Abadlaşan Cəlilabad...
Ölkə
başçısı İlham Əliyevin
təsdiqlədiyi “2009-2013-cu illərdə “Regionların sosial-iqtisadi inkişafı Dövlət
Proqramı”nda regionlarda inkişafı təmin
etməli olan kompleks tədbirlərin
həyata keçirilməsi nəzərdə tutulub.
Proqramın icrasına başlanılmasından 3 il keçir və
regionların sosial-iqtisadi həyatında
görülən işlər hazırda davam
etdirilir. Maraqlıdır, proqram
bölgələrin inkişafında rol
oynadımı? Hansı sahələr inkişaf
etdi, yeni iş yerləri açıldımı, əhalinin
məşğulluğu artdımı? Regionların sosial-iqtisadi həyatında hansı əsaslı
dəyişikliklər baş verdi? Prezident yanında Kütləvi İnformasiya
Vasitələrinin İnkişafına Dövlət Dəstəyi Fondunun maliyyələşdirdiyi “Regionların
sosial-iqtisadi inkişafına dair jurnalist
araşdırması” layihəsi əsasında cənub
bölgəsində görülmüş
işlər barədə material
hazırlamaq üçün ilk olaraq Cəlilabad rayonunda olduq.
Bir neçə kəlmə Cəlilabad
haqda
Cəlilabad Azərbaycanın qədim rayonlarından
biri sayılır və 1930-ci ildə qurulub, 1967-ci ilə qədər
Astraxanbazar adlandırılıb. Cəlilabad rayonun Prişib
şəhəri, Üçtəpə, Bəyxanlı,
Qarakazımlı, Göytəpə, Ləki kəndləri
ölkədə tanınır. Cəlilabad rayonu Biləsuvar,
Neftçala, Masallı və Yardımlı rayonları ilə
qonşudur. Rayonun ən önəmli təsərrüfat sahəsi
üzümçülükdür. Həmçinin,
taxılçılıq, kartofçuluq və heyvandarlıq
da əhalinin məşğulluğunda mühüm yer tutur.
Cəlilabadın sosial siması dəyişir,
iqtisadi imkanları artır
Cəlilabad dəyişir, getdikcə daha abad,
yaraşıqlı məkana çevrilir. Rayon ərazisinə
daxil olan andan bu inkişafın şahidi olmaq
mümkündür. Köhnə və yeni salınan
üzüm bağları
göz oxşayır. Cərgə boyunca çəkilən
məftillərə qaldırılmış tənəklərdə
artıq üzüm kürüsü əmələ gəlir.
Yaxın vaxtlarda onlar əvvəlcə gülə, sonra isə
qoraya çevriləcək.
Göytəpə istiqamətində əkinlərin
çoxunu kartof sahələri təşkil edir. Cəlilabadda
il ərzində 3 dəfə kartof yetişdirilir. Yanvar
ayının əvvəllərində əkilən və
sellofan altında becərilən kartofun
yığılmasına artıq bir neçə
gündür başlanıb. Düzdür, nübar məhsulu
yetişdirmək nisbətən çox vəsait tələb
edir. Bununla bərabər, o, yaxşı gəlir gətirir.
Bir sözlə, indi cəlilabadlılar sahələrdə
yorulmaq bilmədən çalışırlar. Ötən
müddət ərzində burada çox işlər
görülüb.
