Qafqazın ən güclü ordusu

Azərbaycanın iqtisadi imkanları genişləndikcə ordu quruculuğu sahəsinə göstərilən diqqət və qayğının əhatəsi də genişlənir. Ermənistanla müharibə şəraitində yaşayan ölkəmiz üçün bu sahənin dövlət rəhbəri tərəfindən prioritet elan olunması taleyüklü problemlərin həllində, şübhəsiz, mühüm rol oynayır. İyunun 26-da Bakıda keçirilən növbəti hərbi parad S-300 raketləri də daxil olmaqla, ordumuzun möhtəşəm arsenalını nümayiş etdirdi.

Azərbaycanda ordu quruculuğunun yeni mərhələsi Prezident İlham Əliyevin Ali Baş Komandanlığı dövründə başlayıb. 2003-cü ildən etibarən ölkə iqtisadiyyatının inkişafı ordu quruculuğu sahəsində də özünü göstərməyə başladı. Dövlət ildən-ilə hərbi xərcləri artırmaqla bu sahənin əsas prioritetlərindən olduğunu əyani şəkildə nümayiş etdirdi. Bu illər ərzində ordunun döyüş qabiliyyəti artırıldı, maddi-texniki bazası gücləndirildi, hərbçilərin sosial vəziyyətinin yaxşılaşdırılması istiqamətində mühüm addımlar atıldı.

Hazırda orduda və bütün Silahlı Qüvvələrdə ruh yüksəkliyi var. Hərbi hazırlıq yüksək səviyyədədir. Son illər ərzində çoxlu texnika və silah-sursat alınıb. Bu proses davam edir və Silahlı Qüvvələrimizin imkanları güclənir.

Ümumiyyətlə, 4 may 1994-cü ildə Azərbaycan Respublikası NATO-nun “Sülh Naminə Tərəfdaşlıq” Proqramına qoşulmaqla öz üzərinə götürdüyü bütün öhdəlikləri tam yerinə yetirir. Silahlı Qüvvələrimizin beş zabiti NATO-nun müxtəlif qərargahlarında Tərəfdaşlığın Qərargah Elementi vəzifələrində uğurla xidmət edir.

Silahlı Qüvvələrimizin beynəlxalq önəmli tədbirlərdə iştirak edən nümayəndələri onlara göstərilən etimadı doğruldaraq, bir qayda olaraq, əsil peşəkarlıq nümayiş etdirirlər. Bunu Müdafiə Nazirliyinin ünvanına göndərilən təşəkkür məktubları da təsdiq edir.

Azərbaycan Ordusunun qarşısında dayanan ən mühüm məsələlərdən biri döyüş hazırlığıdır. Bunu daim diqqət mərkəzində saxlayan ölkə rəhbərliyinin səyi nəticəsində yalnız ötən ilin sonuna Silahlı Qüvvələrin istifadəsinə təxminən 1 milyard ABŞ dollarından artıq dəyərdə silah və texnika verilib.

Hissə və bölmələrin müxtəlif hava şəraitində döyüş fəaliyyəti imkanlarını artırmaq məqsədi ilə Hərbi-Hava Qüvvələrinə müdafiə üzrə yeni texnikalar alınmış, mövcud texnikaların təmiri və modernləşdirilməsi işi həyata keçirilib.

Yeni kompleks uçuş simulyatorlarının sıraya qoyuluşu isə nəticədə uçuş heyətinin döyüş hazırlığı keyfiyyətini artırıb, aviasiya texnikalarının texniki resurslarına qənaət olunmasına şərait yaradıb.

Zenit raket komplekslərinin modernləşdirilməsi isə müvafiq qoşunlar üzrə döyüş texnikasının səmərəliliyini, ən əsası, atəş imkanlarını artırıb. Hərbi-Hava Qüvvələrinin modernləşdirilməsi yolunda əldə olunmuş ən böyük uğurlardan biri də döyüş texnikalarında rəqəmsal məlumat mübadiləsinin təmin edilməsidir.

Yeri gəlmişkən, keçirilən əməliyyat-taktiki təlimlərində dağ şəraitində döyüş texnikası və silahlarının tətbiq edilməsinin üsul və metodları, döyüş hazırlığı prosesində hücum əməliyyatının aparılması və s. kimi vacib məsələlər dərindən analiz edilir, şəxsi heyətin bilik və bacarığının təkmilləşdirilməsi istiqamətində mühüm addımlar atılır. Ötən müddət ərzində, bütün qoşun növlərində müasir dövrün tələblərinə cavab verən mühüm islahatlar həyata keçirilib.

