Xocalı soyqırımı Azərbaycan tarixinin ən qanlı səhifəsidir

"Səs" qəzeti növbəti dəfə Xocalı faciəsinin 19-cu ildönümü ilə bağlı dəyirmi masa keçirib

(Əvvəli ötən sayımızda)

"Səs" qəzeti ölkəmizin həyatında mühüm əhəmiyyət kəsb edən, günün aktual və prioritet mövzuları ətrafında silsilə xarakterli dəyirmi masalar təşkil edir. Məhz budəfəki dəyirmi masanın mövzusu Azərbaycan xalqının ən böyük faciələrindən biri olan Xocalı soyqırımının 19-cu ildönümünə həsr olunub. Dəyirmi masada Yeni Azərbaycan Partiyasının Nəsimi rayon təşkilatının sədri, millət vəkili Məlahət İbrahimqızı, "Səs" qəzetinin baş redaktoru Bəhruz Quliyev, Milli Məclisin üzvü Elman Məmmədov, ADPU-nin professoru, tarix elmləri doktoru Əli Məmmədov, Xocalı rayon icra hakimiyyətinin nümayəndəsi Xəlil Vəliyev, Xocalı şəhərinin keçmiş polis rəisi Sabir Məmmədov iştirak edirdi.

Dəyirmi masada giriş sözü ilə çıxış edən Bəhruz Quliyev Prezident Administrasiyasının rəhbəri, akademik Ramiz Mehdiyevin Sərəncamı ilə "Xocalı soyqırımının 19-cu ildönümünün keçirilməsinə dair tədbirlər planı"nın təsdiq edildiyini bildirdi. Qeyd etdi ki, bu tədbirlər planına əsasən soyqırımı qurbanlarının xatirəsinə ucaldılmış abidələrin önünə əklil qoyulması, Xocalı sakinlərinin dünya dövlətlərinə, xalqlarına və beynəlxalq təşkilatlara müraciətinin yayılması, Azərbaycan Respublikasının xarici ölkələrdəki səfirliklərində, nümayəndəliklərində və diaspor təşkilatlarında bu dəhşətli hadisə ilə bağlı mətbuat konfranslarının, anma mərasimlərinin və s. keçirilməsi, xarici KİV və teleradio kanallarında materialların hazırlanması və yayılması nəzərdə tutulub. B.Quliyev Xocalı soyqırımının 19-cu ildönümü ilə bağlı internet məkanında da, müəyyən tarixi faktların yayılmasının zəruriliyini bildirdi.

"Ermənistanda hakimiyyətdə olan əli qana batmış cəlladlar və bu misilsiz cinayətdə günahı olan şəxslər, hələ də, qanun qarşısında cavab verməyiblər"

Məlahət İbrahimqızı:

- 1918-ci ilin mart hadisələri zamanı da Azərbaycan xalqına qarşı soyqırım hadisəsi olduğu halda ölkəyə rəhbərlik edən o dövrün nümayəndələri - prosesləri olduğu kimi, dəyərləndirməyi belə bacarmadılar. Bu gün də Ermənistanda olan şəxslərin hər biri ayrı-ayrılıqda Azərbaycana qarşı böyük qətliamlar törətmiş cinayətkarlardır. Məhz son əsrin əvvəllərindən başlayaraq, Azərbaycan xalqına qarşı edilmiş amansız divanlar həyata keçirilmiş soyqırımı siyasəti nəticədə yanlış yanaşma və prosesləri düzgün qiymətləndirməməsi predmeti olaraq meydana çıxmışdır. Çünki həmin dövrlərdə Azərbaycan dövlətinə güclü liderlər rəhbərlik etməmişdir. 1991-ci ildən SSRİ dağılan ərəfədə, eləcə də, 1992-ci ilin Xocalı soyqırımı ərəfəsində ölkəyə rəhbərlik edə bilməyən rəhbərlərin səriştəsizliyi nəticəsində xalqımız böyük qırğınlara, ağır sosial-iqtisadi çətinliklərə məruz qalmışdır. İnanırıq ki, bütün bu çətinliklərə və əziyyətlərə baxmayaraq, bu gün xalqımız öz inkişafının ən yüksək mərhələsini yaşayır.

Sabir Məmmədov:

- 1992-ci ilin əvvəllərindən Xocalıdakı ağır durum daha da kritikləşmişdi. Amma kənardan prosesləri izləyənlər Xocalıdakı vəziyyətin normal axarında getdiyini iddia edirdilər. Hətta Xocalıda çoxlu sayda silah-sursatın olduğunu da bildirirdilər. Əgər belə bir reallıq vardısa, niyə biz hadisənin canlı şahidləri əliyalın düşmən qarşısına çıxırdıq? Demək olardı ki, fevral ayının əvvəllərindən başlayaraq, ermənilər Xocalını daim atəş altında saxlayırdılar. O dövrlər Xocalıda fəaliyyət göstərən daxili işlər nazirliyinin polis bölməsinin nümayəndələri könüllülərdən ibarət dəstələrə böyük köməkliklər edirdilər. Əhalidən ov tüfənginə qədər yığılması insanları düşmən qarşısında əliyalın qoymuşdu. Dəfələrlə ölkənin ən yüksək dairələrinə silah və hərbi texnika üçün müraciət edilsə də, Xocalıya heç bir yardım edilmədi. Məhz bu köməkliyin edilməməsi nəticəsində Xocalıda böyük insan qırğını ilə müşahidə edilən soyqırımı həyata keçirildi və düşmən ölkəmizin dilbər guşələrindən birini də işğal etmiş oldu.

Xəlil Vəliyev:

- Burada bildirildiyi kimi, Xocalının müdafiəsi üçün heç bir kənar qüvvə iştirak etmirdi. Silah-sursat da əhalidən lap əvvəlcədən yığılmışdı. Xocalı sakinləri əliyalın olsalar belə, ancaq öz qeyrətlərinə, vicdanlarına güvənərək doğmalarının müdafiəsi üçün canlarını fəda etdilər. Bir məsələni də qeyd edim ki, xocalılar həmişə öz ağrıları ilə, itkiləri ilə, bu gün olduğu kimi dövlətimizə və dövlətçiliyimizə sadiq olublar. Bu gün bütün ölkə vətəndaşları kimi xocalılar da Ulu Öndər Heydər Əliyev siyasətinin ən layiqli davamçısı cənab Prezident İlham Əliyevin ətrafında sıx birləşib. İnşallah, böyük ümidlə Qarabağımıza, Xocalımıza qayıdacağımız günü gözləyirik.

Tapdıq Rəfiqə

Səs.- 2011.- 19 fevral.- S. 9.