Dövlət Proqramı çərçivəsində
uğurlu nəticələr
Cəlilabad rayonunda regionların sosial-iqtisadi
inkişafı Dövlət Proqramı çərçivəsində
bütün sahələrdə uğurlu nəticələr əldə
edilib. Son illər respublikamızın regionlarında, o
cümlədən, Cəlilabadda da Müalicə-Diaqnostika Mərkəzinin
istifadəyə verilməsi rayon ictimaiyyətinin sevincinə səbəb
olub. Bu müasir səhiyyə ocağı üçmərtəbəli
əsas korpusdan, yardımçı binalardan, o cümlədən,
transformator otağı, qazanxana, mətbəx,
camaşırxana, dializ materialları anbarı, patoloji anotomiya
binası, keçid məntəqəsi, anbar, avtomobillər
üçün qaraj, su anbarından ibarətdir. Mərkəzdə
qəbul, hemodializ, poliklinika, şüa-diaqnostika, laboratoriya,
inzibati, cərrahiyyə, anesteziologiya, reanimasiya, əməliyyat
bloku və ümumi sterilləşdirmə bloku fəaliyyət
göstərir. Hemodializ şöbəsində 10 dəst
hemodializ aparatı quraşdırılıb. Böyrək
çatışmazlığından əziyyət çəkən
60 xəstə bu aparatlar vasitəsilə hemodializ seansları
alacaq. Əməliyyat bloku 4 əməliyyat otağından
ibarətdir və otaqların hər birində xaricdə
istehsal olunan yüksək keyfiyyətli tibbi avadanlıq
quraşdırılıb. Şüa-diaqnostika şöbəsi
kompyuter tomoqrafiya və rentgen aparatları ilə təchiz
olunub. Poliklinika şöbəsində bütün növ xəstəliklərin
müayinəsi və müalicəsi üçün kabinetlər
fəaliyyət göstərir. Otaqlar müasir tibbi
avadanlıq və mebellə təchiz edilib. 260 nəfərin
daimi işlə təmin ediləcəyi Müalicə-Diaqnostika
Mərkəzinin laboratoriya şöbəsində biokimyəvi,
mikrobioloji, hematoloji və immunoloji-seroloji analizlərin
aparılması mümkündür.
Açılışında iştirak edən ölkə
Prezidenti İlham Əliyev Cəlilabadda Müalicə-Diaqnostika
Mərkəzinin açılışını böyük
hadisə olduğunu bildirmişdir: “Cəlilabad rayonunun tibb
müəssisələrinin arasında bu, yəqin ki, ən
gözəl, ən möhtəşəm mərkəzdir. Həm
müayinə, həm müalicə aparılacaq, müxtəlif
əməliyyatlar keçiriləcək, ən gözəl
avadanlıq quraşdırılacaqdır. Burada ən
müasir səviyyə təşkil edilməlidir. Elə etməliyik
ki, burada tibbi xidmət çox yüksək səviyyədə
olsun. Əminəm ki, həkimlər, tibb işçiləri
də burada yaxşı xidmət göstərəcəklər.
Burada bütün xidmətlər - müayinə, müalicə,
bütün əməliyyatlar pulsuz olacaqdır. Elə etməliyik
ki, rayon sakinləri vaxtaşırı buraya gəlib
sağlamlığını bərpa etsinlər, müayinədən
keçsinlər. Ən azı ildə bir dəfə hər
bir vətəndaş gərək diaqnostikadan keçsin. Belə
olan halda insanlarımız sağlam olacaq, xəstələnməyəcək
və son illər ərzində Azərbaycanın səhiyyə
sahəsində əldə etdiyi uğurlar daha da əhəmiyyətli
olacaqdır. Çünki bütün bu işlərin təməlində
insan amili dayanır. İnsanlara xidmət, insanların
ömrünün uzadılması, sağlam həyat tərzi,
sağlamlıq - bütün bunlar çox vacib məsələlərdir.
İndi bizdə imkanlar var ki, müxtəlif yerlərdə,
böyük şəhərlərdə, rayonlarda ən
müasir tibb xidməti göstərək. Bu, çox
vacibdir... Bölgələrdə - demək olar ki,
bütün bölgələrdə ya Dövlət Neft
Şirkətinin xətti ilə belə gözəl mərkəzlər,
ya da Səhiyyə Nazirliyinin xətti ilə xəstəxanalar
tikilir. Demək olar ki, bütün bölgələrdə
artıq yüksək tibbi xidmət göstərilir. Elə
etməliyik ki, hər bir rayonda, rayon mərkəzində belə
gözəl şərait olsun. Belə olarsa, onda, biz demək
olar ki, səhiyyə sahəsindəki islahatların
böyük hissəsini həll edə bilərik. Bu, bizim
üçün prioritet məsələdir və son illər
ərzində bu sahədə böyük investisiyalar qoyulub.
