Çoxəsrlik dövlətçiliyimiz tarixində ulu öndər Heydər Əliyevin müstəsna xidmətləri vardır

- Azərbaycanın dövlət müstəqilliyinin yenidən bərpa olunmasının 20 ili tamam olur. Amma gerçəklik budur ki, Azərbaycanın müstəqil dövlət quruculuğuna aparan yolu, əslində, 1969-cu ildən- ulu öndər Heydər Əliyevin hakimiyyətə gəlişindən sonra başlamışdır...

- Əlbəttə, bu inkaredilməz faktdır ki, çoxəsrlik dövlətçiliyimiz tarixində ümummilli lider Heydər Əliyevin müstəsna xidmətləri vardır. Ulu öndər bildirirdi ki, milli azadlığa nail olmaq üçün milli oyanış, dirçəliş, milli ruhun canlanması lazımdır. Heydər Əliyevin 1969-1982-ci illərdə Azərbaycana rəhbərlik etdiyi dövrdə görülən işlər nəticəsində milli ruhun yüksəlişi təmin edilmiş, milli dövlətçilik ideyasının gələcəkdə böyük hərəkətverici qüvvəyə çevrilməsi üçün mühüm zəmin yaranmışdır. Bu baxımdan ümummilli liderin ölkə rəhbərliyinə gəlişindən sonrakı dövr milli özünüdərkin, milli özünəqayıdışın başlanğıcı kimi qəbul edilir. Azərbaycanın xoşbəxt gələcəyinə böyük inam bəsləyən Heydər Əliyev eyni zamanda buna nail olmağın yollarını da müəyyənləşdirdi.

“Millətin siyasi müstəqilliyinin özülünü onun iqtisadi cəhətdən azadlığı şərtləndirir” söyləyən ulu öndər Heydər Əliyev hakimiyyətinin hər iki dövründə ölkənin iqtisadi inkişafına xüsusi diqqət göstərdi. 1969-82-cı illərdə respublikada yaranmış ağır iqtisadi böhrandan çıxış yolları tapıldı, onun iqtisadiyyatda köklü struktur dəyişiklikləri aparıldı, təsərrüfatçılıqda yeni üsullar tətbiq olunmağa başlandı. Ulu öndər Heydər Əliyevin gərgin fəaliyyətinin nəticəsidir ki, 1970-1980-ci illər Azərbaycanın quruculuq səlnaməsində ictimai və iqtisadi sahədəki dərin islahatların səviyyəsinə, xalqın sosial rifah halının keyfiyyətcə yeni mərhələyə keçməsinə görə ən parlaq səhifələr təşkil etmişdir.

Hazırkı dövrdə Azərbaycanın iqtisadi müstəqilliyi, xarici iqtisadi əlaqələrinin sistemli olaraq genişlənməsi və dünya iqtisadiyyatına inteqrasiya prosesi hələ 1970-1980-ci illərdə Heydər Əliyev tərəfindən təməli qoyulmuş potensiala əsaslanır.

- Ulu öndər Heydər Əliyevin 1993-cü ildə hakimiyyətə qayıdışı da Azərbaycanın düşdüyü ağır vəziyyətdən xilas edilməsi ilə bağlıdır. Tarixə diqqət yetirdikdə ümummilli liderin fəaliyyətinin əsas istiqaməti olan xilaskarlıq missiyası daha çox önə çəkilir. Bu missiyanı şərtləndirən amillər hansılardır?

