Vətəndaş cəmiyyəti quruculuğunda qadınların rolu

Ümummilli maraqlar Azərbaycan qadınlarının bir daha sayıq olmasını və birliyini tələb edir

Hər bir cəmiyyətdə demokratik proseslərin inkişafında qadınların rolu kifayət qədər yüksəkdir. Xüsusilə də, onlar vətəndaş cəmiyyəti institutlarında təmsil olunanda və bu istiqamətdə davamlı fəaliyyət quranda demokratik proseslərə ciddi töhfələr vermiş olurlar. Birmənalı şəkildə demək olar ki, bu gün Azərbaycanda fəaliyyət göstərən qeyri-hökumət təşkilatları sırasında çoxsaylı qadınlar yer alır. Hansı ki, onlar ən müxtəlif sahələrlə bağlı təklif və ideyalar verir, həmin ideyaların reallaşması üçün güc və bacarıqlarını əsirgəmirlər. Bununla bağlı AMEA Fəlsəfə və Siyasi-Hüquqi Tədqiqatlar İnstitutunun baş elmi işçisi, f.e.d., professor Rəna Mirzəzadə QHT-lərin Azərbaycan cəmiyyətinin getdikcə fəal bir hissəsinə çevrildiyini söylədi:

- Məlumdur ki, XX əsr bir çox tarixi hadisələrlə Azərbaycan xalqının yaddaşında silinməz izlər qoymuşdur. Bunlardan biri də, Azərbaycan qadınlarının ictimai-siyasi həyata gəlişi və bu sahədə böyük nailiyyətlər əldə etməsidir. Azərbaycan qadını tarixin ən çətin və həlledici anlarında həmişə öz sözünü deməyi bacarmış və bütün sınaqlardan alnıaçıq çıxmışdır. XX əsrin sonunda da Azərbaycanın dövlət müstəqilliyinin əldə edilməsində və ərazi bütövlüyünün qorunması uğrunda mübarizədə qadınlarımızın da böyük əməyi olmuşdur. Azərbaycan qadınları bu gün ölkəmizdə gedən hüquqi dövlət və vətəndaş cəmiyyəti quruculuğunda, demokratiyanın inkişafında fəal iştirak edir, öz bilik və bacarıqlarını dövlətimizin güclənməsinə və inkişafına yönəldirlər.

Qeyd etmək lazımdır ki, 1993-cü ildən Azərbaycan qadınlarının ictimai-siyasi fəaliyyəti daha da sürətlə inkişaf etməyə başladı. 1995-ci ilin iyununda Azərbaycan Birləşmiş Millətlər Təşkilatının “Qadınlara münasibətdə bütün ayrı-seçkilik formalarının ləğv olunması haqqında” Konvensiyasına qoşuldu. Elə həmin ilin yayında Heydər Əliyev Çində keçirilən Qadınların IV Beynəlxalq Konfransında qadınlarımızın yüksək səviyyədə təmsil olunmaları üçün Milli Hazırlıq Komitəsinin yaradılması barədə Sərəncam imzaladı. Tarixə Pekin Konfransı kimi düşən beynəlxalq toplantının qəbul etdiyi qərar və qətnamələr dünyada qadın problemlərinin həllinin tezləşdirilməsi üçün mühüm əhəmiyyət kəsb edir. Amma bütün dünyanın bu şəkildə qəbul etdiyi Pekin Konfransından öncə, məhz Ümummilli Liderimiz Heydər Əliyevin siyasi düşüncəsi, Azərbaycan qadınına böyük sayğısı bu işlərin ölkəmizdə hələ xeyli illər öncədən həyata keçirilməsinə start verdi. Ümummilli Liderimiz Heydər Əliyevin 14 yanvar 1998-ci il Fərmanı ilə Ailə, Qadın və Uşaq Problemləri üzrə Dövlət Komitəsini təsis etməsi isə görülən işlərin zirvə nöqtəsi oldu. Bununla qadınlara əlavə səlahiyyət verildi, birbaşa onların problemləri ilə məşğul olan dövlət qurumu yaradıldı. Bu sənəd hər bir mənada ölkəmizdə qadınların daha fəal olmasına, onların cəmiyyətin bütün sahələrində mühüm yer tutmalarına yüksək dövlət siyasətinin göstəricisidir.

Bu bir həqiqətdir ki, 2000-ci ilin mart ayının 6-da Ümummilli Liderimiz Heydər Əliyevin “Azərbaycan Respublikasında dövlət qadın siyasətinin həyata keçirilməsi haqqında” Fərmanı ölkədə qadın siyasətinin gerçəkləşməsinə xidmət edən məsələlərdəndir. Təqdirəlayiq haldır ki, həmin sənəd 2001-ci ildə bütün dünya dövlətlərinə paylanılıb və bu sahədə ən yaxşı sənəd kimi qəbul olunub.

Azərbaycan qadını hər zaman cəmiyyətin bütün sahələrində özünəməxsus yer tutmuş, tarixin ən çətin və həlledici anlarında həmişə öz sözünü deməyi bacarmış, tarixdə şərəfli bir yol keçərək XXI əsrə qədəm qoymuşdur. Bu da bir həqiqətdir ki, üçüncü minillikdə dünyada gedən qlobal ictimai-siyasi proseslər, eləcə də, beynəlxalq qadın hərəkatının yeni keyfiyyət mərhələsinə qədəm qoyması dünya qadınlar birliyi qarşısında böyük və məsul vəzifələr qoymuş, qadınların cəmiyyətdəki mövqeyinin daha da gücləndirilməsini zəruri etmişdir.

