MİLLİ TALEYİMİZDƏ DÖNÜŞ YARADAN ŞƏRƏFLİ TARİX

XX əsr Azərbaycan tarixinin fenomen şəxsiyyəti, dünyamiqyaslı ictimai-siyasi xadim, Ulu Öndərimiz Heydər Əliyev bütün həyatını xalqının nicatına həsr etmiş, müasir Azərbaycan dövlətçiliyinin ideoloji-siyasi əsaslarını yaratmış, dövlət müstəqilliyinin daimi və dönməz olmasını təmin etmişdir. Qərinələr boyu əxz etdiyi dövlətçilik təfəkkürünü, özünəməxsus milli-mənəvi dəyərləri, adət-ənənələri, mental xüsusiyyətləri müdrik rəhbərinin iradəsi, qətiyyəti sayəsində vahid sistem halına gətirərək özünütəsdiq imkanı qazanmış xalqımız, hələ keçmiş ittifaq dövründə gələcək müstəqilliyinə etibarlı təməl formalaşdıra bilmişdir.

Ümummilli liderimiz Heydər Əliyevin 1969-1982-ci illərdə Azərbaycan Kommunist Partiyası Mərkəzi Komitəsinin birinci katibi olaraq ölkəmizə rəhbərlik etdiyi bu dövrlər ərzində ölkədə bütün sahələrin böyük sıçrayışla inkişafını təmin etmiş, qəbul etdiyi qərarlar və atdığı addımlarla ölkəmizi keçmiş SSRİ-nin ən qabaqcıl inkişaf edən respublikalarından birinə çevirmişdir. Ümummilli Lider Heydər Əliyev müstəqil Azərbaycan dövlətinin təməlini hələ 1969-cu ildə 14 iyul tarixindən - respublikaya birinci rəhbərlik dövründən qoymuşdur. Bu tarixdə Azərbaycan Kommunist Partiyası Mərkəzi Komitəsinin birinci katibi postuna dövlətini, millətini sevən, onun taleyini öz taleyi bilən Ulu Öndər Heydər Əliyev seçildi.

Ümummilli Lider Heydər Əliyev o dövrdə respublikanın üzləşdiyi problemləri ilk gündən düzgün müəyyənləşdirməklə, onların həlli üçün lazımi iradə, qətiyyət və prinsipiallıq göstərmiş, hər cür riskə rəğmən, o dövrün naqisliklərini açıq deməkdən çəkinməmişdir. Bu baxımdan Heydər Əliyevin Azərbaycan KP MK-nın 5 avqust 1969-cu il tarixli plenumundakı dərin məzmunlu, eyni zamanda, tənqidi ruhlu çıxışı sovet Azərbaycanını problemlər məngənəsindən dinamik inkişaf yoluna çıxaran pozitiv prosesin başlanğıcı kimi ehtiramla xatırlanır. Plenumda çıxış edən Ulu Öndər Heydər Əliyev mövcud problemləri konkret şəkildə, çılpaqlığı ilə önə çəkmiş, dövlət idarəçiliyi sistemində formalaşmış bürokratiya və korrupsiya kimi neqativ tendensiyaların yolverilməz olduğunu bəyan etmişdir. Zəngin təbii sərvətlərinə, istehsal potensialına baxmayaraq, Azərbaycanın keçmiş sovetlər məkanında geridə qalmış respublikalar sırasına düşməsinin səbəblərini araşdıran Heydər Əliyev elə ilk vaxtlardan iqtisadi inkişafa xidmət edən kompleks tədbirlərin həyata keçirilməsini təmin etməklə, peşəkar strateq və müdrik dövlət xadimi olduğunu sübuta yetirmişdir. Ulu Öndərin qənaətincə, Azərbaycanda, ilk növbədə, milli-mənəvi ruh yüksəldilməli, azərbaycanlıların öz ənənələrinə, köklərinə bağlılığı sürətləndirilməli, xalqın müstəqil yaşaya bilməsi üçün lazım olan maddi-texniki baza yaradılmalı idi. Belə böhranlı şəraitdə respublikamıza rəhbər təyin olunan Heydər Əliyev durğunluq girdabında çabalayan Azərbaycanın simasını tamamilə yeniləşdirmiş, əsassız ərazi iddialarının gerçəkləşməsi üçün fürsət axtaran ermənilərin arzularını gözündə qoymuşdur. 1970-ci ilin əvvəllərində Azərbaycan KP MK-nın birinci katibi Heydər Əliyev belə bir fikir irəli sürdü ki, Azərbaycan uzun müddət aqrar ölkə kimi qala bilməz. Azərbaycanın inkişaf etmiş sənaye ölkəsinə çevrilməsi üçün yetərli imkan və şərait var. Biz ölkənin və SSRİ-nin potensial imkanından maksimum istifadə etməklə, öz sənayemizi inkişaf etdirməliyik. Ulu Öndər Heydər Əliyev isə Azərbaycan sənayesinin strateji proqramını hazırladı, həyata keçirdi. Az müddətdə yüngül sənaye, tikinti sənayesi, cihaz və neft maşınqayırma sənayesi 1970-ci illərdə 1960-cı illərdəki səviyyəsini on dəfədən çox ötüb keçdi. 1980-ci ildə 1969-cu ildəkinə nisbətən pambıq istehsalı 8 dəfə, üzüm istehsalı 20 dəfə, tərəvəz istehsalı 12 dəfə artdı. Ulu Öndərimiz gərgin əməyi, qətiyyəti, fitri idarəçilik qabiliyyəti və vətənpərvərliyi sayəsində Azərbaycan keçmiş ittifaqın geridə qalmış əyalətindən bütün sahələrdə sürətlə inkişaf edən, yüksələn respublikaya çevrilmişdir.