- 15 iyun 1993-cü ilin tarixə Milli Qurtuluş kimi daxil olması nəinki ulu öndər Heydər Əliyevin xilaskarlıq missiyasının, eyni zamanda Azərbaycanın bugünkü reallıqlarının başlanğıcının təsdiqidir. Azərbaycan xalqı daim azadlıq, müstəqillik uğrunda mübarizə aparmış, bu istəyinə nail olmaq üçün böyük qurbanlar vermişdir. 1991-ci ilin 18 oktyabrında Azərbaycanın Dövlət Müstəqilliyi Aktının qəbul olunmasına baxmayaraq ilk illərdə ölkəyə idarəçilik qabiliyyəti olmayan, öz şəxsi maraqlarını dövlətin mənafeyindən üstün tutan şəxslərin rəhbərlik etməsi Azərbaycanı böyük uçurum qarşısında qoymuşdur. Belə bir ağır durumda ulu öndər Heydər Əliyev xalqın köməyinə gəldi. Həmin dövrün hadisələri yaddaşlarda olsa da onların daim təkrarlanmasına, gələcək nəsillərə çatdırılmasına böyük ehtiyac var. Bu da səbəbsiz deyil. Ulu öndər Heydər Əliyev daim çıxışlarında bildirirdi ki, indiki nəsil Azərbaycanın müstəqillik yolunun nə qədər ağır dövrdən keçməsindən xəbərsizdir. Onlara həmin dövrün reallıqlarını çatdırmaq, bugünkü inkişafa nail olmaq üçün hansı çətinliklərdən keçildiyini aşılamaq lazımdır.

Dövlət başçısı İlham Əliyev bildirir: “İyirmi il həm böyük, həm də çox da böyük olmayan müddətdir. İyirmi il ərzində çox iş görmək olar, heç nə görməmək də olar. Azərbaycanda son 17 ildə, müstəqilliyimizin birinci iki ilini çıxmaq şərti ilə, doğrudan da tarixi nailiyyətlər əldə edilmişdir. Bu gün danışdığımız bütün uğurlar bu müstəqilliyin nəticəsidir”

Qazanılan uğurların təməlində ulu öndər Heydər Əliyevin xilaskarlıq missiyası, ondan sonrakı dövrlərdə həyata keçirdiyi düşünülmüş və məqsədyönlü siyasət dayanır. Cənab İlham Əliyev ulu öndər Heydər Əliyevin möhkəm təməl üzərində qurduğu həmin xətti uğurla davam etdirməklə Azərbaycanı ən yüksək zirvələrə yüksəldir. Uğurlarımızın biri-birini əvəzləməsinə baxmayaraq, dövlət başçısı bildirir ki, biz daim irəliyə baxmalıyıq. Azərbaycanın artan iqtisad imkanları, siyasi mövqeyi, beynəlxalq aləmdə nüfuzu daha mühüm uğurlara yol açır.

- Heydər Əliyevin dövlətçilik strateji proqramında azərbaycançılıq ideyasına bağlılıq, bütün soydaşlarımızın bir amal ətrafında birliyi daha vacib şərt kimi irəli sürülmüşdür. Bu gün müstəqil Azərbaycanımızın uğurlarında bu amilin rolunu necə görürsünüz?

- Bildiyiniz kimi, bu günlərdə Bakıda Dünya azərbaycanlılarının III qurultayı keçirildi. Qurultayda çıxışı zamanı dövlət başçısı İlham Əliyev diaspor quruculuğu sahəsində görülən işləri önə çəkməklə yanaşı, mövcud problemləri və onların həlli yollarını da diqqətə çatdırdı. Diaspor təşkilatlarının birliyinin artırılması daha vacib amil kimi vurğulandı. Qeyd edək ki, Dünya azərbaycanlılarının vahid mərkəzdən idarə olunmasının vacibliyi məsələsi ulu öndər Heydər Əliyev tərəfindən irəli sürülmüşdür. Bu addım nə zaman atıldı?

Ulu öndər Heydər Əliyev bildirirdi ki, dünyanın müxtəlif ölkələrində məskunlaşmış soydaşlarımızın həmrəyliyinə nail olmaq üçün öncə ayrı-ayrı ölkələrdə yaşayan azərbaycanlıların birliyi gərəkdir. Həmin dövrdə müxtəlif ölkələrdə Azərbaycan mərkəzləri, cəmiyyətləri yaradıldı. Sonra onların vahid mərkəzdən idarə olunması təşəbbüsü irəli sürüldu. Ulu öndər Heydər Əliyevin 23 may 2001-ci il tarixli sərəncamı ilə həmin ilin noyabrın 9-10-da Dünya azərbaycanlılarının I qurultayı keçirildi. Bu qurultay diaspor quruculuğu prosesinin inkişafında yeni bir mərhələnin başlanğıcı oldu. 2002-ci ildə Xaricdə Yaşayan Azərbaycanlılarla İş üzrə Dövlət Komitəsi yaradıldı. Hazırda bu komitə Diasporla İş üzrə Dövlət Komitəsi adı altında fəaliyyətini davam etdirir. Komitənin müxtəlif ölkələrdə fəaliyyət göstərən diaspor təşkilatları ilə birgə əlaqələrinin qurulması sözsüz ki, birliyimizə, həmrəyliyimizə öz müsbət təsirini göstərir.

