Regionların inkişafı:
Tərəqqi, dinamika, düşünülmüş
siyasət
"Azərbaycanın hərtərəfli
yüksəlişi elə olmalıdır ki, təkcə
ölkəmizin paytaxtı yox, bütün
şəhərlər, bütün rayonlar inkişaf etsin."
Dövlət başçısı İlham Əliyevin
vaxtilə söylədiyi proqram xarakterli bu tezis bugünün
reallıqlarında öz əksini tapıb. Azərbaycanın
hərtərəfli inkişafında vacib amil kimi önə
çəkilən regionların sosial-iqtisadi inkişafına
dair dövlət proqramlarının uğurlu icrası
nəticəsində iqtisadiyyatın
şaxələndirilməsi yüksək səviyyədə
təmin olunub.
Prezident İlham Əliyev əminliklə bildirir ki, bu
gün Azərbaycan həm siyasi, həm iqtisadi
cəhətdən müstəqil, azad, öz resurslarına
güvənən ölkədir. İqtisadi potensialın
gücləndirilməsinə yönəldilmiş addımlar,
eyni zamanda, Azərbaycanın müstəqilliyini
möhkəmləndirən amillərdir.
Azərbaycanın hazırda istənilən böyük
maliyyə resursları tələb edən layihələri
öz gücü hesabına icra etmək imkanının
olması da bugünkü uğurlara, inkişafa əsaslanır.
İqtisadiyyatın
şaxələndirilməsi prioritet məsələ kimi
qarşıya qoyuldu. Tarixən neft ölkəsi kimi
tanınan, hazırda böyük neft-qaz
ixracatçısına çevrilən, dünyanın enerji
təhlükəsizliyinin təminatında mühüm rol
oynayan Azərbaycanın neft-qaz sektorunda qazandığı
uğurlar göz qabağındadır. Hər bir layihənin
təşəbbüsçüsü kimi
çıxış edən ölkəmiz onun reallığa
çevrilməsinə nail olmaqla daha əhəmiyyətli
layihələri gündəmə gətirir. BTC və BTƏ
neft-qaz kəmərlərinin ardınca, dünyaya
açılan üçüncü qapı kimi dəyərləndirilən
Bakı-Tbilisi-Qars dəmir yolunun reallığa
çevrilməsi istiqamətində addımların
atılması da Azərbaycan dövlətinin siyasi
iradəsinin nəticəsidir. Maliyyə imkanları
genişləndikcə yeni layihələrin icrası
sürətlənir. Bu da ondan irəli gəlir ki, neft-qaz
gəlirlərinin idarə olunmasında şəffaflıq
yüksək səviyyədə təmin edilir. Bu vəsait
mühüm sosial-iqtisadi layihələrin həyata keçirilməsinə
zəmin yaradır. Ötən ilin sonunda istifadəyə
verilən Oğuz-Qəbələ-Bakı su kəməri
də Dövlət Neft Fondunun vəsaitləri hesabına gerçəkliyə
çevrildi. Dövlət
başçısı İlham Əliyev bildirir ki,
əgər vaxtilə Azərbaycanda uğurlu neft siyasəti
aparılmasaydı, bu layihə elə layihə kimi
qalacaqdı. Ölkə Prezidenti bu layihənin Dövlət
Neft Fondunun vəsaiti ilə həyata keçirilməsinin
rəmzi xarakter daşıdığını bununla
əsaslandırır: "Neft hasilatından,
Bakı-Tbilisi-Ceyhan neft kəmərinin istismarından
əldə edilmiş gəlirlər
Oğuz-Qəbələ-Bakı su kəmərinin
tikintisinə yönəldilmişdir." Bu kimi bir-birindən
əhəmiyyətli layihələrin icrası
davamlılığı ilə diqqəti çəkir.
