Nəsillərə örnək ola biləcək ömür

Görkəmli idman ustası, Azərbaycanın əməkdar məşqçisi və hakim Aydın İbrahim oğlu Mustafayevin əziz xatirəsinə

Tarix və yaddaş - bu iki məfhum arasında üzvi bağlılığın olması şübhəsizdir. Tarixdə olmuş hadisələri təhrif etmədən uzun illərdən sonra nəsillərə çatdırmaq üçün yaddaş daima oyaq olmalıdır. Yaddaş isə yalnız o zaman görünür, bütövlüyünü saxlayır, bir neçə onilliklərdə yaşamış, dostluq etmiş və qardaşlaşmış insanlar arasında əlaqələrin itirilməməsi üçün istifadə olunur. Yaşlı nəslin nümayəndəsi kimi Aydın müəllim haqqında bir neçə xoş söz demək fikri ilə uzun illərdir ki, yaşayıram. O dövrdə şagirdlər arasında idmana olan həvəsi artırmaq məqsədi ilə Şərur rayonu təhsil şöbəsinin qərarı ilə orta məktəb tələbələrinin idman üzrə yarışları keçirilirdi.

Orta məktəb şagirdləri arasında mənim qardaşım Məşdi, Tumaslı kənd orta məktəbinin şagirdi və Cəlilkənd orta məktəbinin şagirdi Aydın keçirilən idman yarışlarında qalib çıxan birincilər sırasında idilər. O vaxt hər iki idmançı şagird öz məktəblərinə şan-şöhrət gətirdilər. İllər ötdü, hər iki şagird məktəbi bitirəndən sonra 1958-ci ildə Azərbaycan Dövlət Bədən Tərbiyəsi İnstitutuna daxil oldular. Hər iki dost və qardaş bir yataqxanada yaşamaqla 1962-ci ildə institutu bitirdilər. Məşdi müəllim həyatını Sumqayıta, Aydın müəllim isə həyatını Bakıya bağladı. Ali məktəb tələbəsi kimi yay tətili dövrü Məşdi müəllimlə birlikdə Şahtaxtı kəndinə qonaq gəlir, bir neçə gün qaldıqdan sonra, Sərxanlı kəndində Aydının ailəsinə qonaq olur. Mustafayevlər ailəsinin ağsaqqalı sayılan Aydının böyük qardaşı tikinti mühəndisi Nəriman Mustafayev ilə mən uzun illər idi ki, tanış idim. Qardaşlarımızın institutda bir oxumaları, dostluq etmələri bizim münasibətləri daha möhkəmləndirdi. Məhz Nəriman Mustafayevin icazəsi ilə tələbə qardaşı Aydın, mən öz qardaşım Məşdi ilə iki həftəliyə yay istirahət tətili dövrü Batabat yaylağına dincəlməyə, dağ havası almağa getmişdim. Beləliklə, həyat öz axarında gedir, institutu bitirdikdən sonra Aydın müəllim Bakı şəhəri Xətai rayonunun 62 saylı orta məktəbində ilk müəllimlik fəaliyyətinə başlayır. Ali idman təhsili ilə kifayətlənməyən Aydın müəllim N.Tusi adına Azərbaycan Dövlət Pedaqoji İnstitutunun filologiya fakültəsini bitirib. İdmana olan həvəs onu Azərbaycan Dövlət Bədən Tərbiyəsi İnstitutuna gətirir və müəllim kimi işə qəbul olunur. Sonralar bədən tərbiyəsi kafedrasına baş müəllim, bir müddətdən sonra isə kafedra müdiri vəzifəsinə təyin edilir. Böyük, şərəfli yol keçmiş Aydın müəllim Azərbaycan Bədən Tərbiyəsi İnstitutunda 100-lərlə idmançı yetişdirmişdir. Yetirmələri sırasında respublika birinciləri, Avropa və dünya üzrə keçirilən yarışlarda