Xocalı soyqırımının
19-cu ildönümü Qazaxda
da anılıb
Dünən Qazax rayon icra hakimiyyətində Prezident Administrasiyasının rəhbəri, akademik Ramiz Mehdiyevin "Xocalı soyqırımının on doqquzuncu ildönümünün keçirilməsinə dair tədbirlər planı"na uyğun olaraq ictimaiyyət nümayəndələrinin iştirakı ilə anım mərasimi keçirilib. Tədbirdə Yeni Azərbaycan Partiyasının Qazax rayon təşkilatının sədri Həmid Pənahov, rayonun gənclər və mədəniyyət idarələrinin nümayəndələri iştirak edib. İlk öncə, tədbir iştirakçıları Xocalı faciəsi zamanı, eləcə də, Azərbaycanın suverenliyi, ərazi bütövlüyü və milli dövlətçiliyi uğrunda şəhid olmuş bütün soydaşlarımızın ruhu bir dəqiqəlik sükutla yad edildi. Qazax rayon icra hakimiyyətinin başçısı Rauf Hüseynov tədbirdə çıxış edərək, xalqımızın başına gətirilən müsibətlər sırasında Xocalı soyqırımının xüsusi amansızlığı və qəddarlığı ilə seçildiyini bildirdi. Qeyd etdi ki, Xocalı faciəsi XX əsrdə ermənilər tərəfindən xalqımıza qarşı törədilmiş növbəti kütləvi qırğın olmaqla yanaşı, həm də, Azərbaycanın ərazi bütövlüyünə, dövlət müstəqilliyinə qarşı yönəlmiş ənənəvi terror siyasətinin əyani təzahürüdür. R.Hüseynov Xocalı soyqırımının bəşəriyyətə və insanlığa qarşı yönəlmiş ən qəddar cinayətlərdən biri olduğunu, bu faciənin beynəlxalq hüququn norma və prinsiplərinə məhəl qoyulmadan həyata keçirilmiş bir vəhşilik aktı olduğunu bildirdi. Tədbirdə Qazax RİH-nin başçısının müavini Gülayə Həsənova geniş məruzə ilə çıxış edərək, Xocalı qətliamının Azərbaycan xalqının mübarizə əzmini qırmaq istəyi ilə həyata keçirilmiş bir cinayət əməli olduğunu vurğuladı. Qeyd etdi ki, Xocalı soyqırımının beynəlxalq ictimaiyyətə çatdırılması ilə bağlı əməli tədbirlər məhz xalqımızın təkidli tələbi ilə ikinci dəfə siyasi hakimiyyətə qayıdan Ulu Öndərimiz Heydər Əliyevin sayəsində mümkün olub. Rayon ziyalıları, gənclər və ağsaqallar adından çıxış edənlər də, Xocalıda Azərbaycan xalqına, dinc əhaliyə qarşı həyata keçirilmiş soyqırımı siyasətinin erməni xislətinin tərkib hissəsi olduğunu qeyd etdilər.
Tapdıq Qurbanlı
Səs.- 2011.- 26 fevral.- S. 8.