Təsadüfi deyil ki, son 5-6 ildə Azərbaycanın hərbi xərcləri 10 dəfədən çox artıb. Hazırda Azərbaycanın hərbi xərcləri 3,5 milyard dollara çatıb ki, bu da torpaqlarımızı işğal edən Ermənistanın ümumi büdcəsindən çoxdur. Dövlət büdcəsindən hərbi sahəyə ayrılan xərclərin dəfələrlə artırılması ordumuzun bütün istiqamətlər üzrə potensialının yüksək səviyyəyə çatdırılmasına da yol açıb. Ötən illər ərzində orduya ayrılan pulların böyük bir hissəsi yeni texnikaların, təyyarələrin, ən müasir silahların alınmasına yönəldilib.

Ümumiyyətlə, bu gün Silahlı Qüvvələrimizin döyüş qabiliyyəti imkanları əvvəlki illərlə müqayisədə qat-qat artıb. Yeni silah sistemlərinin alınması və quraşdırılması nəticəsində Silahlı Qüvvələrimiz Ermənistanın bütün ərazisində yerləşən hədəfləri məhv etməyə qadirdir.

Yeri gəlmişkən, bir qədər öncə, Londonda yerləşən Beynəlxalq Strateji Araşdırmalar İnstitutu dünya ölkələrinin hərbi potensialını qiymətləndirən illik hesabatını açıqlayıb. Azərbaycan və Ermənistanın da orduları haqda məlumatların yer aldığı hesabatda deyilir ki, Azərbaycanın ordusu Ermənistan ordusundan təxminən 35 faiz çoxdur. Ehtiyat qüvvələrinin sayına görə də Azərbaycanın imkanları Ermənistandan 2 dəfə çoxdur.

Azərbaycanın tankları və BTR-ləri Ermənistandan 3 dəfə çoxdu. Azərbaycanın 320 tankı və 470-ə yaxın “BTR”-i var. “BMP”lərə gəldikdə isə, Azərbaycanın 127, Ermənistanın isə 104 “BMP”si var.

Hesabata görə, Azərbaycanın 47 döyüş qabiliyyətli təyyarəsi var. Ermənistanın döyüş qabiliyyətli təyyarələrinin sayı bundan 3 dəfə azdı. Bundan başqa, Azərbaycanın 6 müasir pilotsuz uçuş aparatı var- “Aerostar” və “Orbiter”. Ermənistanda belə pilotsuz uçuş aparatları yoxdur.

Raket qurğularına gəldikdə, hər iki tərəfdə arsenalın çoxunu “Qrad” qurğuları təşkil edir, amma Azərbaycan 12 ədəd daha müasir “Smerç” qurğularına da malikdir. Milli Ordumuzun arsenalına artıq S-300 raketləri də daxil olub ki, bu dəhşətli silahın imkanlarını izah etməyə ehtiyac yoxdur.

Tank əleyhinə silahlara gəldikdə, hesabata görə, burda Azərbaycanın arsenalı Ermənistanınkından təxminən 10 dəfə çoxdur. Ümumiyyətlə, orduların maddi-texniki bazasını müqayisə etdikdə, Azərbaycanın Ermənistandan 3 dəfə üstün olduğu ortaya çıxır.

Hər bir dövlətin əsas təməllərindən biri onun güclü ordusunun olmasıdır. Böyük qürur hissi ilə, demək olar ki, Azərbaycanın yüksək döyüş qabiliyyətinə, nizam-intizama malik ordusu var. Dövlətimizin və hökumətimizin diqqəti sayəsində Silahlı Qüvvələrimizin möhkəmləndirilməsindən əsas məqsəd işğal olunmuş torpaqları düşmənlərdən təmizləmək, ölkəmizin ərazi bütövlüyünü bərpa etmək, qaçqın və məcburi köçkünləri öz doğma yurdlarına qaytarmaqdır. Azərbaycan Ordusu artıq bunu reallaşdırmaq qüdrətinə sahibdir.

Beləliklə, Azərbaycan Qafqazda ən güclü orduya malik olmaqla, öz torpaqlarını işğaldan azad etməyə qadirdir. Sadəcə, problemin sülh yolu ilə həlli daha optimal olduğundan Azərbaycan bu imkanlarından, hələ ki, istifadə etmir. Lakin hər şeyin bir sonu var. Əgər sülh danışıqları səmərəsiz başa çatarsa, Azərbaycan Ordusunun qüdrətini bütün dünya görəcək.

Elçin Bayramlı

Səs.- 2011.- 30 iyul.- S. 2.