Dahi Öndər Heydər Əliyevin təşəbbüsü və gərgin əməyi nəticəsində C.Naxçıvanski adına hərbi məktəbin açılması Azərbaycanın həyatında çox mühüm bir hadisə oldu. İlk dəfə olaraq ölkədə hərbi kadrlar yetişdirilməyə başlandı. Bundan başqa, azərbaycanlı gənclərin SSRİ-nin adlı-sanlı ali hərbi məktəblərinə göndərilməsinin də təşəbbüskarı məhz Ulu Öndər Heydər Əliyev oldu. Biz bu addımın da vacibliyini müstəqillik qazandıqdan sonra, erməni təcavüzkarlığı ilə qarşılaşanda bir daha dərk etdik, Ümummilli Liderimiz Heydər Əliyevin hər bir addımının müstəqilliyə hesablandığının bir daha şahidi olduq.

Ümummilli Lider Heydər Əliyev hələ o dövrlərdən milli inkişafın yeganə yolunu xalqın yüksək təhsil almasında, maariflənməsində görmüş, respublikada elmin inkişafı üçün bütün zəruri tədbirləri həyata keçirmişdir. Həmin illərdə respublikamızda məktəb tikintisi prosesinin sürətlənməsi, maarif işinin yüksək səviyyədə təşkili, ixtisaslı kadrlar hazırlayan yeni ali məktəblərin açılması, fundamental və humanitar elmlərin inkişafı, əldə olunan kəşflərin iqtisadiyyatın bütün sahələrində tətbiqi Ulu Öndərimizin təhsil siyasətinin əsas leytmotivini təşkil etmişdir. Məhz Ümummilli Liderimizin şəxsi müdaxiləsi və qayğısı ilə 70-ci illərdən başlayaraq Bakıdakı ali hərbi məktəblərə qəbul olunan gənclərin sırasında azərbaycanlıların sayı intensiv şəkildə artmağa başlamış, bu sahədə milliləşdirmə prosesinə start verilmişdir.

