Azərbaycan mətbuatının yaradılmasından 136 il ötür

Bir neçə gün sonra Azərbaycan mətbuatının yaradılmasının 136 illiyi qeyd olunacaq. Əsası “Əkinçi” qəzeti ilə qoyulan Azərbaycan milli mətbuatı, bu gün dövlətin diqqət və qayğısı ilə əhatə olunub. Azərbaycan mətbuatının daha yüksək səviyyədə inkişaf etməsi üçün Prezident İlham Əliyev tərəfindən bir çox uğurlu addımlar atılıb, fərman və sərəncamlar verilib. Ölkə mətbuatının inkişafı yolunda atılan bu uğurlu addımlardan biri də keçən il milli mətbuatın 135 illiyi münasibətilə cənab Prezident tərəfindən jurnalistlərin mənzillə təminatına nail olunması üçün 5 milyon manat vəsaitin ayrılmasıdır. Bu baxımdan, demək olar ki, Azərbaycan mətbuatı özünün 136 illik ildönümünü kifayət qədər əldə olunan uğurlarla qeyd edir.

Elçin Mirzəbəyli,

“Xalq Cəbhəsi” qəzetinin baş redaktoru:

- 22 İyul - Milli Mətbuat Günü ilə bağlı olaraq, redaksiya daxilində hər hansı bir jurnalistin mükafatlandırılması nəzərdə tutulmayıb. Biz bu işi qəzetimizin 10 illiyində həyata keçirəcəyik. Yəni bu il bizim ikiqat bayramımızdır. Əgər Milli Mətbuat Günü ilə bağlı yubiley ili olsaydı, təbii ki, o zaman bu günlə əlaqədar tədbir daha geniş dairədə keçirilərdi. Ancaq biz bu işi noyabr ayında həyata keçirəcəyik. O zaman qəzetin iş fəaliyyətində bu günə kimi, təcrübəli və öz işində daha məsuliyyətli olan jurnalistlərimiz mükafatlandırılacaq.

Azərbaycan mətbuatının əldə etdiyi bütün uğurlar göz qabağındadır. Çünki mətbuatımız günü-gündən daha da inkişaf etməkdədir. Demək olar ki, Azərbaycan dövləti mətbuatın inkişafı üçün əlindən gələni əsirgəmir. Mətbuat da dövlət tərəfindən atılan bu addımlara və çağırışlara cavab verir. Burada medianın üzərinə böyük məsuliyyət düşür. Öz işini qurmaq və əhatə dairəsini genişləndirmək baxımından. Hesab edirəm ki, bu müddət ərzində bir çox addımlar atmağa nail olmuşuq.

Natiq Məmmədli,

“Kaspi” qəzetinin baş redaktoru:

- Bu il həm milli mətbuatın 136, həm də “Kaspi” qəzetinin 130 illik yubileyidir. Yəni bizim üçün ikiqat bayramdır. Biz də “Kaspi” qəzetinin 130 illik yubileyi çərçivəsində silsilə tədbirlər keçiririk. Bir sözlə, bu il biz bayram əhval-ruhiyyəsi içindəyik.

Azərbaycan mətbuatı Milli Mətbuat Gününü bir çox uğurlu nailiyyətlərlə qeyd etməyə hazırlaşır. Bunların içərisində də biz mətbuat işçiləri çox arzu edərdik ki, 22 İyul Mətbuat Günü ərəfəsində jurnalistlər üçün nəzərdə tutulan binanın təməli qoyulsun.

Akif Aşırlı,

“Şərq” qəzetinin baş redaktoru:

- Milli mətbuatın 136 illiyi ilə əlaqədar olaraq, redaksiya daxilində hər hansı tədbirin keçirilməsi nəzərdə tutulmayıb. Təbii ki, Milli Mətbuat Günü ilə bağlı həm KİVDF-nin, həm də Mətbuat Şurasının birgə tədbiri olacaq. Yəni keçirilən həmin tədbirlərdə biz mətbuat işçiləri iştirak edəcəyik. Milli Mətbuat Günü ilə əlaqədar olaraq, ayrı-ayrı təşkilatlar, bir çox jurnalistləri mükafatlandırıb. Mən bilən, artıq bir neçə təşkilat tərəfindən bizim ayrı-ayrı jurnalistlərin mükafatlandırılması gözlənilir. Ona görə də, redaksiya daxilində hər hansı mükafatlandırılma nəzərdə tutulmayıb.

Azərbaycan mətbuatı şərəfli tarixi yol keçibdir. Bu klassik jurnalist ənənələrindən bəhrələnərək, öz inkişaf xəttimizi müəyyənləşdirmişik. Bu gün də həmin inkişaf prosesi davam etməkdədir. Təbii ki, texnoloji baxımdan mətbuatda bir çox yeniliklər həyata keçirilir. Azərbaycanda klassik jurnalist ənənəsinə dayanan, o klassik qəzetçilik modeli bu gün də davam edir. Bununla yanaşı olaraq, ölkə mətbuatında internet mediası da sürətlə inkişaf etməkdədir. Burada internet mediası ilə klassik qəzetçilik arasında çox ciddi rəqabət mövcuddur. Bu rəqabətdə çap mediası, yazılı media öz mövqeyini qoruyub saxlaya bilir. Bu isə bizim üçün ən uğurlu nailiyyətdir.

Yunus Oğuz,

“Olaylar” qəzetinin baş redaktoru:

- 22 iyul - Milli Mətbuat Günü ilə bağlı bütün tədbirləri Mətbuat Şurası ilə bir yerdə keçiririk. Yəni bu tədbirlərin keçirilməsi redaksiya daxilində nəzərdə tutulmur. Milli Mətbuat Günü ilə bağlı Mətbuat Şurası hansı tədbirləri keçirsə, biz həmin tədbirlərdə iştirak edəcəyik.

Azərbaycan mətbuatının bir çox uğurları olub. Bu il mətbuat ombudsmanı yarandı. Yəni bu, çox əhəmiyyətli bir məsələdir. Eyni zamanda, “Diffamasiya haqqında” Qanunun qəbul olunması yenidən müzakirə olundu. Gündəmdə müzakirə edilən digər məsələ ondan ibarətdir ki, jurnalistlərin sosial-məişət şəraitlərinin yaxşılaşdırılması ilə bağlı binanın tikilməsi nəzərdə tutulub.

GÜLYANƏ AĞAKƏRİMOVA

Səs.- 2011.- 20 iyul.- S. 9.