Xocalı XX əsrin ən qanlı faciəsidir

Yeni Azərbaycan Partiyasının Kürdəmir rayon təşkilatında Xocalı soyqırımına aid tədbir keçirildi

Dünən Yeni Azərbaycan Partiyası Kürdəmir rayon təşkilatının qərargahında Xocalı soyqırımının 19-cu ildönümünə həsr olunmuş anım tədbiri keçirilib. YAP Kürdəmir rayon təşkilatının həyata keçirdiyi silsilə tədbirlərin davamı olan həmin tədbirdə partiya fəalları, gənclər, ziyalılar, ağsaqqallar, ictimai təşkilatların nümayəndələri iştirak edib. İlk öncə tədbir iştirakçıları torpaqlarımızın və ərazi bütövlüyümüzün qorunması uğrunda canlarından keçmiş şəhidlərimizin, Xocalı soyqırımı qurbanlarının ruhunu bir dəqiqəlik sükutla yad ediblər. YAP Kürdəmir rayon təşkilatının sədri Ağali Kərimli Xocalı soyqırımı haqqında tədbir iştirakçılarına məlumat verərək, ermənilərin zaman-zaman Azərbaycan xalqının başına açdığı müsibətlərdən, 19 il əvvəl ermənilərin Xocalıda törətdikləri vəhşiliklərdən danışdı. O, 200 il ərzində erməni millətçi şovinistləri tərəfindən davamlı olaraq azərbaycanlıların soyqırımı siyasətinə, etnik təmizləmə prinsiplərinə məruz qaldığını, XX əsrin sonunda baş vermiş Xocalı faciəsinin təkcə Azərbaycan xalqına deyil, insanlığa, bəşəriyyətə qarşı yönəlmiş ən ağır cinayətlərdən biri olduğunu bildirdi. A.Kərimli siyasi - hüquqi qiyməti Ümummilli Lider Heydər Əliyev tərəfindən verilmiş bu faciə haqqında əsil həqiqətlərin bütün dünyaya çatdırılması, dünya dövlətləri və beynəlxalq təşkilatlar tərəfindən faciənin soyqırımı kimi tanınması istiqamətində ölkə Prezidenti cənab İlham Əliyevin həyata keçirdiyi uğurlu siyasətdən də bəhs etdi. Bu siyasətin uğuru nəticəsində beynəlxalq miqyasda Xocalı soyqırımı haqqında obyektiv fikrin formalaşdığını qeyd edən təşkilat sədri işğal olunmuş ərazilərimizin düşməndən azad olunacağı günün heç də uzaqda olmadığın bildirdi. Tədbirdə, həmçinin, Xocalı soyqırımının şahidi olmuş rayon Ağsaqqallar Şurasının sədr müavini Vaqif Hacıyev, YAP-ın gənc üzvü Məhəmməd Heydərli, rayon ziyalıları adından çıxış edən Oktay Babayev Xocalı faciəsinin XX əsrin ən dəhşətli faciələrindən, bəşər tarixində ən qanlı olaylardan biri olduğunu qeyd etdilər. Onlar Xocalı faciəsinin mövcud beynəlxalq hüquq normalarına görə birmənalı şəkildə soyqırım kimi qəbul edilməli olduğu halda, hələ də bu vəhşiliyin BMT, ATƏT, Avropa Şurası, Avropa Birliyi kimi nüfuzlu beynəlxalq təşkilatlar, eləcə də dünyanın aparıcı dövlətləri tərəfindən lazımi qiymətin verilmədiyini diqqətə çatdırdılar. Çıxışçılar, eyni zamanda, ölkə Prezidenti cənab İlham Əliyevin rəhbərliyi ilə Azərbaycan dövlətinin apardığı haqq işinin qalib gələcəyini, beynəlxalq təşkilatların, dünya dövlətlərinin ermənilərin vəhşiliyinə siyasi qiymət verəcəyini, erməni faşistlərinin beynəlxalq məhkəmə qarşısında cavab verəcəyinə əmin olduqlarını vurğuladılar.

Tapdıq Qurbanlı

Səs.- 2011.- 24 yanvar.- S. 12.