Xocalı soyqırımı bəşəriyyətə qarşı törədilmiş cinayətdir

Gəncə Şəhər İcra Hakimiyyəti və YAP Gəncə şəhər təşkilatı soyqırımın 19-cu ildönümü ilə əlaqədar silsilə tədbirlər keçirib

Gəncə Şəhər İcra Hakimiyyəti YAP Gəncə şəhər təşkilatı ilə birgə, ənənəvi olaraq, Xocalı soyqırımının 19-cu ildönümü ilə əlaqədar silsilə anım tədbirlərinin həyata keçirilməsi davam etdirilir. Bu tədbirlər sırasında Heydər Əliyev Universitetində seminarlar, dəyirmi masalar, əbədi-bədii kompozisiyalar geniş yer tutur. "Xocalı soyqırımı bütün bəşəriyyətə qarşı törədilmiş tarixi bir cinayətdir" mövzusunda reallaşan belə tədbirlərdən biri də dünən YAP Gəncə şəhər təşkilatının qərargahında keçirildi. Tədbirdə şəhər təşkilatının idarə heyəti və şura üzvləri, ziyalılar, ictimaiyyət nümayəndələri və gənc fəallar iştirak etmişlər. Tədbirdən əvvəl şəhər 23 saylı orta məktəb şagirdlərinin hazırladığı "Qanlı örpək" adlı ədəbi-bədii kompozisiyası nümayiş olunmuşdur. Sonra tədbirin rəsmi hissəsi başlamışdır. Tədbiri şəhər təşkilatının sədri, professor İsrafil İsmayılov açmış və Xocalı qurbanlarının, eləcə də, Vətənimizin müstəqilliyi uğrunda şəhid olanların ruhu bir dəqiqəlik sükutla yad edilmişdir. İ.İsrafilov sözünə davam edərək bildirmişdir ki, Xocalı faciəsinin beynəlxalq cinayət kimi qiymətləndirilməsi üçün hüquqi əsaslar və sənədlər vardır.

Bunlar BMT Baş Məclisinin 9 dekabr 1948-ci il tarixli qətnaməsi ilə qəbul edilmiş soyqırımı cinayətinin qarşısının alınması və cəzalandırılması Konvensiyası, Nürenberq Hərbi Tribunalının, Yuqoslaviya Beynəlxalq Cinayət Tribunalının, Azərbaycan Respublikasının Cinayət Məcəlləsi və Azərbaycan Respublikası Prezidentinin "Azərbaycanlıların soyqırımı haqqında" 26 mart 1998-ci il tarixli Fərmanından ibarətdir:"Beynəlxalq hüquqa görə, soyqırımı sülh və bəşəriyyət əleyhinə yönələn əməldir və ən ağır beynəlxalq cinayət sayılır. Bu işğalçı ölkənin terrorçuluq siyasəti uzun illərdir dünya ictimaiyyətinin gözü qarşısında baş verir. Halbuki beynəlxalq hüquq normalarına, BMT və ATƏT-in prinsiplərinə görə, dövlətin sərhədlərinin toxunulmazlığına hörmət edilməlidir. Ərazi bütövlüyünün və suverenliyin pozulması yolverilməzdir. BMT Təhlükəsizlik Şurası Azərbaycanın işğal olunan torpaqlarının qeyd-şərtsiz azad olunması haqqında qəbul etdiyi 1993-cü il 822, 853, 874 və 884 nömrəli qərarları ilə Ernənistanı təcavüzkarlığa məhkum edib, Azərbaycan torpaqlarından dərhal çıxmasını tələb etsə də, bu qərarların həyata keçməsi üçün ciddi tədbir görülməmişdir". Daha sonra xatırladıldı ki, "Xocalıya ədalət" kampaniyasına 2009-cu ilin fevralında start verilib və hazırda 30-dan artıq ölkədə yüzlərlə könüllünün iştirakı ilə davam etdirilməkdədir.

Xocalı soyqırımının adı İsveçdə yaradılmış və virtual aləmdə geniş vüsət almış mükəmməl "Beynəlxalq müharibə qurbanları memorialı" arxiv layihəsinə daxil edilib və Xocalı soyqırımının adı Srebrenitsa, Xolokost kimi başqa yerlərdə törədilmiş soyqırımları və qətliamlarla bir sırada çəkilir. Xocalı faciəsini beynəlxalq aləmdə tanıtmaq istiqamətində Yeni Azərbaycan Partiyası da ötən illər ərzində genişmiqyaslı fəaliyyət göstərmişdir. Partiya ATƏT, AŞ, BMT kimi beynəlxalq qurumlara ünvanladığı müraciət, məktub və sənədlərdə Xocalı faciəsinə birmənalı yanaşmamağı və hadisəyə "soyqırımı" adı verilməsini tələb etmiş, dünya ölkələrini faciəyə münasibət bildirməyə çağırmışdır. Tədbirin sonunda tədbir iştirakçıları tərəfindən beynəlxalq ictimai təşkilatlara müraciət qəbul olundu.

RÖVŞƏN RƏSULOV

Səs.- 2011.- 26 fevral.- S. 8.