Heydər Əliyev Fondu yeni bir layihəyə imza atdı

Gündəm

Tarixi köklərə bağlı olan Azərbaycan mədəniyyəti xalqın milli- mənəvi dəyərlərini, tarixini aşkar edən, onun yaranmasının kökündə olan fərdi amilləri üzə çıxaran əsas sahələrdən biri olaraq qiymətləndirilir. Yazılı mənbələr, qədim daş salnamələr, eləcə də, bu nümunələri yaradan görkəmli simalar Azərbaycan mədəniyyətini ön plana çəkərək dünyada dövlətin tanınmasında və sərhədsiz məkanda özünün təsdiqləməsində nəyə qadir olmasını üzə çıxarır.

Bu gün Azərbaycan mədəniyyəti dünyaya qapı açır, dünyanın ən məşhur salonlarından Azərbaycan mədəniyyətinin sədası eşidilir. Bu, ölkə rəhbərinin mədəniyyət siyasətinin nəticəsi olaraq özünü göstərir. Əsası Ümumilli Lider Heydər Əliyev tərəfindən qoyulmuş mədəniyyət siyasəti böyük sənətkarları dünya ictimaiyyətinə tanış etməkdə əsas vasitəyə çevrildi. Bu gün Avropada, Asiyada Azərbaycan milli mədəniyyətinin bütün növləri geniş bir şəkildə təbliğ olunur. Heydər Əliyev ideologiyasını davam etdirən Heydər Əliyev Fondu bu xəttin davamında fəaliyyətini qurub. Ardıcıl olaraq təşkil etdiyi tədbirlər Heydər Əliyevin mədəniyyət siyasətini layiqli bir şəkildə dünya miqyasında təbliğinə yol açır.

Azərbaycanın ərazisində və xaricdə aktual mövzulara dair beynəlxalq konfrans və seminarların təşkili də məhz bu ideloji xətti, məqsədi həyata keçirir. Bir-birinin ardınca reallaşan beynəlxalq səviyyəli tədbirlərdə Heydər Əliyev Fondunun prezidenti, YUNESKO-nun və İSESKO-nun xoş məramlı səfiri, Milli Məclisin deputatı Mehriban xanım Əliyeva Azərbaycan milli mədəniyyətinin, klassik irsinin dünya ictimaiyyətinə çatdırılmasına töhfələrin verir. Beynəlxalq Muğam Festivalı və Muğam İfaçılarının Müsabiqəsi, M.Rastropoviç adına, eləcə də, D.Şostakoviçin və Bülbülün yubileylərinə həsr edilmiş beynəlxalq festivallar, Qəbələ Musiqi Festivalı, Aşıqların Beynəlxalq Festivalı kimi tədbirlər məhz Mehriban Əliyevanın yaxından dəstəyi ilə həyata keçirilib. Azərbaycanın birinci xanımının təşəbbüsü ilə Bakıda Beynəlxalq Muğam Teatrının, Müasir İncəsənət Muzeyinin binaları tikilmiş, açıq səma altında “Qala” arxeoloji-etnoqrafik muzey kompleksi yaradılıb. Mehriban Əliyevanın çoxşaxəli fəaliyyəti nəticəsində reallaşan “Muğam Müsabiqəsi - 2011” Azərbaycan muğam sənətinin qorunub saxlanılmasına, təbliğinə və inkişaf etdirilməsinə səbəb oldu. Muğam sənəti sahəsində yeni istedadların üzə çıxarılmasında Heydər Əliyev Fondunun rolunu xüsusi olaraq qeyd etməliyik.

Fondun müxtəlif məzmunda təşkil olunan tədbirlər şaxəliyi ilə yadda qalır. Elə bu günlədər Bakıda, İçərişəhərdə təşkil olunan “Qız qalası” İkinci Beynəlxalq İncəsənət Festivalı da mədəniyyətlərarası dialoqa xüsusi töhfə verən möhtəşəm tədbirlər sırasındadır. “Qız qalası” Beynəlxalq İncəsənət Festivalı 2010-cu ildən etibarən Heydər Əliyev Fondunun təşəbbüsü ilə keçirilir. “Qız qalası” İkinci Beynəlxalq İncəsənət Festivalı da Azərbaycanın ən qədim və sirlərlə dolu dünya əhəmiyyətli abidələrindən olan Qız qalasının təbliğini qarşısına məqsəd qoymuşdur. YUNESKO-nun Dünya İrs Siyahısına daxil edilmiş İçərişəhərin ərazisində yerləşən və Odlar Yurdunun rəmzi hesab olunan bu abidə Azərbaycanın qədim tarixinin və memarlığının incisi olmaqla yanaşı, ümumbəşəri mədəni irsi zənginləşdirir. Festivalının keçirilməsi artıq ənənə halını alıb. Azərbaycanın ən qədim abidələrindən biri olan Qız qalasının daha geniş tanınması və populyarlaşdırılması məqsədini daşıyan bu festival hər dəfə bir yeniliyi ilə yadda qalır. Ötən il Azərbaycanın birinci xanımı Mehriban xanım Əliyeva müəllifi olduğu əsəri təqdim etməklə festivala öz dəstəyini vermişdi. Bu il isə Leyla xanım Əliyevanın əsəri festivalda nümayiş olundu. Müxtəlif ölkələrdən gəlmiş rəssamlar Qız qalasının maketlərini milli üslublarında bəzəyərək fərqli mədəniyyət və adət-ənənələrin sintezini əks etdirən əsərlər yaratmışlar. İçərişəhərdə Bakı sakinləri və şəhərimizin qonaqları üçün rəssamların yaratdıqları bu işlərdən ibarət sərgi təşkil edilib. Bununla yanaşı, bu nadir əsərlər dünyanın müxtəlif ölkələrində nümayiş etdirilərək, ümumdünya mədəni irsinin bir hissəsi olan Qız qalasının təbliğində əhəmiyyətli vasitəyə çevriləcəkdir. 20 ölkədən 25 tanınmış rəssamın iştirak etdiyi “Qız qalası” İncəsənət Festivalı iştirakçı rəssamlarla şəhərimizin sakinlərinin ünsiyyət vasitəsi olaraq mədəniyyətlərarası dialoqa layiqli töhfə verdi. Festivalın keçirilməsi tariximizi və milli irsimizi qoruduğumuzu göstərir. Bakının rəmzi olan Qız qalası maketlərinin müxtəlif ölkələrə məxsus milli çalarlarla bəzədilməsi mədəniyyətlərin yaxınlaşması baxımından mühüm addımdır.

