Mehriban xanım Əliyevanın daha yaxşı dünya qurmaq üçün göstərdiyi fəaliyyət dəyərli qiymətini alıb

Azərbaycan xalqının tərəqqisi onun elmi, mədəniyyəti, səhiyyəsi və təhsili ilə sıx bağlıdır. Bu məfhumların geniş bir şəkildə cəmiyyətdə tətbiqi və inkişafı dövlətin sağlam bir formada dünyaya inteqrasiyasını sürətləndirir.

Belə bir missiyanı - humanizm və xeyriyyəçilik missiyasını üzərinə götürən böyük anlamla cəmiyyətə töhfələrini verən Heydər Əliyev Fondu zamanla təmasda xeyli əhəmiyyət kəsb edən layihələrin icrasına nail olmuşdur. Heydər Əliyevin ideyalarını təbliğ edən və ondan bəhrələnərək bir sıra əhəmiyyətli proqram və layihələri həyata keçirən fond cəmiyyətin tərkib hissəsi olaraq xalqın böyük etimadını qazanıb. Fondun prezidenti, YUNESKO və İSESKO-nun xoşməramlı, Azərbaycanın Birinci Xanımı, millət vəkili Mehriban Əliyeva elm, təhsil, mədəniyyət, səhiyyə, idman, ekoloji sahələrə xüsusi diqqət ayıraraq yerli əhəmiyyətli və sosial problemlərin həllinə doğru məqsədyönlü addımlar atır. Dünya standartlarına uyğun hazırlanan layihələr həm paytaxtımızda, həm də bölgələrdə icra olunur. Bu uğurlu addım fondun başlıca vəzifəsi olaraq davam etdirilir.

Azərbaycan mədəniyyətinin dünya miqyasında təbliği, sağlam mənəvi dəyərlərin, gələcək nəslin fiziki cəhətdən sağlam yetişməsi və digər istiqamətlərdə qətiyyət və prinsipial mövqeyi qısa bir zaman məsafəsində Onun Azərbaycan, eləcə də, dünyada xeyriyyəçi, humanist imicini formalaşdırıb. Bunun nəticəsidir ki, Mehriban Əliyeva beynəlxalq təşkilat və dövlətlərin müxtəlif titullarının daşıyıcısıdır. Qloballaşan dünyaya inteqrasiyada Azərbaycan dəyərlərini qoruyub saxlayır. Bütün bunlar Mehriban xanım Əliyevanın fondun prezidenti olaraq əməli fəaliyyətində təsdiqini tapmasıdır ki, biri-birinin ardınca uğur yaşamaqdadır.

Fəaliyyətə başladığı zaman kəsiyindən etibarən, Mehriban xanım Əliyeva dünyanın bir sıra nüfuzlu mükafatlarına layiq görülmüşdür. Fəaliyyət sahəsinin şaxəliyinin nəticəsi olaraq, dünya ictimaiyyətinin diqqətini cəlb edib. Belə ki, O, Azərbaycanın şifahi xalq ədəbiyyatının və musiqi irsinin qorunub saxlanılması və inkişaf etdirilməsi sahəsindəki yorulmaz səylərinə görə YUNESKO-nun Xoşməramlı Səfiri adına layiq görülüb. İctimai, mesenatlıq və xeyriyyəçilik fəaliyyətinə görə, təhsil və mədəniyyət müəssisələrinin dəstəklənməsinə, Rusiya və Azərbaycan xalqları arasında dostluğun möhkəmlənməsinə sanballı töhfələrinə görə Rusiyanın “Yüzilliyin mesenatları” Beynəlxalq Xeyriyyə Fondunun “Yaqut Xaç” ordeninə, sivilizasiyalararası dialoq daxil olmaqla, müxtəlif sahələrdə genişmiqyaslı və fədakar fəaliyyətinə, qayğıya ehtiyacı olan uşaqlara diqqətinə, təhsilə, həmçinin, islam aləmində görülən işlərə böyük dəstəyinə görə İSESKO-nun Xoşməramlı Səfiri adına layiq görülüb.

Dünya Səhiyyə Təşkilatı İcraiyyə Komitəsinin Cenevrədə keçirilən 120-ci sessiyasının yekdil qərarı ilə ana, uşaq və ailə sağlamlığının qorunması və möhkəmlənməsi işində müstəsna xidmətlərinə görə bu beynəlxalq təşkilatın mükafatının daşıyıcısıdır. Genişmiqyaslı xeyriyyəçilik fəaliyyətinə, bəşəriyyətin ali ideallarına xidmət sahəsində yüksək nailiyyətlərinə görə “Qızıl ürək” beynəlxalq mükafatına layiq görülməsi onun dünya miqyasında əməllərinin, birmənalı olaraq, qiymətləndirilməsini əyani olaraq təsdiqləyir. Azərbaycanla Polşa arasında dostluq münasibətlərinin inkişafındakı xidmətlərinə görə, Mehriban xanım Əliyeva Polşa Respublikasının “Xidmətlərə görə” Böyük Komandor Xaçı ordeni ilə təltif edildi. Fransaya münasibətdə göstərdiyi xidmətlərinə və nümayiş etdirdiyi sadiqliyinə görə, Fransa Respublikası Prezidentinin Sərəncamı ilə “Şərəf Legionu” ordeninin zabit dərəcəsi ilə təltif edildi. YUNESKO-nun “Qızıl Motsart” medalı Mehriban xanım Əliyevaya təqdim olundu.