Ulu öndər Heydər Əliyev bu birliyin zəruriliyini bu səbəbdən bildirirdi ki, hər bir dövlətin özünü dünyada təsdiqləməsində xarici siyasətinin düzgün qurulması vacib şərtdir. Diaspor quruculuğu da xarici siyasətin əsas tərkib hissələrindəndir. Digər tərəfdən bir faktı da unutmayaq ki, dünyada azərbaycanlılara və türklərə qarşı əsassız təbliğat aparan erməni diasporu fəaliyyət göstərir. Bu gün onların Azərbaycan diasporunun güclənməsi nəticəsində dünyada cərəyan edən proseslərə təsir imkanları zəif olsa da vaxtilə bu imkanların mövcudluğu erməni yalanlarının ayaq tutub yeriməsinə, ölkəmizə qarşı ədalətsiz qərarların qəbuluna səbəb olmuşdur. Bu günə qədər birdəfəlik ləğvi mümkünsüz olan “Azadlığa Dəstək Aktına” ədalətsiz 907-ci düzəlişin edilməsi də erməni diasporunun gərgin əməyinin nəticəsidir.

Müharibə şəraitində yaşayan ölkəyik. Həqiqətlərimizin dünya ictimaiyyətinə çatdırılmasında Dünya azərbaycanlılarının da üzərinə böyük məsuliyyət düşür. Dövlət başçısı İlham Əliyev III qurultayda çıxışı zamanı bu məsələni önə çəkərək diaspor təşkilatları ilə həmin ölkələrdə fəaliyyət göstərən səfirliklərimizin birgə fəaliyyətinin vacibliyini qeyd etdi. Bu birlik nə qədər güclü olarsa, həqiqətlərimizi beynəlxalq ictimaiyyətə daha dolğun şəkildə çatdırmaq olar. Bir sözlə, ulu öndər Heydər Əliyevin “Hamımızın ümumi vəzifəmiz xalqımızda vətənpərvərlik, vətənə, torpağa, millətə sədaqət, Vətən yolunda şəhidliyə hazır olmaq hisslərini formalaşdırmaq, inkişaf etdirmək və təbliğ etməkdir” tezisi harda yaşamasından, hansı vəzifədə çalışmasından asılı olmayaraq hər bir Azərbaycan vətəndaşının fəaliyyətinin əsas prinsipinə çevrilməlidir. Möhtərəm Prezidentimiz İlham Əliyevin qeyd etdiyi kimi, gündən-günə güclənən Azərbaycan qürur mənbəyimizdir.

- Bu günün əsas çağırışlarından biri iqtisadi inkişafın gələcək istiqamətlərinin müəyyənləşdirilməsinin güclü elmi əsaslara söykənməsidir. Bununla bağlı fikirlərinizi bilmək istərdik.

- Ölkəmizin iqtisadi sahədə əməkdaşlığına geniş imkan yaradan amillərdən biri də elmi, intelektual potensialıdır. Azərbaycan Milli Elmlər Akademiyasının illik ümumi yığıncağında da dövlət başçısı İlham Əliyev ölkəmizin bugünkü uğurlarında elmin rolunu xüsusi vurğulayaraq bildirmişdir ki, müasir dövlətin qurulması elmin inkişafı olmadan mümkün deyildir. Ölkəmiz bu gün bütün sahələrdə mühüm uğurlara imza atıb. Bu uğurların davamlılığını təmin etmək üçün dövlət başçısı İlham Əliyev kadr hazırlığını iqtisadi inkişafın səviyyəsinə uyğunlaşdırmağı qarşıya ən mühüm vəzifə kimi qoyur. Hər bir dövrün öz çağırışları, tələbləri var. Dövlət başçısı bildirmişdir ki, bütün dövrlərdə alimlərimiz Azərbaycanın müxtəlif istiqamətlərdə inkişafına dəyərli töhfələrini vermişdir. İqtisadi inkişafın böyük sürət aldığı, müstəqilliyimizin daha da möhkəmləndiyi bir dövrdə elmi potensialın gücləndirilməsinə böyük ehtiyac var.

