Azərbaycan dünya mətbuatında

Azərbaycanın Almaniyadakı səfiri Pərviz Şahbazov Almaniyanın “TV Berlin” telekanalına müsahibə vermişdir. Azərbaycanlı diplomat tanınmış aparıcı Peter Brinkmanın “Eurovision -2011”, Azərbaycanda iqtisadiyyatın, turizmin inkişafı, Ermənistan-Azərbaycan, Dağlıq Qarabağ münaqişəsi və bir çox məsələlərlə bağlı suallarına cavab vermişdir. Münaqişə ilə bağlı həqiqətləri tamaşaçıların diqqətinə çatdıran səfir torpaqlarımızın 20 faizinin Ermənistan tərəfindən işğal olunduğunu, işğal altındakı ərazilərdə etnik təmizləmə siyasətinin aparıldığını, bunun nəticəsində isə 1 milyondan artıq azərbaycanlının öz doğma yurdlarından didərgin düşdüyünü diqqətə çatdırmışdır. P.Şahbazov müsahibəsində Azərbaycan iqtisadiyyatının sürətlə inkişaf etdiyini, turizm sahəsinə böyük diqqət göstərildiyini, ölkədə dini dözümlülüyün hökm sürdüyünü, Azərbaycanın Avropanın enerji təhlükəsizliyindəki rolunu və digər məsələləri geniş şəkildə işıqlandırmışdır.

Astanada “Turan Times” qəzetində Azərbaycanın birinci xanımı Mehriban Əliyevanın fəaliyyəti ilə bağlı “Pervaya ledi Azerbaydjana” sərlövhəli geniş məqaləsi dərc olunub

Astanada rus dilində nəşr olunan “Turan Times” qəzetində AzərTAc-ın Orta Asiya və Qazaxıstan üzrə xüsusi müxbiri Qulu Kəngərlinin Azərbaycanın birinci xanımı Mehriban Əliyevanın fəaliyyəti ilə bağlı “Pervaya ledi Azerbaydjana” sərlövhəli geniş məqaləsi dərc olunub. Bundan əvvəl həmin yazı Almatıdakı “Türkel” internet qəzetində verilmişdi.

Qulu Kəngərli bu məqaləni Azərbaycan Dövlət Teleqraf Agentliyinin (AzərTAc), “Exo” qəzetinin və “Trend” informasiya agentliyinin materialları əsasında hazırlayıb.

Məqalədə Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın Azərbaycan mədəniyyətinin inkişafında və dünya ölkələrində təbliğində əvəzsiz xidmətləri geniş əksini tapıb. Materialın əvvəlində deyilir ki, Gəncənin sonuncu xanı Cavad xanın məqbərəsinin yenidən qurulmasında Mehriban xanım Əliyevanın böyük xidmətləri var. Yazıda bildirilir ki, Azərbaycanın birinci xanımı ölkəmizdə müntəzəm olaraq keçirilən müxtəlif beynəlxalq mədəniyyət tədbirlərinin və festivallarının təşkilində mühüm rol oynayır. Oxucuların diqqətinə çatdırılır ki, beynəlxalq muğam festivalı və muğam ifaçılarının müsabiqəsi, M.Rostropoviç adına, eləcə də D.Şostakoviçin və Bülbülün yubileylərinə həsr edilmiş beynəlxalq festivallar, Qəbələ Beynəlxalq musiqi festivalı, aşıqların beynəlxalq festivalı kimi tədbirlər məhz Mehriban xanım Əliyevanın yaxından dəstəyi ilə həyata keçirilib.

Məqalədə bildirilir ki, Azərbaycanın birinci xanımının təşəbbüsü ilə Bakıda Beynəlxalq Muğam Mərkəzinin, Müasir İncəsənət Muzeyinin binaları inşa olunub, açıq səma altında “Qala” Arxeoloji-Etnoqrafik Kompleksi yaradılıb. 2010-cu ildə Azərbaycandan kənarda 150 dövlət əhəmiyyətli tədbir keçirilib. Bu mərasimlərin təşkilində Mehriban xanım Əliyevanın xidmətləri ölçüyəgəlməzdir.

