Xalqın istək və arzularını, yekdil iradəsini əks etdirən partiya

YAP Yasamal rayon təşkilatının yaranmasının 18 illiyi münasibətilə yubiley mərasimi keçirildi

Ümummilli Lider Heydər Əliyevin adı ilə bağlı olan, Ulu Öndərin rəhbərliyi ilə Azərbaycan xalqının milli maraqlarının, dövlətçilik ənənələrinin qorunmasında mütəşəkkil siyasi qüvvə kimi iştirak edən Yeni Azərbaycan Partiyası Yasamal rayon təşkilatının yaranmasından 18 il ötür. Rayon təşkilatının sədri, YAP Siyasi Şurasının üzvü Fikrət İsmayılov çıxış edərək, öncə partiyanın yaranma tarixi ilə bağlı fikirlərini bildirdi.

YAP-ın yaradılmasının o dövrün tələbi olduğunu deyən F.İsmayılov qeyd etdi ki, Ulu Öndər Heydər Əliyevin rəhbərliyi ilə yeni siyasi qüvvənin formalaşması zərurətə çevrilmişdi: "YAP qısa müddətdə təşkilatlanaraq ölkənin ən mütəşəkkil siyasi qüvvəsinə çevrildi. 1990-cı illərin əvvəlində hakimiyyətdə olanların səriştəsiz siyasəti nəticəsində Azərbaycan uçuruma sürüklənirdi. Ölkəmizdə iqtisadi-siyasi böhran dərinləşirdi, xalqın həyat səviyyəsi pisləşirdi. Eyni zamanda, Ermənistan bir-birinin ardınca ərazilərimizi işğal edirdi. Belə bir şəraitdə insanların sabaha inamları qalmamışdı. Cəmiyyətdə belə bir rəy formalaşmışdı ki, Azərbaycanı yalnız bu bəladan Ümummilli Lider Heydər Əliyev xilas edə bilər. Ona görə də, ölkəmizin nüfuzlu 91 ziyalısı Ulu Öndər Heydər Əliyevə müraciət etdilər".

F.İsmayılov onu da vurğuladı ki, YAP-ın Azərbaycan, xalq üçün gördüyü işlərin çəkisini, sanbalını, nüfuzunu dərk etmək üçün 1990-cı ilin əvvəllərində ölkədə baş verən hadisələri, siyasi oyunları, daxili və xarici çəkişmələr labirintində çaşıb qalan xalqa müstəqilliyin sevincini bəxş edən Ulu Öndərin fədakarlığını xatırlatmaq yerinə düşər. İstər Moskvada, istərsə də, Bakıda ermənipərəst və siyasi cəhətdən sabatsız, vəzifəpərəstlər tərəfindən edilən təzyiqlərə baxmayaraq, dəfələrlə qeyd etdiyi kimi, bütün ömrünü xalqının azadlığı və Azərbaycanın qüdrətlənməsi naminə sərf edən Ümummilli Lider Heydər Əliyevin tarixi xidmətlərindən biri də YAP kimi qüdrətli bir partiyanı yaratması, onu istiqamətləndirməsi oldu. O, çətin zamanlarda üzərinə götürdüyü məsuliyyətin ağırlığına baxmayaraq, daim xalqa güvənən Ulu Öndər insanların istəyinə uyğun partiyanı yaratmaqla, Azərbycanın gələcəyini, süverenliyini düşünmüş, xalqın azad, firavan yaşayışının təminatı üçün əlindən gələni əsirgəməmiş, saf əqidəli, vətəninə sədaqətli insanları ətrafına toplamaqla bütün çətinliklərin öhdəsindən ləyaqətlə gələ bildi.