Son illər
artan iqtisadiyyat, gündən-günə abadlaşan,
müasirləşən paytaxt və bölgələrimiz,
yeniləşən infrastruktur Azərbaycanın
reallıqlarıdır. Uğurla həyata keçirilən
infrastruktur layihələri ölkəmizin bundan sonra da
uğurlu inkişafına əsas yaradır. Nazirlər
Kabinetinin 2010-cu ilin sosial-iqtisadi inkişafının
yekunlarına və 2011-ci ildə qarşıda duran
vəzifələrə həsr olunmuş iclasında
dövlət başçısı İlham Əliyev
sosial-iqtisadi inkişafı xarakterizə edən
rəqəmləri diqqətə çatıraraq, bu uğurların
fonunda belə bir əminliyi də ifadə etmişdir ki,
2011-ci il də ölkəmizin hərtərəfli
inkişafı üçün uğurlu il olacaq. "Buna nail olmaq üçün hamımız
yaxşı işləməliyik, fəal
işləməliyik ki, ölkəmizi daha da
gücləndirək, Azərbaycanı inamla irəliyə
aparaq." Bunun üçün qarşıda dayanan
həllivacib məsələlər diqqətə
çatdırıldı. Sahibkarlığın
inkişafına mane olan neqativ halların aradan
qaldırılması aidiyyəti qurumların
qarşısına mühüm vəzifə kimi qoyuldu:
istehlak bazarına nəzarət gücləndirilməli,
qiymətlərin süni şəkildə
şişirdilməsinə yol verilməməli, azad
rəqabət təmin edilməli, inhisarçılıq
meyillərinin qarşısı alınmalı, lazımsız
yoxlamalar aparılmamalıdır. Təbii ki, bu
məsələlərin həlli ölkədə
sahibkarlığın daha sürətlə inkişafına
stimul verəcək.
Ümumi
daxili məhsulun formalaşmasında kiçik və orta
sahibkarlığın xüsusi yerinin olması
inkaredilməzdir. Qeyri-neft sektorunun inkişafını neft
siyasətinin məntiqi davamı kimi
dəyərləndirən dövlət
başçısı İlham Əliyev bu sahənin
inkişafını daim diqqətdə saxlayır.
Sahibkarlara dövlət büdcəsindən
ayrılan subsidiya və güzəştli kreditlərin
həcminin ildən-ilə artırılması, onların
fəaliyyətinə əngəl olan yersiz
müdaxilələrin aradan qaldırılması, antiinhisar
və korrupsiyaya qarşı mübarizə tədbirlərinin
gücləndirilməsi, biznes subyektlərinin
qeydiyyatının sadələşdirilərək
"bir pəncərə" prinsipi əsasında
aparılması, azad iqtisadi zonaların yaradılmasını
nəzərdə tutan xüsusi qanunun qəbulu və digər
tədbirlər iş adamları tərəfindən
böyük rəğbətlə qarşılanır. 2010-cu
ildə Sahibkarlığa Kömək Milli Fondu
tərəfindən sahibkarlara 115 milyon manat kredit
verilmişdir. Bu gün ÜDM-də özəl
bölmənin payının 85,5 faiz təşkil etməsi bu
sahəyə diqqətin bariz nümunəsidir. Prezident
İlham Əliyev dövlət qurumlarının
qarşısında bunu mühüm vəzifə kimi qoyur-
sahibkarlığın inkişafına kömək
göstərməli, dövlətin iş adamlarına
maddi-mənəvi, hüquqi dəstəyi artırmalı,
onlara maneçilik törədən hallara qarşı
mübarizə tədbirləri gücləndirilməli,
süni maneələr
yığışdırılmalıdır.
Ölkəmizdə sahibkarlığın inkişafı
istiqamətində atılan addımlar, imzalanan fərman
və sərəncamlar sistemli və ardıcıl
fəaliyyət konsepsiyasına əsaslanır. 1993-1995-ci
illəri əhatə edən "Azərbaycanda
Sahibkarlığın İnkişafı" Dövlət
Proqramının ardınca "Azərbaycanda kiçik və
orta sahibkarlığa Dövlət
Yardımı Proqramı", "Azərbaycan
Respublikasında kiçik və orta sahibkarlığın
inkişafının Dövlət Proqramı",
"Yoxsulluğun azaldılması və iqtisadi inkişaf
üzrə Dövlət Proqramı (2003-2005-ci illər)",
"Regionların sosial-iqtisadi inkişafı Dövlət Proqramı
(2004-2008-ci illər)" uğurla həyata keçirildi.
Hazırda isə "Azərbaycan
Respublikasının Məşğulluq Strategiyası"
(2006-2015-ci illər), "Azərbaycan Respublikası
regionlarının 2009-2013-cü illərdə sosial-iqtisadi
inkişafı Dövlət Proqramı", "2008-2015-ci illərdə
Azərbaycan Respublikasında yoxsulluğun azaldılması
və davamlı inkişaf Dövlət Proqramı",
"2008-2015-ci illərdə Azərbaycan Respublikasında
əhalinin ərzaq məhsulları ilə etibarlı
təminatına dair Dövlət Proqramı" və
digər vacib sənədlər icra olunur.
