Yeni Azərbaycan Partiyası “Silahlı Qüvvələrə Yardım Fondu”na dəstək məqsədilə xeyriyyə konserti keçirdi

Dünən Yeni Azərbaycan Partiyasının təşkilatçılığı ilə Milli Təhlükəsizlik Nazirliyinin Mədəniyyət Mərkəzində (keçmiş Şəhriyyar adına saray) “Silahlı Qüvvələrə Yardım Fondu”na dəstək məqsədilə xeyriyyə konserti keçirildi. Tədbirdə Milli Məclisin deputatları, tanınmış ictimai-siyasi xadimlər, KİV nümayəndələri iştirak etmişdir.

Ölkənin ictimai-siyasi həyatında aparıcı rol oynayan Yeni Azərbaycan Partiyasının həyata keçirdiyi siyasətin əsasında dövlətə, xalqa xidmət dayanır. Milyonların partiyasına çevrilən YAP keçirdiyi xeyriyyə tədbirləri ilə də daim ictimaiyyətin rəğbətini qazanıb. Yeni Azərbaycan Partiyasının 15 iyun Milli Qurtuluş günü və 26 iyun Silahlı Qüvvələr günü münasibətilə Silahlı Qüvvələrə Yardım Fonduna dəstək məqsədilə keçirdiyi xeyriyyə konserti də bu tədbirlər silsiləsindəndir. Tədbirdə YAP-ın üzvü olan müğənnilərin ifasında səslənən mahnılarda Ulu Öndər Heydər Əliyevin hakimiyyətə qayıdışından sonra keçdiyi inkişaf yolu, bu günümüz və sabahımız, dövlətimizin, millətimizin müstəqiliyinin dayağı olan ordumuzun qüdrəti bir daha mərasim iştirakçılarının diqqətinə çatırıldı.

Tədbirdə qeyd olundu ki, xeyriyyə konserti zamanı toplanan vəsait Silahlı Qüvvələrə Yardım Fonduna köçürüləcək. Tədbir çərçivəsində 15 iyun Azərbaycanın inkişaf yolunun başlandığı tarix olduğu vurğulandı.

Tədbirdə Azərbaycan Silahlı Qüvvələrinin bütün şəxsi heyəti Azərbaycan Ordusunun 93 illik yubileyi münasibətilə təbrik edildi, onlara vətənə xidmətdə böyük uğurlar arzulandı. Bildirildi ki, 26 iyun Azərbaycan tarixində ən önəmli günlərdən biridir. 1918-ci ildə Azərbaycan Demokratik Respublikasının ordusu yaradılıb. Hazırkı Silahlı Qüvvələrimiz həmin ordunun varisi kimi, öz işinin öhdəsindən yüksək səviyyədə gəlir. Biz də öz ordumuzla fəxr edirik. Hər hansı məmləkət onda güclü olur ki, onun möhkəm iqtisadiyyatı və güclü ordusu var. Bu gün Azərbaycanda da güclü və qüdrətli ordu yaradılıb. Ulu Öndər Heydər Əliyevin hakimiyyətə qayıdışından sonra ordu quruculuğu sahəsində əsaslı islahatlar aparıldı. İftixarla qeyd edə bilərik ki, Azərbaycanın Silahlı Qüvvələri Cənubi Qafqazın ən güclü ordusu kimi nəinki ölkəmizin təhlükəsizliyinə, habelə, bölgədə sülhə və əminamanlığa ən böyük təminatdır. Bu gün dövlət başçısı İlham Əliyevin həyata keçirdiyi mühüm islahatlar nəticəsində respublikamızda sosial-iqtisadi sahədə əldə olunan böyük uğurlar Vətənimizin hərbi qüdrətinin artmasına və hücumçu diplomatiya kursunun səmərəli şəkildə həyata keçirilməsinə əhəmiyyətli zəmin yaratmışdır. Təkcə bu faktı xüsusu deyd etmək olar ki, son 7 ildən artıq dövr ərzində Azərbaycanın hərbi xərcləri on iki dəfədən çox artıb. Hərbi büdcəmiz 3 milyard dollardan artıqdır. Bu göstərici Ermənistanın ümumi dövlət büdcəsindən çoxdur. Bu gün gənclərimiz orduya böyük inam və ruh yüksəkliyi ilə gedir, silahlı qüvvələrimizin sıralarında sağlam, milli vətənpərvərlik əhval-ruhiyyəsi hökm sürür. Dövlətçiliyi göz bəbəyi kimi qoruyan Azərbaycan ordusu ilə xalqın vəhdəti əbədidir. Hər bir Azərbaycan vətəndaşı ölkə Prezidenti, Ali Baş Komandan İlham Əliyevin çağırışı ilə müqəddəs torpaqlarımızı düşməndən azad etməyə hazırdır. Bu ali məqsəd naminə hər birimiz sabahın əsgəri, zabiti, döyüşçüsü olmaqdan qürur duyuruq.

