyyatı modernləşən iqtisadiyyatdır. Azərbaycan həm informasiyalar, həm də müasir texnologiyaların tətbiqi baxımından, eləcə də insanların müasir tərzdə düşünməsi baxımından inkişaf etmiş ölkədir. Bu gün neqativ hallar kütləvi hal almayıb. Belə bir hallar var idisə, dövlət proqramına uyğun olaraq aradan qaldırılacaq. Lakin bu təkcə dövlətin yox, hər bir vətəndaşın mənəvi borcudur.

- Yeri gəlmişkən, dövlət ərzaq məhsullarının qiymətinin artırılmasının qarşısını almaq məqsədli proqramın hazırlanmasını planlaşdırır. Bu proqram qiymətlərin süni artımının qarşısını ala biləcəkmi?

- Qiyməti bazar müəyyənləşdirir. Bizdə də bazar iqtisadiyyatı olduğu üçün qiymətlər də burada yer alıb. Lakin bununla yanaşı dövlət ölkə vətəndaşlarının sosial rifah halının yaxşılaşdırılmasını və onların sosial hüquqlarının qorunması baxımından bazardakı ərzağın qiymətinin tənzimlənməsi üçün addımlar atır. Bununla yanaşı, ərzağın qiymətinin tənzimlənməsi üçün baza yaradılmalıdır. O olduğu bir halda qiymətlər də normal şəkildə olacaq. Buna görə də birinci növbədə insanların ərzağa olan tələbatını ödəmək üçün belə addımlar atılır. Xüsusilə kənd təsərrüfatı sahəsində mühüm işlər görülür. Bölgələrdə suvarma sisteminin yaxşılaşdırılması, biznes xidmətinin yüksəldilməsi, torpaqların melorasiya olunması və digər kənd tsərrüfatı ilə bağlı görülən işlər ərzaq proqramını tərkib hissəsi olaraq ortaya qoyulan məsələlərdir. Bu da qiymələrin normal şəkildə qalmasına yardım göstərəcək.

Səs.- 2011.- 23 fevral.- S. 6.