Dövlət müstəqilliyimizin bərpasından sonra ötən iyirmi il ərzində Azərbaycan qadını milli dövlət quruculuğu prosesinin fəal iştirakçısına çevrilmiş, ölkəmizin sosial-iqtisadi, intellektual-mədəni potensialının artırılması üçün dəyərli töhfələr vermişdir. Elm və təhsil, səhiyyə və mədəniyyət, eləcə də, digər sahələrdə qazandığı uğurları ilə o öz nüfuzunu ilbəil artırmağa müvəffəq olmuşdur. Vətəndaş cəmiyyəti quruculuğu istiqamətində qadınlarımızın nailiyyətləri məmnunluq hissi doğurur. Ölkəmizdəki sabitlik və demokratik mühit qarşıdakı illərdə də onlara öz fitri istedadlarını, yaradıcılıq imkanlarını tam gerçəkləşdirə bilmələri üçün bütün lazımi şəraiti təmin edir. Ümummilli Liderimiz Heydər Əliyev qadınlarımızın cəmiyyətdəki rolu haqqında danışarkən demişdir: “Azərbaycan qadını öz iradəsi və mərdliyi, saflığı və səadəti ilə cəmiyyətimizin həyatında, xalqımızın milli-mənəvi dəyərlər sisteminin formalaşmasında müstəsna rol oynamışdır”.

Ümummilli Liderimiz Heydər Əliyevin xalqın təkidi ilə ikinci dəfə hakimiyyətə qayıtması Azərbaycan qadınına olan sayğını daha da artırdı. Onun ölkəmizdə açıq cəmiyyət uğrunda gördüyü işlər gender probleminin həlli üçün hərtərəfli baza yaratdı. Məhz Ümummilli Liderimiz Heydər Əliyevin müəllifliyi ilə qəbul olunan Azərbaycan Respublikası Konstitusiyasında qadınların kişilərlə bərabərhüquqlu olması təsdiq edilib. Bununla demokratik cəmiyyət quruculuğunda qadınların iştirakının hüquqi bazası yaradılıb. Bu isə, öz növbəsində, ictimai-siyasi həyatımızın bütün sferalarında gender siyasətinin güclənməsinə gətirib çıxarıb. Ümumiyyətlə, Ulu Öndər Heydər Əliyev siyasi xəttinin bərqərar olduğu zamanlarda qadınlarımızın hüquqlarının qorunması, onların cəmiyyətin bərabərhüquqlu üzvü olması üçün mümkün olan bütün işlər görülüb. Nəzərinizə çıtdırmaq istəyirəm ki, bu gün Heydər Əliyev dedikdə müstəqil Azərbaycan dövləti, müstəqil Azərbaycan dedikdə isə Heydər Əliyev yada düşür. Bu ifadələr leksikonumuzda sinonim kimi işlədilir. Ona görə də, Ulu Öndər Heydər Əliyevin Azərbaycan qadınına cəmiyyətdə yüksək yer verməsindən danışarkən, bu, həm də elə Azərbaycan dövlətinin bu istiqamətdə gördüyü iş kimi qəbul edilməlidir.

Biz qadınlar fəxr edirik ki, Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın şəxsində Azərbaycan qadınları dünya səviyyəsində öz sözünü deyir. Şərq və Qərb xüsusiyyətlərini özündə cəmləşdirən, milli dəyərlərimizin və mədəniyyətimizin təbliğatçısı, Azərbaycan adət-ənənələrinin qoruyucusu, ümummilli problemlərimizin dünya müstəvisinə çıxarılmasında əvəzsiz xidmətləri olan Mehriban xanım Əliyeva ideal bir qadın obrazıdır və bu obraz Azərbaycan qadınlarının dünyabaxışında, gələcəyində mühüm rol oynayır. Ona görə də, ümumən qadınlarımız yaranmış bu imkan və şəraitdən istifadə etməlidirlər. Şübhə etmirəm ki, dövlətimizin diqqət və qayğısından yararlananlar yaxşı ana, nümunəvi həyat yoldaşı olacaqlar. Bütün bunlar onu göstərir ki, Azərbaycanda qadın problemləri daim dövlət qayğısındadır və gender proqramı ardıcıl surətdə həyata keçirilməkdədir. Çünki Azərbaycan bu sahədə problemlərin həllinin tərəfdarıdır. Məhz buna görə də, bu gün vətəndaş cəmiyyəti quruculuğu və dövlətimizin inkişafında qadın fenomeni həmrəylik və milli birlik rəmzinə çevrilərək öz fəaliyyətilə dövlətimizin gündən-günə qüdrətlənməsinə xidmət edir. Ölkə Prezidentimiz cənab İlham Əliyevin rəhbərliyi ilə dinamik inkişaf edən ölkəmizdə irimiqyaslı iqtisadi layihələrin iştirakçısı kimi qadınların da əldə olunan nailiyyətlərdə böyük rolu danılmazdır. Bu baxımdan, inanıram ki, Azərbaycan qadınları gənc nəslin milli adət-ənənələrə, azərbaycançılıq məfkurəsinə bağlılıq ruhunda tərbiyəsi işinə bundan sonra da xüsusi diqqət yetirəcək, dinamik inkişaf edən ölkəmizin gələcəyi naminə qüvvələrini, bilik və bacarıqlarını əsirgəməyəcəklər.

RƏFİQƏ KAMALQIZI

Səs.- 2011.- 7 iyul.- S. 12.