Məlumat üçün qeyd edək ki, Azərbaycan Silahlı Qüvvələrinə Yardım Fondu Ulu Öndər Heydər Əliyevin 17 avqust 2002-ci il tarixli Sərəncamı ilə yaradılıb. Fondun əsasnaməsinə görə, yığılan vəsait Silahlı Qüvvələrin maddi-texniki bazasının inkişafı, hərbi təyinatlı məmulatların hazırlanmasına, sınaqdan keçirilməsinə, onların istehsalına, təmirinə və modernləşdirilməsi, hərbi elmi-tədqiqat və konstruktor-sınaq işlərinin aparılması, hərbi texnika, silah və döyüş sursatının alınması, hərbi kadrların hazırlanmasına, onların ixtisasının artırılması, hərbçilərin sosial və məişət problemlərinin həlli məqsədlərinə yönəldilə bilər.

Yeni Azərbaycan Partiyası mütəmadi olaraq keçirdiyi xeyriyyə tədbirlərində toplanan vəsaiti Azərbaycan Silahlı Qüvvələrinə Yardım Fonduna köçürür.

Əli Əhmədov: “Bu konsert YAP üzvləri tərəfindən təşkil olunub və burada toplanan vəsait “Silahlı Qüvvələrə Yardım Fondu”na köçürüləcək”

Yeni Azərbaycan Partiyasının Sədr müavini, İcra katibi, millət vəkili Əli Əhmədov tədbirlə bağlı məlumat verərək bildirdi ki, xeyriyyə konserti Yeni Azərbaycan Partiyası tərəfindən Azərbaycan Respublikası Silahlı Qüvvələrinə Yardım Fonduna dəstək vermək məqsədilə keçirilir: “Bilirsiniz ki, YAP həmişə bu və digər formada Azərbaycan Silahlı Qüvvələrinə maddi və mənəvi aksiyalar keçirib. Biz belə hesab edirik ki, bu partiyamızın hər bir üzvünün vətəndaşlıq borcudur. Eyni zamanda, düşünürəm ki, bu konsertin təşkil edilməsi bir tərəfdən YAP-ın ordu quruculuğu, ordumuzun gücünün və qüdrətinin artırılmasına dəstəyini ifadə edir. Nəzərinizə çatdırmaq istəyirəm ki, tamaşaçıların qarşısında YAP-ın üzvləri olan müğənnilər, mədəniyyət xadimləri çıxış edirlər. Beləliklə, konsert bütövlükdə partiyamızın üzvləri tərəfindən təşkil edilib. Buradan toplanan vəsait Silahlı Qüvvələrin Yardım Fonduna köçürüləcək”.