Son illər
ölkə iqtisadiyyatına qoyulan investisiyalarda daxili
investisiyaların çəkisi artır. 2010-cu ildə
ölkə iqtisadiyyatına 15,5 milyard dollar vəsait qoyulub. Bu
vəsaitin 9,3 milyard dolları qeyri-neft sektorunun payına
düşür.
Neft-qaz gəlirlərinə nəzarət
gücləndirilir. 2004-cü ildə Prezident İlham
Əliyevin Fərmanı ilə təsdiq edilmiş "Neft
və qaz gəlirlərinin idarə olunması üzrə
uzunmüddətli strategiyanın (2005-2025-ci illər)"
uğurlu icrası əldə olunan müsbət
nəticələrin davamlılığının təmin
edilməsində əhəmiyyətli rol oynayır.
Prezident İlham Əliyevin rəhbərliyi ilə
uğurla həyata keçirilən sosial-iqtisadi siyasət
nəticəsində iqtisadiyyatımızın bugünkü
vəziyyəti artıq inkişaf proqramlarının əsas
məqsədlərinə nail olunduğunu və keçid
dövrünün başa çatdığını
təsdiq edir. Bütün bunlar göstərir ki,
ölkəmizin iqtisadi inkişafı yeni keyfiyyət
mərhələsinə daxil olub. Yeni
mərhələnin əsas məqsədi, milli
iqtisadiyyatın rəqabət qabiliyyətliliyinin
yüksəldilməsinə və dünya iqtisadi sisteminə
səmərəli inteqrasiyasına nail olmaqla,
uzunmüddətli perspektivə ölkədə dinamik
sosial-iqtisadi inkişafın davamlılığını
təmin etməkdən ibarətdir. Prezident
İlham Əliyevin imzaladığı fərmanlarda,
təsdiq etdiyi iqtisadi siyasət sənədlərində bu
məqsədin gerçəkləşməsi
üçün yerinə yetirilməsi zəruri olan
vəzifələr müəyyənləşdirilib.
Ölkənin malik olduğu iqtisadi potensialın
gücləndirilməsi, qeyri-neft sektorunun inkişaf
etdirilməsi, hər bir regionun malik
olduğu potensialdan tam və səmərəli istifadə
olunması, yeni iş yerlərinin açılmasına
şərait yaradılması, sahibkarlığın
inkişaf etdirilməsi, sosial xidmətlərin həcminin,
keyfiyyətinin və ünvanlılığının
əhəmiyyətli dərəcədə
artırılması, yoxsulluğun azaldılması
mühüm prioritetlərdir.
Dövlət
başçısı İlham Əliyevin regionlara hər bir
səfəri bir sıra obyektlərin
açılışı və təməlqoyma
mərasimlərinin keçirilməsi ilə yadda qalırsa,
bu dinamikanın özü düşünülmüş siyasətin
uğurlu nəticəsidir. Bu günlərdə
qərb bölgəsinə səfəri zamanı
ictimaiyyət nümayəndələri ilə
görüşən Prezident İlham Əliyev dünyada
iqtisadi və maliyyə böhranının davam
etməsinə baxmayaraq, Azərbaycanın iqtisadi inkişaf
baxımından yenə də beynəlxalq aləmin diqqət
mərkəzində olduğunu bildirdi. Ölkəmizin
sosial-iqtisadi göstəriciləri beynəlxalq maliyyə
qurumlarının hesabatlarında da öz əksini tapır.
Bu uğurları şərtləndirən amillər qeyd
olunarkən, ölkəmizdə neft-qaz hasilatının
ildən-ilə artması xüsusi önə çəkilir.
Bildirilir ki, zəngin təbii resurslara və 30
milyard dollar həcmində valyutaya, etibarlı maliyyə
mənbələrinə malik olan Azərbaycan bu ehtiyatlardan
səmərəli istifadə etməklə həm iqtisadi
qüdrətini artırır, həm də maliyyə
imkanlarını genişləndirməklə mühüm sosial
layihələrin həyata
keçirilməsinə nail olur. Əhalinin pul
gəlirlərinin ötən il 12,3 faiz artması, yoxsulluq
səviyyəsinin 9,1 faizə enməsi, 70 mindən çox
yeni iş yerinin açılması bir daha təsdiqləyir
ki, həyata keçirilən iqtisadi islahatların
əsasında əhalinin sosial müafiəsinin
gücləndirilməsi dayanır. Ümumilikdə
isə son 7 ildə 900 mindən artıq yeni iş yeri
açılıb. Bu da işsizlik və məşğulluq
problemlərinin həllinə öz müsbət təsirini
göstərir.