Bu investisiyalar insan kapitalına qoyulan investisiyalardır. Mən
çox şadam ki, Cəlilabadda bütün başqa sahələrdə
də işlər yaxşı gedir. Rayonun inkişafı
üçün lazımi tədbirlər görülür. Həm
sənaye imkanları artır, iqtisadi göstəricilər
yaxşılaşır, həm də sosial infrastruktur
yaradılır. Cəlilabad Azərbaycanda inkişaf
baxımından ən qabaqcıl yerlər olan rayonlardan
biridir”.
Cəlilabad uğurlu inkişaf
yollarında
Aparılan tikinti-quruculuq və abadlıq işləri
sayəsində Cəlilabad şəhərinin, qəsəbə
və kəndlərin siması tanınmaz dərəcədə
dəyişib. Əvvəllər yol qıraqlarındakı
primitiv, köhnə ticarət köşkləri
cansıxıcı təsir bağışlayırdı.
Buradan qarlı-yağışlı günlərdə
palçıq-çamur, isti günlərdə isə
toz-torpaq əlindən ötüb keçmək
müşkül məsələ idi. Axşamlar isə şəhər
qaranlığa qərq olurdu. İndi Cəlilabad tamam başqa
bir gökəmdədir. Şəhərin
başlanğıcından qurtaracağına kimi yolun sağ
və soluna yüngül konstruksiyalı materialdan səliqəli
şəkildə hasar çəkilmiş, çinar
ağacları əkilmiş, müasir elektrik dirəkləri
basdırılmışdır. Yeni ticarət və sosial
obyektlərsə əraziyə xüsusi yaraşıq verir.
Bir-birinin ardınca yeni-yeni sosial əhəmiyyətli obyektlər,
istehsal müəssisələri tikilib istifadəyə verilir.
Bunlar isə, öz növbəsində, əhalinin işsizlik
probleminin həll edilməsində, sosial vəziyyətinin
yaxşılaşmasında mühüm rol oynayır. Bu
yaxınlarda bütün Cəlilabad camaatı yenidən sevinc
hissləri yaşadı. Prezident İlham Əliyevin növbəti
dəfə rayona səfəri cəlilabadlıların bayram əhvali-ruhiyyəsilə
yaşamasına səbəb oldu. Ölkə
başçısı səfər zamanı müasir
üslubda tikilmiş Şahmat Məktəbinin və
Tarix-Diyarşünaslıq muzeyinin açılış mərasimlərində
iştirak etdi. Ölkə Prezidenti cənab İlham Əliyev
rayon ictimaiyyəti ilə görüşü zamanı
görülən işləri yüksək qiymətləndirərək
bildirmişdir: “Mən çox şadam ki, Cəlilabadda
bütün işlər yaxşı gedir. Rayonun
inkişafı üçün lazımi tədbirlər
görülür. Həm sənaye imkanları artır,
iqtisadi göstəricilər yaxşılaşır, həm də
sosial infrastruktur yaradılır. Cəlilabad Azərbaycanda
inkişaf baxımından ən qabaqcıl yerlərdə olan
rayonlardan biridir”.