Bahar Muradova: “Xeyriyyə konserti YAP-ın növbəti uğurlu tədbiridir”

Milli Məclisin sədr müavini, YAP İdarə Heyətinin üzvü Bahar Muradova isə çıxışında bildirdi ki, xeyriyyə konserti YAP-ın növbəti uğurlu tədbiridir: “Bu tədbir həm Milli Qurtuluş Gününə, həm də Azərbaycan Silahlı Qüvvələri gününə həsr olunub. Burada əsas məqsəd Silahlı Qüvvələrə Yardım Fonduna vəsait toplanması üçün YAP-ın üzvləri maddi və mənəvi imkanlarını bir araya gətirməsidir. Bu xeyriyyə konserti əlbəttə ki, partiyamızın çoxsaylı tədbirlərindən biridir. Tədbir həmçinin, cəmiyyətə bir çağırışdır. Azərbaycan vətəndaşlarına çağırışdır ki, onlar ordunun inkişafını unutmasınlar və daim diqqətdə saxlasınlar. Hesab edirəm ki, bizim tədbirin ardınca bu kimi xeyriyyə tədbirləri Silahlı Qüvvələrə Yardım Fondu üçün ediləcək. Bizim məqsədimiz də budur ki, xalq öz ordusuna daim diqqət göstərsin”.

Məlahət İbrahimqızı: “Düşünürəm ki, belə bir nəcib, vətənpərvər aksiyaya bütün siyasi partiyalar qoşulmalıdır”

YAP Nəsimi rayon təşkilatının sədri, Milli Məclisin deputatı Məlahət İbrahimqızı çıxışında Yeni Azərbaycan Partiyası cəmiyyətin aparıcı siyasi təşkilat olduğunu söylədi: “YAP, eyni zamanda, müntəzəm olaraq sosial layihələr həyata keçirir. 15 İyun Milli Qurtuluş Günü və 26 İyun Silahlı Qüvvələr münasibətilə belə bir aksiyanın keçirilməsi böyük təşəbbüsdür, fəaliyyətdir, niyyətdir. Düşünürəm ki, belə bir nəcib, vətənpərvər aksiyaya bütün siyasi partiyalar qoşulmalıdır. Silahlı Qüvvələrə Yardım Fondu Ulu Öndər Heydər Əliyevin Sərəncamı ilə yaradılıb. Məqsəd xalqla ordunun birliyinə nail olmaqdır. Ulu Öndər Heydər Əliyev bildirirdi ki, xalqla ordunun birliyi həm xalqın, ölkənin qüdrətini artırır, həm də ordunu daha da qüvvətli edir. Orduya qayğı, hörmət cəmiyyətin, xalqın şərəfli vəzifəsidir. Azərbaycanın iqtisadi qüdrəti günbəgün artır. Büdcəmizdə ilbəli artım inkaredilməzdir. Təbii ki, iqtisadi artım digər sahələrin də inkişafına öz müsbət təsirini göstərir. Azərbaycan dövlətinin büdcədən ayrılmalarda daha çox diqqət göstərdiyi sahələrdən biri ordu quruculuğudur. Azərbaycanın hərbi büdcəsi Ermənistanın dövlət büdcəsindən çoxdur. Bu dövlətimizin orduya göstərdiyi diqqət və qayğının bariz nümunəsidir. Güclü ordu qüdrətli dövlət deməkdir. 15 İyun Milli Qurtuluş Günü və qarşıdan gələn 26 İyun Silahlı Qüvvələr Günü münasibətilə xalqımızı təbrik edir, bu inamı böyük əminliklə ifadə edirik ki, tezliklə işğal altında olan torpaqlarımız azad olacaq, soydaşlarımız öz doğma yurd-yuvalarına qayıdacaq, Azərbaycan daha da qüdrətlənəcək, zənginləşəcək”.

Əhməd Vəliyev: “Yeni Azərbaycan Partiyası həmişə xeyriyyəçiliklə məşğul olmaqla yanaşı, geniş və əhəmiyyətli layihələr həyata keçirir”

Millət vəkili Əhməd Vəliyev Yeni Azərbaycan Partiyasının təşkilatçılığı ilə keçirilən xeyriyyə konsertinin 15 İyun Milli Qurtuluş Günü bayramına təsadüf etdiyini bildirdi: “Yeni Azərbaycan Partiyası həmişə xeyriyyəçiliklə məşğul olmaqla yanaşı, geniş və əhəmiyyətli layihələr həyata keçirir. Bu baxımdan bu günkü xeyriyyə konserti də Ümummilli Liderimiz Heydər Əliyevin Qayıdış günündə keçirilir. Göründüyü kimi, keçirilən bu tədbir də yüksək səviyyədə təşkil olunub. Hər bir Azərbaycan vətəndaşı belə bir tədbirlərdə birlik nümayiş etdirməlidir”.

