Azərbaycan mətbuatının yaradılmasından 136 il ötür

İyulun 22-də Azərbaycan mətbuatının yaradılmasının 136 illiyi qeyd olunacaq. Əsası “Əkinçi” qəzeti ilə qoyulan Azərbaycan milli mətbuatı, bu gün dövlətin diqqət və qayğısı ilə əhatə olunub. Azərbaycan mətbuatının daha yüksək səviyyədə inkişaf etməsi üçün Prezident İlham Əliyev tərəfindən bir çox uğurlu addımlar atılıb, fərman və sərəncamlar verilib. Ölkə mətbuatının inkişafı yolunda atılan bu uğurlu addımlardan biri də keçən il milli mətbuatın 135 illiyi münasibətilə cənab Prezident tərəfindən jurnalistlərin mənzillə təminatına nail olunması üçün 5 milyon manat vəsaitin ayrılmasıdır. Bu baxımdan, demək olar ki, Azərbaycan mətbuatı özünün 136-cı ildönümünü kifayət qədər əldə olunan uğurlarla qeyd edir.

Sevinc Seyidova,

“Həftə içi” qəzetinin baş redaktoru:

- Milli Mətbuat Günü, hər il olduğu kimi, bu il də bizim üçün ikiqat bayramdır. Çünki 1998-ci ilin 22 iyulunda “Həftə içi” qəzeti işıq üzü görüb. Bu il biz 13 yaşımızı qeyd edəcəyik. Təbii ki, Milli Mətbuat Gününü hər il bayram olaraq qeyd edirik. Bu il qəzetimizdə çalışan işçilərimizin bir hissəsi məzuniyyətdədir. Ona görə də, qərara almışıq ki, işçilərimiz məzuniyyətdən qayıdandan sonra avqust ayının əvvəllərində biz bütün kollektivimizlə birlikdə həm peşə bayramımızı, həm də qəzetimizin növbəti ildönümünü qeyd edək. Ötən il Azərbaycan milli mətbuatının 135 illiyi münasibətilə bir çox jurnalistlərə fəxri adlar verildi, qəzetlərə birdəfəlik yardımlar olundu. Eyni zamanda, KİVDF-nin vasitəsilə jurnalistlər fərdi yazı müsabiqələrinin qalibləri oldu. Bir sözlə, mətbuatın inkişafı üçün lazımi addımlar atılıb ki, bütün bunları da müsbət qiymətləndirirəm.

Tapdıq Abbas,

“Paralel” qəzetinin baş redaktoru:

- 22 İyul - Milli Mətbuat Günü ilə əlaqədar olaraq, Mətbuat Şurası və KİVDF-nin xətti ilə bayram yığıncağı təşkil ediləcək. KİVDF-nin elan etdiyi yazı müsabiqəsilə bağlı jurnalistlərin mükafatlandırılması mərasimi də keçiriləcək. Eyni zamanda, Milli Mətbuat Günü ilə bağlı olaraq media işçiləri üçün bayram tədbiri keçiriləcək.

Azərbaycan mətbuatı 5 il bundan əvvəlki mətbuat deyil. Bu gün Azərbaycan mətbuatında sərhədi bəlli olan oturuşmuş media mövcuddur. Ölkə mediasının dayanıqlı şəkildə mənəvi və maddi cəhətdən inkişafında bir çox irəliləyişlər var. Bildiyimiz kimi, 2009-cu ildən bəri Prezident İlham Əliyev Azərbaycan mətbuatının inkişaf mərhələsi üçün dövlət konsepsiyası imzalayıb. Həmin konsepsiyanın müddəlarına uyğun olaraq, həm Mətbuat Şurası, həm də KİVDF və digər əlaqədar təşkilatlar bu istiqamətdə güclü iş aparırlar. Eyni zamanda, iki ildən çoxdur ki, ölkənin aparıcı müstəqil qəzetləri, KİVDF-nin elan etdiyi layihələr əsasında maliyyələşdirilir və həmin maliyyə əsasında mətbuat stabil olaraq maddi dəstək alır. Prezident İlham Əliyevin mətbuata vaxtaşırı olan diqqət və qayğısı, son üç ildə mətbu orqanlara birdəfəlik yardımların edilməsi məsələləri Azərbaycan mətbuatına maddi və mənəvi cəhətdən kömək istiqamətində atılan böyük töhfələrdir. Biz media işçiləri bundan sonra da düşünürük ki, ölkə səviyyəsində Azərbaycan mətbuatının inkişafı üçün kifayət qədər güclü tədbirlər görüləcəkdir. Bildiyiniz kimi, yaxın müddət ərzində ölkə Prezidenti Azərbaycanda reklam agentliyinin yaradılması barədə Sərəncam imzalayacaq. Ölkədə reklam agentliyi fəaliyyətə başlayandan sonra inkişaf etməkdə olan müstəqil mətbuatın maddi təminatı sahəsində yeni bir dövr başlayacaqdır. Tezliklə ölkədə fəaliyyət göstərən qəzetlərimiz yeni formatda rəngli nəşr ediləcək və geniş imkanlara malik olacaqdır. Ölkəmizin hazırkı sürətli iqtisadi inkişafı göz qabağındadır. Bir sözlə, Azərbaycan Qafqazda lider ölkədir. Bu liderlik mətbuat sahəsində də müşahidə edilir. Bu gün Qafqazda və Yaxın Şərqdə Azərbaycan mətbuatı ön sıralardadır. Hesab edirəm ki, Azərbaycanın yazılı mediası sürətlə inkişaf etməkdədir. Təbii ki, mətbuatın inkişaf etməsində dövlətin diqqət və qayğısı da böyük rol oynayır.

GÜLYANƏ

Səs.-2011.- 22 iyul.- S. 4