Turizm sürətlə inkişaf edən biznes sahələrindən birinə çevrilib

Azərbaycan Prezidenti İlham Əliyevin Sərəncamına əsasən, “Azərbaycan Respublikasında 2011-ci ilin “Turizm ili” elan edilməsi ilə bağlı Tədbirlər Planı”nın təsdiqi ölkəyə turist axınının güclənməsinə təsirini göstərəcək. Müasir dövrdə ölkəmizdə qarşıda duran mühüm vəzifələrdən bir bu sahənin inkişafına təkan verməkdir. Turizm sahəsi perspektivliyinə görə qeyri-neft sahələri arasında aparıcı mövqelərdən birini tutduğundan müasir dövrümüzdə turizm sürətlə inkişaf edən biznes sahələrindən birinə çevrilib. Zəngin mədəni-tarixi irsə və əlverişli təbii şəraitə malik olan Azərbaycan turizm sahəsində böyük inkişaf perspektivlərinə malikdir. Azərbaycanda turizmin inkişafı üçün münbit şərait yaradılmış, beynəlxalq turizm bazarına inteqrasiyanın təmin olunmasının əsası qoyulmuş, milli turizm kompleksinin rəqabətə davamlılığı yüksəlmişdir.

Tədbirlər Planına əsasən, Azərbaycanın milli-tarixi, mədəni və mənəvi irsinin, milli adət-ənənələrin dünyada təbliği, ayrı-ayrı regionların və şəhərlərin tarixini əks etdirən materialların nəşr etdirilməsi və yayılması, milli sənətkarlıq və suvenir məhsulların istehsalı və satışının təşkili bu sahəyə beynəlxalq səviyyədə olan diqqətin artmasına gətirib çıxaracaq. Dövlət başçısının Sərəncamına əsasən, “Turizm ili” bağlı Tədbirlər Planının icrası bu sahənin inkişafını daha da sürətləndirəcək.

Məlum olduğu kimi, “Azərbaycan Respublikasında 2010-2014-cü illərdə turizmin inkişafına dair Dövlət Proqramı” ölkədə turizmin rastlaşdığı problemlərin həll edilməsi və turizm sahəsinin daha da inkişaf etdirilməsinin təmin edilməsi üçün hazırlanıb. Azərbaycanda yüksək iqtisadi, sosial və ekoloji tələblərə cavab verən müasir turizm sahəsinin formalaşdırılması və onun ölkə iqtisadiyyatının əsas inkişaf dayaqlarından birinə çevrilməsinin təmin edilməsi əsas məqsəd olaraq qarşıya qoyulub.

Son zamanlar turizmin inkişafına dövlət tərəfindən göstərilən diqqətin nəticəsi olaraq bir-birinin ardınca imzalanan sərəncamlar ölkədə turizmin əhəmiyyətini artırmaq, turizm potensialını təbliğ etmək məqsədi daşıyır. Görülən kompleks işlərin nəticəsi olaraq ölkəyə gələn turistlərin sayı ilbəil artır, ölkədə fəaliyyət göstərən turizm şirkətləri şəbəkəsi genişlənir. Bununla yanaşı, turizmin inkişafı və turizm sektorunun ölkə iqtisadiyyatının aparıcı sahələrindən birinə çevrilməsi bu gün Azərbaycanda ən mühüm vəzifə olaraq qarşıda durur. Son illər Azərbaycanda əldə olunmuş sosial-iqtisadi irəliləyiş bu vəzifənin həllinə şərait yaradır.

Turizm sahəsində çalışanların peşə hazırlığının artırılması məqsədi ilə Azərbaycan Turizm İnstitutunun nəzdində müxtəlif peşələr üzrə daimi fəaliyyət göstərən kurslar açılmış, eyni zamanda, Ümumdünya Turizm Təşkilatının və Türkiyənin Mədəniyyət və Turizm Nazirliyinin dəstəyi ilə müxtəlif təlim proqramları həyata keçirilməkdədir. Prezidentin 20 iyun 2011-ci il tarixli Sərəncamında göstərilir ki, Azərbaycan Turizm İnstitutunun nəzdində Bakı Turizm Peşə Məktəbi yaradılsın. Turizm sənayesi üçün kadr hazırlığı əsas məsələlərdəndir. “Turizm ili” ilə bağlı Tədbirlər Planında bu istiqamət də əksini tapıb. Son vaxtlar turizm sənayesində kadr hazırlığı ilə bağlı ciddi irəliləyişlər var. Tədbirlər Planında Azərbaycan turizm təhsilinin təkmilləşdirilməsinə dair verilən tapşırıqlar bu sahədə daha geniş işlər görməyə imkan verəcək.

Tədbirlər Planına əsasən, Azərbaycanın tarix-mədəniyyət obyektlərinin, qoruqların, tarixi əhəmiyyət kəsb edən arxeoloji ərazilərin xəritələrinin hazırlanması və ərazilərin genişləndirilməsinə ehtiyac olduğu təqdirdə, Mədəniyyət və Turizm Nazirliyinin sifarişi əsasında mövcud torpaq qanunvericiliyinin tələblərinə uyğun olaraq torpaqlar ayrılacaq.