Bir məqamı xüsusi vurğulamaq istərdim. Vəzifə həmişə insanlardan yüksək məsuliyyət tələb edir. Xalqı tərəfindən həmişə sevilən Ümummilli Liderimiz Heydər Əliyev bütün mənalı həyatını Azərbaycanın çiçəklənməsinə, qüdrətlənməsinə, insanların firavan yaşamasına həsr etmişdi. Məhz elə buna görə də xalqımız bu dahi şəxsiyyəti ölkənin başının üstünü qara buludlar aldığı təlatümlü günlərdə yenidən hakimiyyətə gətirdi. Ulu Öndər Heydər Əliyevi nadir dövlət xadimi edən, Onu ucalara qaldıran, xalqın Ümummilli Liderinə çevirən keyfiyyətlərdən birincisi Onun xalqına qırılmaz tellərlə bağlı olması idi. Bütün şərəfli ömrünü xalqının rifahının yaxşılaşdırılmasına, Azərbaycanın tanınmasına, onun beynəlxalq nüfuzunun artırılmasına sərf etdi və xalqına namuslu xidməti hər şeydən uca tutdu. İqtisadiyyatın səmərəliliyini yüksəltmək, keyfiyyət göstəricilərini yaxşılaşdırmaq həmişə diqqət mərkəzində durmuşdur. İctimai əməyin məhsuldarlığı üç beşillikdə 80 faiz artmış, milli gəlir artımının dörddə üç hissəsi bu amil hesabına əldə edilmişdir. Xalq təsərrüfatının inkişafına kapital qoyuluşu xeyli artmış, 270-dən çox iri müəssisə, sex, istehsal sahəsi tikilmişdir. Şamxor SES, Azərbaycan DRES işə düşmüş, dənizin dərinliyi 110-120 metrə çatan yerlərdə quyular qazılması neft-qaz hasilatının inkişafında keyfiyyətcə yeni addım olmuşdur. Həmçinin, Bakı Metropoliteninin ikinci növbəsi işə düşmüş, Yevlax-Balakən dəmir yolunun tikilməsi başa çatdırılmışdır. Bu yolun çəkilişi başa çatdıqdan sonra, onun yaxınlığındakı şəhərlərin və rayonların sürətlə inkişaf etməsi, buradakı zəngin iqtisadi və təbii ehtiyatların təsərrüfat dövriyyəsinə fəal cəlb olunması üçün əlverişli şərait yaranmışdır. O dövrdə memarlığımızın qızıl fonduna daxil olmuş bina və komplekslər: Prezident İqamətgahı, Prezident Aparatı, Dövlət Təhlükəsizlik Komitəsinin binası, şəhərin mərkəzi, Azadlıq meydanındakı kompleks, “Gülüstan” sarayı, “Respublika” sarayı, Bakı Kondisioner Zavodu, Dərin Dəniz Özülləri Zavodu, 310 metrlik televiziya qülləsi, Rəqəmli Sistem Aparatları Zavodu, “Ulduz”, “Elektroterm” zavodları, İdman Sarayı kompleksi, Şərq bazarı kompleksi, Neft Daşlarında ictimai yaşayış binaları kompleksi tikilmişdir.

Ümummilli Liderimiz Heydər Əliyev azərbaycanlı olduğu üçün özünü xoşbəxt sanırdı. Azərbaycan xalqı da, bütün dünyanın qibtə edəcəyi Heydər Əliyev kimi Prezidenti olduğu üçün xoşbəxt idi. İndi də ona görə xoşbəxtdir ki, əsası Heydər Əliyev tərəfindən qoyulan bu xoşbəxtliyə Heydər Əliyev idarəçilik məktəbinin layiqli davamçısı, Azərbaycan Prezidenti İlham Əliyev tərəfindən möhkəm və sarsılmaz təminat yaradılmışdır.

Bəli, Ulu Öndər Heydər Əliyev həyatını cismən başa vursa da, ruhən bizimlədir, fəaliyyətimizin, nailiyyətimizin istiqamətvericisidir. Heydər Əliyev əbədi yaşardır, O, dünya durduqca Azərbaycan xalqının qəlbində yaşayacaq, bütün insanlar tərəfindən həmişə ən görkəmli ictimai-siyasi və dövlət xadimi kimi xatırlanacaqdır.

NƏSİB MƏHƏMƏLİYEV,

Nəsimi rayon

icra hakimiyyətinin başçısı

Səs.- 2011.- 9 iyul.- S. 4.