Azərbaycan muğamına həsr olunmuş festival böyük maraqla qarşılanıb

Beynəlxalq müsabiqənin münsiflər heyətinə dünya şöhrətli musiqiçilər qatılıblar

Son illər YUNESKO-nun və İSESKO-nun xoşməramlı səfiri, Heydər Əliyev Fondunun Prezidenti Mehriban xanım Əliyevanın təşəbbüsü və rəhbərliyi altında həyata keçirilən geniş sayda mədəniyyət layihələri Azərbaycan mədəniyyətinin inkişafı və təbliğini yüksək, yeni bir səviyyəyə qaldırıb. YUNESKO tərəfindən bəşər mədəniyyətinin incisi elan edilmiş Azərbaycan muğamına həsr olunmuş beynəlxalq muğam festivalları böyük maraqla qarşılanaraq, dünyada geniş əks-səda doğurub.

Bu günlərdə Heydər Əliyev Fondunun daha bir möhtəşəm beynəlxalq layihəsi - III Qəbələ Beynəlxalq Musiqi Festivalı öz işinə başladı. Festival çərçivəsində konsertlərdə görkəmli musiqiçilər, bədii kollektivlər, solistlər, dirijorlar iştirak edirlər. III Beynəlxalq Musiqi Festivalı çərçivəsində Pianoçuların II Beynəlxalq Müsabiqəsi də təşkil olunub. Festivalda Rusiya, Böyük Britaniya, İsrail, ABŞ, Norveç, Hollandiya, İtaliya, Fransa, Almaniyadan dünya şöhrətli musiqiçilər və kollektivlər - Yuri Başmet və “Yeni Rusiya” simfonik orkestri, Boris Berezovski, Denis Matsuyev, Sergey Krılov, Anna Samuil, Sergey Leyferkus, Oksana Yablonskaya, Dmitri Yablonski, Massimiliano Pisapia və başqaları iştirak edirlər. Qeyd edək ki, keçirilən festivala təşkilati dəstək Mədəniyyət və Turizm Nazirliyidir.

Heydər Əliyev Fondu tərəfindən Qəbələdə keçirilən III Beynəlxalq Musiqi Festivalı çərçivəsində Pianoçuların II Beynəlxalq Müsabiqəsi müvəffəqiyyətlə davam etməkdədir. İyulun 17-də Qəbələ şəhərindəki “Qafqaz Resorte” otelində müsabiqənin ikinci turu başlanıb. İki gün davam edəcək bu turda 7 ölkədən 11 pianoçu, o cümlədən, Rusiyadan Andrey Yaroşinski, Meksikadan Abdiel Yarquez, Azərbaycandan Nərgiz Kəngərli, Yaponiyadan Mizuho Nakada, Rusiya-Azərbaycandan Fatimə Əliyeva, Gürcüstandan Daniel Kontuaşvili, Ketevan Cakarataşvili, Aleksandr Vaşadze, Anna Kipiani, Ukraynadan Aleksandr Samoylov və Türkiyədən Eren Aydoğan müsabiqənin finalına çıxmaq uğrunda mübarizə aparırlar.

Festivalın proqramına uyğun olaraq, bu mərhələdə gənc pianoçuların hər biri ümumilikdə 50 dəqiqə ərzində 4 əsər ifa etməli olacaq. İkinci turun ilk günündə 6 pianoçu dünya şöhrətli bəstəkarlardan L.V.Bethovenin sonatasını, F.Listin etüdünü, Tofiq Quliyevin “Qaytağı” əsərini ifa edib. Həmçinin, iştirakçılar öz istəklərinə uyğun olaraq İ.Bramsın, R.Şumanın, S.Raxmaninovun bir romantik əsərini də səsləndirmişlər. Bu turun ikinci günündə isə 5 pianoçu məharətini nümayiş etdirəcək.

3 turdan ibarət olacaq Pianoçuların II Beynəlxalq Müsabiqəsinin final mərhələsi iyulun 21-22-də keçiriləcək. Finala vəsiqə qazanmış iştirakçılar Üzeyir Hacıbəyli adına Azərbaycan Dövlət Simfonik Orkestri ilə birgə çıxış edəcəklər.

Qeyd edək ki, beynəlxalq müsabiqənin münsiflər heyətinə dünya şöhrətli musiqiçilər İtaliyadan Serjio Pertikaroli, İspaniyadan Xoakin Soriano, Gürcüstandan Manana Doijaşvili, Azərbaycan-ABŞ Validə Suk, Azərbaycandan Oqtay Abasquliyev, ABŞ-dan Oksana Yablonskaya, Norveçdən Eynar Stin Nokleberq, Meksikadan Mirtala Salazar, Koreyadan Su Hyun Yu, ABŞ-İngiltərədən Ceremi Zipman Tayler, İsraildən Leonid Rozenberq, ABŞ-Çindən Bey-Hua Jaklin Tanq daxildirlər. Münsiflər heyətinin sədri, amerikalı pianoçu, BMT yanında Beynəlxalq İncəsənət Akademiyasının fəxri akademiki, ABŞ-dakı Culiard Musiqi Akademiyasının professoru Oksana Yablonskayadır.

Müsabiqə çərçivəsində amerikalı pianoçu Oksana Yablonskayanın rəhbərliyi ilə gənc ifaçılar üçün dünya şöhrətli musiqiçilərin və münsiflər heyətinin tanınmış üzvlərinin ustad dərsləri təşkil olunacaqdır.

Pianoçuların beynəlxalq müsabiqəsi yeni istedadların aşkarlanmasına, gənclərin peşəkarlarla görüşünə və onlardan bu sahənin incəliklərini öyrənməyə imkan verir.

Zümrüd

Səs.- 2011.- 19 iyul.- S. 12.