Beynəlxalq təşkilat və dövlətlərlə yanaşı, Azərbaycanda da Onun əməyi dövlət səviyyəsində qiymətini alıb. Belə ki, Azərbaycan Prezidenti İlham Əliyevin Sərəncamı ilə Mehriban Əliyeva Azərbaycan Respublikasının ictimai-siyasi və mədəni həyatında səmərəli fəaliyyətinə görə Heydər Əliyev mükafatı ilə təltif edilib. Bütün bunlar Mehriban xanımın Azərbaycan xalqı qarşısında xidmətlərini əks etdirən mükafat və qiymətdir. Bu adlarını sadaladığımız mükafatlar Onun fəaliyyəti dövründə əldə etdiyi nailiyyətlərə görə təqdim olunub. Demək olar ki, hər bir sahədə Onun fəaliyyəti öz layiqli qiymətini alıb, Heydər Əliyev Fonduna qeyri-hökumət təşkilatı olaraq beynəlxalq aləmdə böyük nüfuz qazandırıb.

Bütün bu ənənələrin davamı və əməli fəaliyyətinə verilən qiymətin davamı olaraq bu günlərdə daha bir uğur Onu müşayiət edib. Bu, Azərbaycanın Birinci Xanımı, Heydər Əliyev Fondunun prezidenti Mehriban xanım Əliyevaya Krans Montana Forumunun Qızıl Medalının təqdim olunmasıdır. Brüssel şəhərində təqdim edilən Krans Montana Forumunun qızıl medalı dünyada öz fəaliyyəti ilə böyük nüfuz qazanmış xüsusi xidmətləri olan insanlara verilir. Mehriban xanım Əliyevanın Krans Montana Forumunun qızıl medalına layiq görülməsi onun mədəniyyət, elm, təhsil, səhiyyə, sosial və digər sahələrdə həyata keçirdiyi çoxşaxəli fəaliyyətinin beynəlxalq miqyasda diqqət mərkəzinə çevrilməsini bir daha təsdiq edir. Krans Montana Forumunun prezidenti Jan Pol Karteron bildirmişdi ki, biz bu mükafatı Mehriban xanım Əliyevaya daha yaxşı dünya qurmaq üçün göstərdiyi dəyərli fəaliyyətinə görə veririk. Mehriban xanım Əliyeva təhsil, səhiyyə, mədəniyyət və sosial sahələrdə həyata keçirdiyi layihələrlə tanınan Heydər Əliyev Fondu Azərbaycanda gənc nəslin yetişməsində yaxından iştirak edir. İSESKO-nun tədbirlərinin keçirilməsinə yüksək diqqət və qayğı ilə yanaşı, beynəlxalq miqyaslı festival və müsabiqələrin reallaşmasına nail olur. Belə bir missiyanın daşıyıcısı olan Heydər Əliyev Fondunun prezidenti beynəlxalq arenada yüksək imic qazanıb. Mehriban xanım Əliyeva mədəniyyətlərarası və sivilizasiyalararası dialoqun əldə olunmasına da töhfə verib. Bu və ya digər missiyaların icrasına nail olan Azərbaycanın Birinci Xanımı fəaliyyət dairəsinin genişliyi müqabilində müxtəlif titul və adları isminin qarşısına həkk etmişdir. Bundan bir neçə gün əvvəl iyunun əvvəlində Türk Dünyası Yazarlar və Sənətçilər Vəqfi 15-ci “Türk dünyasına xidmət” mükafatını təqdim etmişdir. 6 ölkəni təmsil edən şəxslərə və qurumlara verilən bu mükafatın növbəti daşyıcısı Mehriban xanım Əliyevadır. Azərbaycanın birinci xanımı TÜRKSAB-ın idarə heyətinin qərarı ilə bu mükafata Ermənistanın işğal etdiyi ərazilərdən qaçqın və köçkün düşmüş insanlar üçün Heydər Əliyev Fondunun həyata keçirdiyi humanitar proqramlar, habelə, türk dünyası mədəni irsinin zəngin parçası olan Azərbaycan türklərinin maddi və qeyri-maddi mədəniyyət abidələrinin qorunması və təbliği sahəsində böyük xidmətlərinə görə layiq görülüb.

Mehriban xanım Əliyevanın fəaliyyətinin reallıqlar əsasında qiymətini alması Onun bəşəri ideyalara xidməti kimi qiymətləndirilir. Xoşməramlı səfir olaraq qloballaşan dünyaya öz töhfələrini, ardıcıl olaraq, əzmkarlıqla təqdim edir.

NƏZAKƏT ƏLƏDDİNQIZI

Səs.- 2011.- 8 iyul.- S. 5.