Qeyd etdiyimiz kimi, bu il müstəqiliyimizin yenidən bərpa olunmasının 20 ili tamam olur. Azərbaycanın ötən bu dövr ərzində qazandığı uğurlar göz qabağındadır. Bütün inkişafın təməli kimi dəyərləndirilən sabtiliyin ölkəmizdə yüksək səviyyədə qorunması uğurların bir-birini əvzələməsinə geniş imkanlar açır. Bu gün Azərbaycanla iqtisadi əlaqələrin qurulmasında maraqlı olan dövlətlərin sayı sürətlə artır. Ölkəmizin malik olduğu təbii resurslardan səmərəli istifadəsi beynəlxalq əhəmiyyətli layihələrin icrasına, eyni zamanda maliyyə imkanlarının artmasına yol açır. Akademiyanın illik ümumi yığıncağında Prezident İlham Əliyev bu faktı xüsusi qeyd etmişdir ki, əgər vaxtilə alimlərimiz böyük neft-qaz yataqlarını kəşf etməsəydilər və Azərbaycanın bu təbii resursları olmasaydı, müstəqil həyatımız başqa istiqamətdə inkişaf edə bilərdi. Müstəqil siyasət aparmaq, iqtisadi, o cümlədən enerji sahəsində müstəqil təşəbbüsləri irəli sürmək maliyyə, iqtisadi və siyasi cəhətdən böyük imkanlar tələb edir. Bu gün Azərbaycanın iştirakı olmadan enerji, həmçinin nəqliyyat və iqtisadiyyat sahəsində heç bir təşəbbüs irəli sürülə bilməz. Azərbaycan enerji resurslarından əməkdaşlıq əlaqələrinin daha da möhkəmləndirilməsi, milli maraqlarımızın təmin edilməsi və ölkəmizin qüdrətlənməsi naminə istifadə edir.

Bu da inkaredilməz faktdır ki, respublikamızda elm və təhsilin maddi-texniki bazası və kadr potensialı əsasən XX əsr ərzində formalaşmışdır. 1970-1980-ci illərdə ulu öndər Heydər Əliyevin bilavasitə təşəbbüsu ilə gənclərin keçmiş ittifaqın müxtəlif ali məktəblərinə kütləvi şəkildə göndərilməsi yüksək ixtisaslı mütəxəssislərlə təminat baxımından respublikanın qabaqcıl mövqelərə çıxmasına imkan yaratmışdı.

Qeyd etdiklərim bir daha bu həqiqəti təsdiqləyir ki, müstəqilliyimizin yenidən bərpa edilməsindən sonrakı dövrdə əldə olunan nailiyyətlərin əsası 1969-cu ildən qoyulmuş və ulu öndər Heydər Əliyev duhasının təntənəsi kimi tarixdə yer almışdır. Düzgün qurulan siyasət daim ölkəni inkişafa, tərəqqiyə aparar. Nazirlər Kabinetinin bu günlərdə keçirilən 2011-ci ilin birinci yarısının sosial-iqtisadi inkişafının yekunlarına həsr olunmuş iclasında möhtərəm Prezidentimiz İlham Əliyev bir daha ölkəmizin uğurlarına diqqəti yönəldərək bildirdi ki, bütün sahələr üzrə proqramların mövcudluğu, onların xalq tərəfindən dəstəklənməsi və uğurlu icrası nəticəsində Azərbaycan sürətlə inkişaf edir və yaxın zamanlarda dünyanın inkişaf etmiş ölkələri sırasına daxil ediləcəkdir. Bununla da ölkəmizin uzunmüddətli və dayanıqlı inkişafına nail olacağıq.

Səs.- 2011.- 16 iyul.- S. 7.