Rayonda yeni sənaye müəssisələri
yaradılır
Regional inkişaf üzrə dövlət proqramlarının
uğurlu icrası sayəsində Cəlilabad rayonunda da
müasir infrastruktur yaradılıb. Şəhər elementləri
ilə zəngin olan genişmiqyaslı yenidənqurma tədbirləri
Cəlilabad şəhərinin simasını tamamilə dəyişib,
əyalət rayonunun gözəlliklərini daha da
artırıb. Burada qazanılan uğurların məhz
işgüzarlıq, zəhmətsevərlik kimi amillərin
üzərində pərvəriş tapması xüsusi qeyd
edilməlidir. Kənd təsərrüfatı məhsullarının
saxlanması üçün hər biri iki min tonluq 3 soyuducu
kameranın, hər biri on min tonluq 2 taxıl anbarının,
iyirmi min tonluq regional gübrə bazasının inşası
sürətlə davam etdirilir. Həmin obyektlərin istifadəyə
verilməsi kənd təsərrüfatı məhsulları
istehsalının daha da artırılmasına əlverişli
şərait yaradacaq. Olimpiya idman kompleksinin və rayon qaz istismarı
idarəsinin inzibati binasının tikintisi davam edir. Dövlət
Proqramına uyğun olaraq, əhalini elektrik enerjisi və təbii
qazla təmin etməkdən ötrü birinci yarımildə
yeni yaşayış massivlərində 32 kilometr SİP kabeli
çəkilib, 1193 ədəd dəmir-beton dirək basdırılıb,
5145 abonentə “Smart” tipli sayğac quraşdırılıb,
Uzuntəpə kəndindəki qazpaylayıcı məntəqədən
rayon mərkəzinə 10 kilometrlik əsas qaz xətti çəkilib,
Göytəpə şəhərinin yeni massivinə və
Kazımabad kəndinə təbii qaz verilib. Hazırda Alar və
Günəşli kəndlərinin
qazlaşdırılması davam etdirilir. İlk yarımildə
rayona verilən elektrik enerjisi dəyərinin 67 faizi, təbii
qazın dəyərinin isə 116 faizi ödənilib. Əvvəllər
qazdan istifadə etmiş bütün kəndlərə
yaxın illərdə mavi yanacağın verilişi bərpa
ediləcək. Bu məqsədlə Cəlilabadda “Azəriqaz”
İstehsalat Birliyinin regional tikinti-quraşdırma idarəsi
yaradılıb.
Bütün millətlərin nümayəndələrinin
birləşdiyi rayon
Göytəpə Cəlilabadın peyk şəhəridir.
Yaşayış məntəqəsi kimi iki yüz ilədək
yaşı var. Bir zamanlar burada malakan və pravoslavlar məskunlaşmışdır.
Hazırda əhalinin çox böyük əksəriyyəti
azərbaycanlılardır. Sakinlərin ümumi sayı 13575 nəfərdir.
1992-ci ilədək Prişib adlandırılan şəhər
tipli qəsəbənin həmin vaxtdan tarixi Göytəpə
adı qaytarılıb. Şəhərdə üç məktəb,
iki xəstəxana, bir peşə liseyi fəaliyyət
göstərir. Əllidən artıq küçə var.
Bütün küçələrin ünvan göstəriciləri,
evlərin hamısının nömrələri təzələnib.
Həmin küçələrdən biri və 1 saylı məktəb
Qarabağ uğrunda döyüşlərdə igidliklə həlak
olmuş Azərbaycanın Milli Qəhrəmanı Vüqar
Mürsəlovun adını daşıyır. Ümumiyyətlə,
Göytəpə şəhərində Azərbaycanın ərazi
bütövlüyü uğrunda canından keçmiş
şəhidlərin (onların sayı 30 nəfərdir) xatirəsi
əziz tutulur. Vüqar Mürsəlovun büstü, “Şəhidlər”
abidə kompleksi ziyarətgaha çevrilib. Yol kənarlarına
və şəhərin mərkəzinə iki mindən
artıq ağac əkilib. “Qurtuluş” küçəsinin
bütün işıq dirəkləri təzələnib. Məişət
tullantıları şəhərdəki kommunal müəssisələri
kombinatı tərəfindən yığılaraq
daşınır və zərərsizləşdirilir.
Göytəpənin qaz təchizatı 70 faizə
çatıb: hazırda 1400 təsərrüfat mavi yanacaq
alır. Yaxın vaxtlarda yeni mədəniyyət evinin
tikintisinə başlanacaq.
Bütün bunlar ölkəmizin, eləcə də,
Cəlilabad rayonunun sürətlə inkişaf etdiyini göstərir.
Ümumiyyətlə, rayonda əldə olunan uğurlar onu deməyə
əsas verir ki, Cəlilabad rayon ictimaiyyəti Ümummilli
Liderimiz Heydər Əliyevin ideyalarını uğurla həyata
keçirən ölkə Prezidenti İlham Əliyevin daxili və
xarici siyasət xəttini, birmənalı olaraq dəstəkləyir
və müdafiə edirlər.
RƏFİQƏ KAMALQIZI
Səs.- 2011.- 2 iyul.- S. 11.