İradə Hüseynova: “Yeni Azərbaycan Partiyası həmişə bu və ya digər formada aksiyalar keçirir və bu da cəmiyyət tərəfindən müsbət qaşılanılır”

Azərbaycan Respublikasının təhsil nazirini müavini İradə Hüseynova Yeni Azərbaycan Partiyasının keçirdiyi bütün tədbirlərin cəmiyyət tərəfindən yüksək dəyərləndirildiyini söylədi: “Vətənini sevən hər bir kəs Azərbaycanın uğurlu inkişafı yolunda üzərinə düşən öz missiyasını tam məsuliyyəti ilə yerinə yetirməlidir. Bu gün Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın gördüyü xeyriyyə işlər beynəlxalq ictimaiyyət tərəfindən yüksək qiymətləndirilir. Bu gün tam əminliklə deyə bilərik ki, Azərbaycan bütün sahələrdə böyük inkişaf yolundadır. Bu baxımdan Yeni Azərbaycan Partiyasının bu günkü tədbiri də cəmiyyətimiz tərəfindən yüksək dəyərləndirilir. Çünki Yeni Azərbaycan Partiyası həmişə bu və ya digər formada aksiyalar keçirir və bu da cəmiyyət tərəfindən müsbət qaşılanılır”.

Aydın Quliyev: “YAP-nın belə tədbirlər keçirməsi bir daha onu göstərir ki, bu partiya siyasi fəaliyyət göstərməklə yanaşı, eyni zamanda dövlətçilik kondeksində olan məsələlərlə də məşğul olur”

“Bakı xəbər” qəzetini baş redaktoru Aydın Quliyev YAP-nın keçirdiyi belə tədbirləri müsbət dəyərləndirdi: “Yeni Azərbaycan Partiyasının belə tədbirlər keçirməsi bir daha onu göstərir ki, bu partiya siyasi fəaliyyət göstərməklə yanaşı, eyni zamanda cəmiyyətin ən geniş kütlələrinin marağında və dövlətçilik kondeksində olan məsələlərlə də məşğul olur. Bu təqdirə layiq bir addımdır. İnanıram ki, cəmiyyətimizdə bir sıra məsələlrlə bağlı belə bir aksiyaların keçirilməsi davamlı olacaq və bu tədbirləri nümunə saymaq oldar”.

Şahlar Əsgərov: “YAP-nın bugünkü tədbiri də xeyirli başlanğıcdır və inanıram ki, bu başlanğıc çox gözəl nəticə verəcək”.

YAP İdarə Heyətinin üzvü, professor Şahlar Əsgərov belə tədbirlərin cəmiyyət tərəfindən də müsbət dəyərləndirildiyini vurğuladı: “Bir halda ki, cəmiyyətimiz demokratik, liberal əsaslarla qurulursa, ona görə də insanlara imkan, şərait yaratmaq lazımdır ki, müəyyyən ictimai proseslərə öz münasibətlərini bildirsinlər. Belə xeyriyyə vasitəsi ilə əsgərlərimizi, xəstə uşaqları, talantlı, istedadlı gənclərimizi müdafiə edə bilərik. Yeni Azərbaycan Partiyası həmişə həyata keçirdiyi layihələr uğurlu olub. Bugünkü tədbir də xeyirli başlanğıcdır. İnanıram ki, bu başlanğıc çox gözəl nəticə verəcək”.