Yazıda Mehriban xanım Əliyevanın çoxşaxəli fəaliyyəti “Mehriban Əliyevanın mədəniyyətimizin inkişafında əvəzsiz rolu”, “Heydər Əliyev Fondunun “Yeniləşən Azərbaycana yeni məktəb” layihəsi, “Beynəlxalq fəaliyyət”, “Qəbələdə Beynəlxalq musiqi festivalı”, “Azərbaycanın YUNESKO və İSESKO ilə əməkdaşlığının mədəni həyatın uğurlu inkişafına təsiri”, “Azərbaycan qadınlarının dünya tarixində rolu” və digər yarımsərlövhələr altında verilib.

Malayziyanın “The Leaders İnternational” jurnalında Azərbaycan haqqında məqalə dərc olunub

Malayziyanın nüfuzlu “The Leaders” jurnalının iyun nömrəsində Azərbaycan haqqında məqalə dərc olunmuşdur.

Azərbaycanın Malayziyadakı səfirliyindən bildirmişlər ki, məqalə ölkəmizin Malayziyadakı səfiri Tahir Kərimovun müsahibəsi əsasında çap olunmuşdur.

Jurnal həm Malayziyanın, həm də bütün dünyanın biznes aləmində baş verən hadisələri, həmçinin, müxtəlif sektorlarda fəaliyyət göstərən aparıcı rəhbər məmurlarla keçirilmiş müsahibələri işıqlandırır.

Məqalədə, Azərbaycanın iyirmi il bundan əvvəl öz müstəqilliyini bərpa etdikdən sonra üzləşdiyi çətinliklərdən, əldə olunan nailiyyətlərdən bəhs olunur. Həmin dövrdə müstəqilliyin qorunub saxlanılmasında və dövlətçiliyin möhkəmləndirilməsində, eləcə də, ölkə iqtisadiyyatının gücləndirilməsində Ümummilli Lider Heydər Əliyevin müstəsna rolu xüsusi qeyd edilir. T.Kərimov, həmçinin, Azərbaycanın hazırkı iqtisadi inkişafından, ölkə iqtisadiyyatına sərmayə qoyuluşu və biznes üçün mövcud geniş imkanlardan söhbət açmışdır.

Strateji Araşdırmalar Mərkəzinin direktor müavini Türkiyənin nüfuzlu “Today”s Zaman” qəzetinə müsahibə verib

Azərbaycan Respublikasının Prezidenti yanında Strateji Araşdırmalar Mərkəzinin (SAM) direktor müavini Gülşən Paşayeva Türkiyənin ingilis dilində nəşr olunan nüfuzlu “Today”s Zaman” qəzetinə müsahibə vermişdir.

Müsahibədə bildirilir ki, Ermənistanla Azərbaycan arasında mövcud olan problemlərin həlli hər iki tərəfin XXI əsrin paradiqmaları - etnik ünsürlərin zənginliyi və fərqliliklərin vəhdəti prinsiplərinə əməl etdiyi təqdirdə mümkün olacaqdır.

Türkiyə ilə Azərbaycanın Cənubi Qafqazdakı problemlərin, xüsusilə də, Ermənistan-Azərbaycan, Dağlıq Qarabağ münaqişəsinin həlli istiqamətində fəal əməkdaşlıq etdiklərini xatırladan Gülşən Paşayeva əlavə etmişdir ki, biz Ankaranın bu problemin ədalətli həlli üçün göstərdiyi səylərdən məmnunuq.

İndi regionda 1994-cü ildəki vəziyyətdən daha fərqli bir şərait vardır. Azərbaycan siyasi, iqtisadi və hərbi sahələrdə böyük inkişaf yolu keçmişdir. Azərbaycan ilə Ermənistan arasında güc balansı kəskin şəkildə dəyişmişdir.

Ermənistan-Azərbaycan, Dağlıq Qarabağ münaqişəsinin həllində irəliləyiş əldə olunduqdan sonra Azərbaycanın və Türkiyənin Ermənistanla sərhədləri açıla bilər və bu, bütün tərəflərin mənafeyinə xidmət edəcəkdir.