Bu günlərdə dövlət
başçısı İlham Əliyevin
tapşırığı əsasında Prezident
Administrasiyasının rəhbəri Ramiz Mehdiyevin sədrliyi
ilə Korrupsiyaya qarşı Mübarizə üzrə
Komissiyanın geniş iclası keçirildi. 2010-cu ildə
komissiyanın fəaliyyətinin yekunları və Nazirlər
Kabinetinin son iclasında Prezident İlham Əliyevin
nitqindən irəli gələn
vəzifələrə həsr olunmuş toplantıda Prezident
Administrasiyasının məsul əməkdaşları,
mərkəzi icra hakimiyyəti, hüquq-mühafizə və
digər dövlət orqanlarının, təhsil
müəssisələrinin rəhbərləri, Bakı
şəhəri və paytaxt rayonlarının icra
hakimiyyəti başçıları iştirak
etmişlər. Korrupsiyaya qarşı Mübarizə
üzrə Komissiyanın sədri Ramiz Mehdiyev
görülən işlər və qarşıda duran
vəzifələr haqqında məruzə ilə
çıxış etmişdir. Prezident
İlham Əliyevin rəhbərliyi ilə həyata
keçirilən iqtisadi siyasət və aparılan islahatlar
nəticəsində Azərbaycanın ötən il də
sosial-iqtisadi sahədə mühüm uğurlar
qazandığını, nəzərdə tutulan bütün
proqramların icra olunduğunu qeyd edən R.Mehdiyev toplantı
iştirakçılarının və komissiya
üzvlərinin diqqətini Nazirlər Kabinetinin iclasında
dövlət başçısının
vurğuladığı nöqsan və
çatışmazlıqlara yönəltmişdir. Toplantıda sahibkarlığın inkişafı
üçün daha əlverişli şəraitin
yaradılması, əsassız yoxlamalara son qoyulması,
rüşvətxorluğa və korrupsiyaya qarşı
mübarizənin səmərəliliyinin artırılması
ilə bağlı bir çox fikir və
mülahizələr səslənmiş, bəzi qanunlara
əlavə və dəyişikliklərin edilməsi
təklif olunmuş, aidiyyəti dövlət
orqanlarının rəhbərlərinə konkret
tapşırıqlar verilmişdir. Son
günlər idarə və təşkilatlarda
keçirilən iclaslarda ictimai rəyin ifadəsi kimi
səslənən fikirlər, korrupsiyaya qarşı
mübarizənin gücləndirilməsini
təsdiqləyən tədbirlər göstərir ki,
şəffaflıq və ədalət prinisplərinin
qorunması kimi demokratik tələblər dövlət
siyasətinin prioritetləri olmaqla dövrun reallıqlarına
uyğundur.
Bütün bunlar bir daha təsdiqləyir ki,
demokratik, hüquqi dövlət quruculuğu yolunu tutan
Azərbaycan dövləti hərtərəfli inkişafı
təmin etmək üçün zəruri addımların
atılmasında, vətəndaş rəylərini əsas
tutan islahatların insanların sosial müdafiəsinin
iqtisadi inkişafın tempinə uyğun
tənzimlənməsində, tələblə təklifin
tarazlaşdırılmasında maraqlıdır və bu
istiqamətdə ciddi səylər göstərir. Dövlət başçısı İlham
Əliyev bildirir ki, qarşıya qoyulan vəzifələrin
icrasına nail olsaq, Azərbaycan iqtisadiyyatı daha
sürətlə inkişaf edəcək, ümumi daxili
məhsul artacaq, vergilərdən daha çox vəsait daxil
olacaq və bunun nəticəsində Dövlət Neft Fondundan
büdcəyə ayırmalar azalacaq. Biz elə
etməliyik ki, Neft Fondundan transferlər yalnız və
yalnız investisiya yönümlü layihələrə
sərf olunsun.
Həyata keçirilən bu islahatların
məqsədi, məramı budur ki, dünya birliyində iqtisadi,
siyasi, demokratik islahatları ilə diqqətçəkən,
regionun lider dövləti kimi səviyyəsini qoruyan
Azərbaycanın sabahı bu günündən daha
möhtəşəm, daha qüdrətli olsun.
Səs.- 2011.- 19 fevral.- S. 12.