Geniş sferada təsdiqini tapan Sərəncama əsasən, qonşu ölkələrin nümayəndələrinin iştirakı ilə “Sərhədyanı turizmin inkişaf perspektivləri” mövzusunda beynəlxalq konfransın keçirilməsi gələcəkdə turizm sektoru ilə bağlı mövcud problemlərin aradan qaldırılmasına, eləcə də, onun inkişafına töhfələrini verəcək.

Tədbirlər planına əsasən, Azərbaycanla Gürcüstan arasında mövcud turist axınını nəzərə alaraq, Bakı-Tbilisi-Bakı dəmir yolu marşrutu üzrə ixtisaslaşdırılmış turist qatarlarının təşkil olunması diqqətdədir. “Turizm ili” çərçivəsində turizm nümayişi obyektlərinə tələbələrin və şagirdlərin ekskursiyalarının təşkilinə dair xüsusi proqramın işlənib hazırlanması da nəzərdə tutulub. Belə ki, gənclərin və yeniyetmələrin asudə vaxtının təşkilində Azərbaycana məxsus olan maddi və mənəvi dəyərləri nümayiş etdirmək, gələn qonaqlara məhz bu zənginliyin tarixinin təqdimi mövcud potensialın təbliğində əsas amillərdir. Bu baxımdan Tədbirlər Planına “Çıraqqala” tarixi abidələr kompleksinin bərpası və qorunması haqqında”, eləcə də, “Şabran şəhəri” tarix və mədəniyyət abidəsinin qorunması haqqında” Azərbaycan Respublikası Prezidentinin məlum sərəncamlarının icrasının başa çatdırılması daxil edilib.

Beynəlxalq turizm bazarında Azərbaycan Respublikası üçün prioritet hesab olunan ölkələrdə milli turizmin təbliği üzrə tədbirlərin görülməsi, həmçinin, həmin ölkələrdən Azərbaycana infoturların təşkil edilməsi də Tədbirlər Planına daxil edilib. Belə ki, beynəlxalq səviyyədə Avropa Birliyi ölkələri, ABŞ, Yaponiya, Kanada, Rusiya və Fars körfəzi ölkələri ilə birlikdə əməkdaşlığın həyata keçirilməsi turizm sektorunun müasir standartlar çərçivəsində inkişafına əhəmiyyətli dərəcədə təsirini göstərəcək. Dünyanın nüfuzlu Euronews, Travel Channel, CNN, BBC və National Geographic televiziya kanalları ilə əməkdaşlıq, dünya təcrübəsindən yararlanmaq Azərbaycanda turizm biznesini sürətləndirəcək. Kütləvi informasiya vasitələri tərəfindən “2011-ci il turizm ilidir” devizi altında proqramların və xüsusi verilişlərin mütəmadi olaraq diqqətdə saxlanılması da zəruri hesab olunur. Eyni zamanda, “Turizm ili” ilə bağlı Azərbaycanın diplomatik nümayəndəlikləri və diasporları tərəfindən Azərbaycanın turizm potensialının xarici ölkələrdə tanıtımı məqsədi ilə təbliğat-təşviqat işinin gücləndirilməsi labüddür.

Xalqımızın zəngin və dəyərli göstəricisi olaraq mədəniyyətimizin dünya miqyasına çıxarılmasında turizmin imkanlarından istifadə olunmalıdır. Turizm Azərbaycana çoxsaylı xarici qonaqlar, əlavə gəlirlər, imkanlar gətirir və mədəniyyətimiz də bundan faydalanır. Azərbaycanda, mütəmadi olaraq, beynəlxalq səviyyədə müsabiqə və festivalların keçirilməsi mövcud potensialın xarici qonaqların tanışlığına dəlalət edir. Belə ki, Heydər Əliyev Fondunun təşkilatçılığı ilə Qəbələdə Beynəlxalq Musiqi Festivalının keçirilməsi dünyanın m2xtəlif ölkələrindən olan insanların buraya gəlməsinə səbəb olmuşdur. Dünyanın bir çox ölkələrindən bu tədbirə insanlar gəlir. Turizm şirkətləri də bu qonaqların gəlməsində, yerləşdirilməsində böyük fəallıq göstərirlər. Mədəniyyət və turizm naziri Əbülfəs Qarayevin dediyi kimi, bu, artıq mədəniyyətlə turizmin uzlaşması, birgə fəaliyyətidir.

Bu gün Azərbaycanda turistlərin yerləşdirmə biznesi dinamik surətdə inkişaf edir. Ölkədə 2011-ci ilin “Turizm ili” elan olunması və eləcə də, “Azərbaycan Respublikasında 2011-ci ilin “Turizm ili” elan edilməsi ilə bağlı Tədbirlər Planı”nın təsdiqi bu sahənin daha da sürətli inkişafına təsir göstərəcək.

NƏZAKƏT ƏLƏDDİNQIZI

Səs.- 2011.- 26 iyul.- S. 6.