qalib çıxan onlarla tələbə Aydın müəllimin başını ucaltmışdı. Aydın müəllim üzərində məsuliyyət hiss edərək, Azərbaycan Respublikası üzrə əməkdar məşqçi və hakim kimi 350 səhifədən yuxarı 3 tədris vəsaiti və 8 elmi məqalə yazmış və 4 əsərə isə elmi rəhbərlik etmişdi. Bu xidmətlərinə görə, o, bir neçə dəfə orden və medallarla təltif olunub. Mustafayevlər ailəsinə şöhrət gətirən Aydın müəllim böyük ziyalı şəxsiyyət kimi Azərbaycan Respublikasında tanınmağa başlamışdır. Azərbaycan tarixinə böyük şəxsiyyətlər bəxş etmiş qədim Şahtaxtı kəndi qoynunda dünyaya göz açan 50 nəfərdən çox alim, professor, akademik, filosof və elmlər namizədləri, 5 nəfər sosialist əməyi qəhrəmanı, diplomatlar, 2 general, 15 polkovnik, xalq yazıçısı, maarif- mədəniyyət xadimləri yetirmişdir. Aydın müəllim Şahtaxtı kəndinin keçmişi və tarixi şəxsiyyətlərini gözəl tanıyırdı. Azərbaycanı heyran qoyan məşhur Şahtaxtinskilərdən Məmmədağa Şahtaxtinski, diplomat Behbudbəy Şahtaxtinski, şair-dramaturq Hüseyn Cavid, akademik Əhməd Mahmudov və oftalmoloq, alim, akademik, filosof Zərifə xanım Əliyeva və bir çox görkəmli şəxsiyyətlər haqqında böyük məlumata malik idi. Həyatının ən qaynar çağında qəflətən xəstələnən Aydın müəllim amansız xəstəlik üzündən 17 noyabr 1994-cü ildə dünyasını dəyişdi. Onun vaxtsız ölümü Bədən Tərbiyəsi İnstitutunun rektorluğu, ictimai təşkilatlar, yaşadığı rayonunun Sərxanlı kənd sakinləri, eləcə də, onun qohum və dostları tərəfindən böyük kədər hissi ilə qarşılandı. Mən Aydın müəllim haqqında uzun müddət idi ki, xatirə yazmaq istəyirdim, lakin yaza bilmirdim. Aydın müəllimi xatırlayarkən, foto-albomlar arasında Məşdi müəllimlə Aydın müəllimin birlikdə çəkdirdikləri foto diqqətimi cəlb etdi. 1959-cu ildə tələbəlik dövründə çəkilmiş bu fotoya baxarkən, onun xoş siması gözlərim önündə canlanır. 1972-ci ildə kiçik qardaşım, jurnalist Məmməd Zeynalovun vaxtsız ölümü zamanı, bir neçə il sonra 1988-ci ilin iyun ayının 1-də o zaman sovet ordusunda xidmət edən oğlum Zeynalov Mehracın faciəli surətdə ermənilər tərəfindən Ukrayna torpağında qətlə yetirildiyi vaxt bizim ailəyə təsəlli olmuşdur. Sadə, səmimi olan Aydın müəllim insanlara qarşı olduqca həssas və mülayim keyfiyyətləri ilə seçilirdi. Bu məqamları xatırlatmaqda məqsədim onun istedadlı idmançı olmaqla yanaşı, əsil dost, kişilik nümunəsi olan dəyərlərini vurğulamaqdır.

Bu gözəl insan haqqında qısa da olsa yazdığım xatirəmlə özümdə ağsaqqal hissi duyuram ki, nəhayət, uzun illər qəlbimdə yaşatdığım hissləri kağız üzərinə köçürə bildim.

Allah Aydın İbrahim oğlu Mustafayevə rəhmət eləsin!

Adil Zeynalov,

Naxçıvan MR Kəngərli rayonun

Şahtaxtı kəndinin Müharibə Veteranları

Şurasının sədri

Səs.- 2011.- 23 fevral.- S. 10.