YAP-nın xalq tərəfindən daim dəstəkləndiyini qeyd edən F.İsmayılov başçılıq etdiyi Yasamal rayon təşkilatının yaranma tarixindən də söz açdı. Bildirdi ki, 9 yanvar 1993-cü ildə Yasamal rayonunuda 17 nəfərdən ibarət yaranan təşkilatın ilk təsis konfransı 20 fevralda keçirildi. Hazırda Yasamal rayon təşkilatının 25 mindən artıq üzvü, 152 yerli özək təşkilatı var.

Azərbaycanda son illərdə dinamik sürətlə inkişaf edən quruculuq işlərinə, regionların sosial- iqtisdi inkişafı dövlət proqramlarında nəzərdə tutulan islahatların, infrastruktur layihələrin uğurla nəticələnməsi, əhalinin məşğulluq səviyyəsinin artırılması, yoxsulluğun aşağı salınması məsələlərinə toxunan F.İsmayılov bildirdi ki, Ulu Öndərin siyasətinə sadiq qalan Yeni Azərbaycan Partiyasının Sədri, ölkə Prezidenti İlham Əliyev bütün sahələrdə Heydər Əliyev ideyalarının həyata keçirilməsinə çalışır. YAP-a rəhbərliyə başladığı vaxtdan partiyadakı sağlam mühiti daha da saflaşdıran cənab İlham Əliyev siyasi hazırlıqlı, cəmiyyətin ictimai-siyasi həyatında daha fəal iştirak edən partiya üzvlərinə arxalanır. Ölkədə keçirilən prezident, parlament, bələdiyyə seçkilərində YAP-ın mütləq qələbə qazanması milyonların, seçicilərin Prezident İlham Əliyevə, Onun başçılıq etdiyi partiyaya inamından irəli gəlir.

Çıxış edən YAP İdarə Heyətinin üzvü, BDU-nun rektoru, millət vəkili Abel Məhərrəmov bildirdi ki, Azərbaycanın ağır günlərində yaranmış YAP üzərinə götürdüyü missiyanı şərəflə yerinə yetirdi. Onun sözlərinə görə, Ulu Öndər Heydər Əliyevin qurucusu olduğu partiya hüquqi, demokratik dövlət quruculuğuna öz töhfələrini verib: "Xoşbəxt o xalqdır ki, onun Ümummilli Lideri var. Çünki lider xalqı daim irəli aparır. Azərbaycan xalqı da Ulu Öndər Heydər Əliyevin müəyyənləşdirdiyi siyasət nəticəsində inkişaf və tərəqqi yolundadır. Bu gün Prezident İlham Əliyev bu siyasəti uğurla davam etdirir".

A.Məhərrəmov ötən 18 il ərzində YAP Yasamal rayon təşkilatının da səmərəli fəaliyyət göstərdiyini qeyd etdi. O, vurğuladı ki, rəhbərlik etdiyi BDU-da 18 min 500 tələbə, 4500 professor-müəllim heyəti var. Onların 4 minə qədəri YAP üzvləridir. Azərbaycanın təhsilinin inkişafına da toxunan millət vəkili bu sahədə uğurların çox olduğunu söylədi. A.Məhərrəmov dövlət başçısının elm və təhsilin inkişafı ilə bağlı bir sıra sərəncamlar verdiyini xatırladıb.

YAP Siyasi Şurasının üzvü Xeyrəddin Qoca, Azərbaycan İctimai-Siyasi Universitetinin rektoru Rasim Nəbiyev çıxış edərək, Yasamal rayon təşkilatının YAP-ın nümunəvi yerli strukturlarından biri olduğunu vurğulayıblar. Çıxışlarda qeyd olunub ki, hazırda cənab İlham Əliyevin rəhbərliyi ilə Yeni Azərbaycan Partiyası uğurla fəaliyyət göstərir və regionun ən güclü siyasi qüvvəsinə çevrilib.

Tədbirdə, həmçinin, YAP sıralarına yeni qoşulmuş şəxsələrə partiya vəsiqələri təqdim edilib.

RƏFİQƏ KAMALQIZI

Səs.- 2011.- 22 fevral.- S. 6.