Heydər Əliyev Fondunun milli mədəniyyətin inkişafına, mədəniyyətlərarası dialoqun təşviqinə böyük önəm verərək, bu festivalın da yüksək səviyyədə təşkil edilməsinə imza atdı.

Görülən işlərin davamı olaraq Heydər Əliyev Fondunun dəstəyi ilə İkinci Ramatuel Klassik Musiqi Festivalı öz işinə başladı. İyulun 17-də musiqi festivalının açılışı olub. Mədəniyyət tədbirini Qara Qarayev adına Azərbaycan Dövlət Kamera Orkestri açıb. Orkestr xalq artisti Teymur Göyçayevin dirijorluğu ilə dünya şöhrətli Azərbaycan bəstəkarları Qara Qarayev, Fikrət Əmirov, Arif Məlikov, Fərhad Bədəlbəyli, Tofiq Quliyev, Vaqif Mustafazadə, dünya klassiklərindən Motsart, Çaykovski və Debüssinin məşhur əsərlərindən ibarət 11 klassik musiqi nömrəsi ifa edib.

Ramatuel klassik musiqi festivalının rəhbəri Rolan Koyen festivalın rəsmi açılışını etdikdən sonra Heydər Əliyev Fondunun icraçı direktoru Anar Ələkbərov Azərbaycanın birinci xanımı, Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın festival iştirakçılarına ünvanladığı məktubu oxuyub.

Heydər Əliyev Fondunun dəstəyi ilə reallaşan festivalın məqsədinin Azərbaycan və dünya klassik musiqisinin təbliğ olması vurğulanan məktubda Azərbaycanın çox qədim və zəngin musiqi ənənələrinə malik olduğu, dünya musiqi mədəniyyəti tarixindəki önəmli yeri iştirakçıların diqqətinə çatdırılıb. O da qeyd olunub ki, Heydər Əliyev Fondunun dəstəyi və qayğısı sayəsində ölkə mədəniyyəti nəinki beynəlxalq aləmdə təbliğ olunur və mühüm uğurlara imza atır, həmçinin, Azərbaycan beynəlxalq mədəniyyət tədbirlərinə ev sahibliyi edir. Beynəlxalq Muğam, Qəbələ Beynəlxalq musiqi, Rastropoviç festivalları dünya musiqisinə əvəzolunmaz töhfələr verib.

Məktubda, həmçinin, Azərbaycanın builki “Eurovision” mahnı yarışmasındakı qələbəsi də vurğulanıb. Beləliklə, Azərbaycan daha bir mötəbər beynəlxalq tədbirə “Eurovision-2012” Mahnı Müsabiqəsinə ev sahibliyi edəcəkdir.

Konsert elə ilk dəqiqələrdən Ramatuel şəhərinin Yaşıl Teatrını doldurmuş dinləyiciləri valeh edib. Hər bir musiqi nömrəsi uzun və sürəkli alqışlarla qarşılanıb. Orkestrin üzvləri hər bir musiqi parçasını böyük məharətlə ifa ediblər. Səhnədə ölməz bəstəkarların ecazkar musiqi nömrələrini səsləndirən xalq artisti Murad Adıgözəlzadə isə konsertə sanki xüsusi bir ab-hava bəxş edib. Festival iyulun 22-dək davam edəcəkdir. Saysız müsabqə və festivalların müəllifi olan Mehriban xanım Əliyeva istər ölkə daxilində, istərsə də xarici dövlətlərdə təşkil etdiyi tədbirlərdə Azərbaycanın milli irsini, mədəniyyət nümunələrini yüksək səviyyədə təbliğ edərək fondun qarşıya qoyduğu məqsədə doğru geniş məzmunlu layihələri həyata keçirir. Hər bir layihənin əsasında Azərbaycanın səsi, onun imzası var.

NƏZAKƏT ƏLƏDDİNQIZI

Səs.- 2011.- 19 iyul.- S. 3.