YAP-ın üzvü olan sənətçilər də bu xeyriyyə konsertini yüksək qiymətləndiriblər. Gənc müğənni Kərim hesab edir ki, belə xeyriyyəçilik xalqımızın mentalitetindən irəli gəlir: “Ümumiyyətlə, xeyirxahlıq, humanist addımlar xalqımızın gözəl ənənələrindən biridir. Belə bir xeyriyyə konsertini təşkil edən insanlara da təşəkkür edirəm. Eyni zamanda, hesab edirəm ki, bu cür xeyriyyə tədbirləri ildə bir neçə dəfə təşkil edilsə daha yaxşı olar. Çünki bütün bunlar xalqımızın necə gözəl ənənələrə malik olduğu bütün dünyaya nümayiş etdirir”.

“Evrovision 2010” mahnı müsabiqəsində ölkəmizi təmsil edən Səfurə Əlizadə də xeyriyyə konserti ilə bağlı fikirlərini bölüşərkən YAP-ın bu tədbirinin yükəsk dəyərə malik olduğunu bildirib: “İlk növbədə, 15 İyun Milli Qurtuluş Gününün əhəmiyyətini qeyd etmək istəyirəm. Xalqımızın çox çətin anlarında Ulu Öndərimiz Heydər Əliyev dövlətimizi məhv olmaq təhlükəsindən xilas edib. Məhz Onun qətiyyəti və əzəməti sayəsində Azərbaycanımız çətin böhranlardan qurtularaq böyük inkişaf yoluna çıxdı. Ona görə də, hamımız bu bayramı böyük sevinc hissi ilə qeyd edirik. Bu xeyriyyə konserti həmçinin Silahlı Qüvvlərəmizə dəstək məqsədilə keçirilir. Ordu bizim qürur yerimizdir. Nəzərə alsaq ki, torpaqlarımız hələ də işğal altındadır, onda hər bir vətəndaş ordumuza qayğı ilə yanaşmalıdır. Bu mənada YAP-ın bu təşəbbüsü yalnız və yalnız alqışlanmalıdır. Mən həmçinin, bu konsertin çox gözəl təşkil edildiyini də vurğulamaq istəyirəm”.

Xalq artisti Faiq Ağayev də bizimlə söhbətində 15 İyun Milli Qurtuluş Gününün tarixi əhəmiyyyəti haqqında fikirlərini bildirib: “Bizim üçün fəxarətli bir gündür. Çünki 1993-cü ilin iyun ayında Ulu Öndər Heydər Əliyev ikinci dəfə hakimiyyətə qayıtmaqla xalqımızı və dövlətimizi fəlakətlərdən xilas etdi. Ona görə də, Milli Qurtuluş Günü bütövlükdə dövlətimiz üçün önəmlidir”. F.Ağayev Azərbaycan Silahlı Qüvvələrinin bayramının da tariximizdə xüsusi yer tutduğunu bildirib. Onun sözlərinə görə, hələ Xalq Cümhuriyyəti dövründə əsası qoyulan Azərbaycan milli ordusu görkəmli sərkərdələr yetişdirib: “Azərbaycan torpaqlarının bir hissəsinin işğalda olması ordumuza daha da çox diqqət yönəltməyimizi zəruri edir. Bu mənada mən YAP-ın bu təşəbbüsünü yüksək qiymətləndirirəm. Ümumxalq partiyası olan bu siyasi təşkilat həmişə insanların, dövlətin mövqeyindən çıxış edir. Bu tədbir də fikrimin təsdiqi ola bilər”.

Konsertdə sənətçilərdən Elza Seyidcahan, Ədalət Şükürov, Nadir Qafarzadə, Aygün Bəylər, Nura Suri, Elnur Hüseynov, Sevda Yəhyayeva və digərləri də çıxış etdilər.

Qeyd edək ki, tədbirdən toplanan vəsait “Silahlı Qüvvələrə Yardım Fondu”na keçiriləcəkdir. Konsertin gedişində elan olunub ki, “Silahlı Qüvvələrə Yardım Fondu”na 25 min manatdan artıq vəsait toplanıb.

RƏFİQƏ KAMALQIZI

Səs.- 2011.- 17 iyun.- S. 8-9.