SAM-ın direktor müavini Türkiyə ilə əlaqələrin bütün səviyyələrdə yüksələn xətlə inkişaf etdiyini vurğulamış, 2011-ci ilin mart ayında iki ölkənin strateji araşdırmalar mərkəzləri arasında imzalanmış memorandumun əməkdaşlıq üçün yeni imkanlar yaratdığını söyləmişdir. O demişdir ki, əsas məsələ dövlət qurumlarının, qeyri-hökumət təşkilatlarının və jurnalistlərin səfərləri, qarşılıqlı məsləhətləşmələr qardaş ölkələrimizin bütün məsələlərə dair məlumatları operativ şəkildə və bilavasitə əldə etmələri baxımından çox əhəmiyyətlidir. Bununla Türkiyədəki qardaşlarımıza işğal olunmuş ərazilərimiz, onların tarixi və mədəniyyəti haqqında daha dolğun məlumatlar verilə bilər. İki ölkənin diaspor təşkilatları arasında güclənən əməkdaşlıq nəticəsində ABŞ-dakı siyasətə daha səmərəli təsir göstərmək olar. Digər tərəfdən, bizim “bir millət, iki dövlət” kimi vahid bir diaspor təşkilatımız da ola bilər.

Gülşən Paşayeva Türkiyə ilə Azərbaycan arasında enegetika sektorunda əməkdaşlıqdan, həyata keçirilən mühüm layihələrdən də ətraflı bəhs etmişdir.

“Moldovskiye vedmosti” qəzeti Azərbaycan haqqında

Azərbaycan Respublikasının Gənclər və İdman Nazirliyinin dəstəyi ilə Moldova universitetlərinin tələbələri və xüsusi liseylərin yuxarı sinif şagirdləri arasında “Mən Azərbaycan haqqında nə bilirəm” müsabiqəsinə yekun vurulmuşdur.

Ölkəmizin Moldovadakı səfirliyindən bildirmişlər ki, müsabiqə Azərbaycanın müstəqilliyinin bərpa olunmasının 20-ci ildönümünə həsr edilmişdir.

Tədbirdə Moldovanın təhsil nazirinin müavini Loretia Xandrabura, Xarici İşlər və Avropaya İnteqrasiya nazirliklərinin idarə rəisi Yevgeniy Vizir, Moldova Təhsil Nazirliyinin idarə rəisi Yelene Petrov, Moldova Azərbaycanlıları Konqresinin sədri Vüqar Novruzov, “Moldovskiye vedmosti” qəzetinin baş redaktoru Natalya Uzun və digər KİV-lərin nümayəndələri iştirak etmişlər.

Tədbirdə 200-dən çox ali məktəb tələbəsi və xüsusi liseylərin yuxarı sinif şagirdlərinin iştirak etdiyi müsabiqənin əhəmiyyəti barədə məlumat verilmişdir. Bildirilmişdir ki, müsabiqə haqqında Moldova KİV-lərində geniş xəbərlər dərc edilmiş, Moldova Xarici İşlər və Avropaya İnteqrasiya nazirlikləri, Moldova Təhsil Nazirliyinin və səfirliyimizin saytlarında rus, ingilis və rumın dillərində məlumatlar verilmişdir. Tədbirdə çıxış edən Moldova təhsil nazirinin müavini L.Xandrabura və başqaları müsabiqənin təşkilatçılarına təşəkkürlərini bildirmiş, qaliblərin Bakıya səfərinin əhəmiyyətindən, gənclərimizin dostluq əlaqələrindən danışmışlar.

Sonda doqquz mövzuda aparılan müsabiqənin 12 qalibinə və 4 fəal iştirakçıya səfirliyin diplomu, xatirə hədiyyələri təqdim edilmiş, onlar ölkəmizə səfər etmək imkanı əldə etmişlər.

Müsabiqədə qalib gəlmiş mövzular səfirlik tərəfindən xüsusi kitab şəklində çap olunacaqdır.

Valeh

Səs.- 2011.- 9 iyul.- S. 14.