Hərbi variant götür-qoy edilir

Aydın Mirzəzadə: "Müharibənin başlayacağı təqdirdə, beynəlxalq güclərin də Azərbaycanın tərəfində olacağını gözləmək olar"

- Aydın müəllim, Dağlıq Qarabağ münaqişəsinin həlli istiqamətində Ermənistanın qeyri-konstruktiv mövqe sərgiləməsi Azərbaycanı konkret hərbi variant üzərində düşünməyə vadar edə bilərmi?

- Belə problemin həlli istiqamətində bütün variantlardan, o cümlədən, hərb variantından istifadə olunur. Bu gün Dağlıq Qarabağ münaqişəsinin həll olunması üçün hər iki variant gündəlikdədir. Yəni, istənilən an o variantlar işə düşə bilər. Bununla belə, Ermənistan bütün hallarda Azərbaycanın təzyiqini öz üzərində hiss edir. Azərbaycan Ermənistanla sərhədləri bağlayıb və Ermənistanı regiondakı bütün layihələrdən kənarda qoyub. Eyni zamanda, Azərbaycan Ermənistana 1 sm belə torpağını güzəştə getmək fikrində deyil. Bu baxımdan, Ermənistanın qeyri-konstruktiv siyasəti Dağlıq Qarabağ münaqişəsinin həllini uzatsa da, burada bunun daha böyük zərbəsi işğalçı Ermənistanın üzərində durur. İlk növbədə, Ermənistan əhalisi durmadan ölkəni tərk edir. İşğalçı ölkə müəyyən müddətdən sonra əhalisiz bir əraziyə çevriləcəkdir. İkinci tərəfdən isə, bu gün beynəlxalq təşkilatların sənədlərində və xarici ölkələrin rəsmi dairələrində Azərbaycanın mövqeyi qəbul edilir. Bildiyiniz kimi, son vaxtlarda yeni bir hal meydana çıxıb ki, xarici dövlətlər öz vətəndaşlarına tövsiyə edirlər ki, Ermənistan tərəfindən işğal olunmuş Azərbaycan ərazilərinə səfər etməsinlər. Yəni, bunun özü göstərir ki, Azərbaycanın apardığı siyasət dünya ölkələri tərəfindən qəbul edilir.

- Sizcə, müharibə başlayarsa, beynəlxalq güclərin buna reaksiyası necə ola bilər?

- Əlbəttə ki, bütün bunların hamısı Azərbaycan tərəfindən götür-qoy edilir. Sadəcə olaraq, hərbi variant döyüşə başlamaq əmri deyil. Əgər bu gün beynəlxalq aləm Azərbaycanın ərazi bütövlüyünü tanıyırsa və vətəndaşlarına oraya səfər etməməyi tövsiyə edirsə, onda müharibənin başlayacağı təqdirdə, beynəlxalq güclərin də Azərbaycanın tərəfində olacağını gözləmək olar.

- Ermənistanla Rusiya arasında hərbi əməkdaşlığa dair imzalanan müqavilə Azərbaycanın apardığı müharibənin sərhədlərinin Yerevana qədər davam etməsinin qarşısını ala bilərmi?

- Bizim Ermənistan torpaqlarında gözümüz yoxdur. Sadəcə olaraq, tələbimiz Ermənistanın işğal etdiyi Azərbaycan torpaqlarını azad etməsidir. Burada Rusiya ilə Ermənistan arasında bağlanan müqavilədə, söhbət Ermənistan ərazisinə təcavüz olması faktından gedir. Əgər Azərbaycan işğalçı ölkənin torpağına təcavüz etməyəcəksə, əlbəttə ki, həmin müqavilənin də işə düşməsi qeyri-mümkün olacaqdır.

GÜLYANƏ

Səs.- 2011.- 26 fevral.- S. 5.