Xalqın istək və arzularını reallaşdıran partiya

YAP Qusar rayon təşkilatının yaranmasının 18 illiyi münasibətilə tədbir keçirildi

Dünən YAP Qusar rayon təşkilatının yaranmasının 18 illiyi ilə əlaqədar tədbir keçirildi. Tədbir iştirakçıları ilk öncə rayon təşkilatının qərargahının foyesindəki Ümummilli Liderimiz Heydər Əliyevin büstünün önünə tər qərənfillər düzdülər. Qərargahın akt zalında keçirilən tədbirdə çıxış edən rayon təşkilatının sədri David İbrahimxəlilov yubiley münasibətilə siyasi həmfikirlərinə səmimi arzularını çatdırdı.

Bildirdi ki, bu gün Azərbaycanın hamını heyrətləndirən iqtisadi inkişafında fəal iştirak edən, birlik, həmrəylik, demokratiya uğrunda mübarizədə mətinləşən, hər zamanın partiyası olduğunu real işi ilə doğruldan YAP-ın cəmiyyətdə möhkəmlənən mövqeyi var. Partiyanın yarandığı o çətin anları xatırlayan, tarixə "91-lər"in xidməti kimi yazılan, ölkənin tanınmış ziyalılarının Ulu Öndərə müraciətini bugünkü xoşbəxt, firavan həyatımız üçün çəkilən zəhmət adlandıran D.İbrahimxəlilov qeyd etdi ki, ermənilər tərəfindən blokadaya alınmış Naxçıvan MR Ali Məclisinin sədri işləsə də, tək muxtar respublikanın sosial-iqtisadi problemlərinin həlli ilə deyil, ümumilikdə, Azərbaycanın müstəqilliyinin əbədi olması naminə tarixi xidmətlər göstərən Ulu Öndər Heydər Əliyevin qətiyyəti ilə yaranan Yeni Azərbaycan Partiyasını təsadüfən milyonların partiyası adlandırmırlar.

YAP-ın xalq tərəfindən daim dəstəkləndiyini qeyd edən D.İbrahimxəlilov Qusar rayon təşkilatının yaranma tarixindən də söz açdı. Bildirdi ki, 14 fevral 1993-cü ildə Qusar rayonunda 17 nəfərdən ibarət yaranan təşkilatın ilk təsis konfransı bir aydan sonra keçirildi. Hazırda 44010 nəfərdən artıq üzvü, 95 yerli özəyi olan Qusar rayon təşkilatı üzvlərinin sayı yarım milyondan çox olan YAP-ın aparıcı rayon təşkilatlarındandır.

Azərbaycanda son illərdə dinamik sürətlə inkişaf edən quruculuq işlərinə, regionların sosial-iqtisadi inkişafı Dövlət Proqramlarında nəzərdə tutulan islahatların, infrastruktur layihələrin uğurla nəticələnməsi, əhalinin məşğulluq səviyyəsinin artırılması, yoxsulluğun aşağı salınması məsələlərinə toxunan D.İbrahimxəlilov bildirdi ki, xalqımız, o cümlədən, qusarlılar Ulu Öndərimiz Heydər Əliyev siyasətinin layiqli davamçısı, Yeni Azərbaycan Partiyasının Sədri, ölkə Prezidenti İlham Əliyev ətrafındı həmişə sıx birləşib: "Ölkədə keçirilən prezident, parlament, bələdiyyə seçkilərində YAP-ın mütləq qələbə qazanması milyonların, seçicilərin Prezident İlham Əliyevə, Onun rəhbərlik etdiyi partiyaya inamından irəli gəlir".

Tədbirdə rayon veteranlar şurasının sədri Cavanşir Nurməmmədov, ADPK-nin tələbəsi Könül Yüzbəyova və başqaları çıxış edərək, Azərbaycanın çiçəklənməsi və inkişafı yolunda Yeni Azərbaycan Partiyasının Sədri, dövlət başçısı İlham Əliyevin uğurlu siyasəti ətrafında daha sıx birləşəcəklərini söylədilər.

Görüşdə Milli Məclisin deputatı Azər Badamov təşkilatın yaranmasının 18-ci ildə böyük uğurlara imza atan Yeni Azərbaycan Partiyasının sıralarının belə sürətlə artdığını vurğuladı.

Tədbirin sonunda bir qrup partiya fəallarına fəxri fərmanlar, qiymətli hədiyyələr təqdim olundu. Həmçinin, partiya sıralarına yeni qəbul olunanlara üzvlük vəsiqələri verildi.

RƏFİQƏ KAMALQIZI

Səs.- 2011.- 19 fevral.- S. 7.