Regionların sosial-iqtisadi inkişafına dair Dövlət Proqramı Beyləqan rayonunda sürətlə həyata keçirilir

Birinci Dövlət Proqramının uğurlu davamı olan 2009-2013-cü illəri əhatə edən ikinci Dövlət Proqramının icrası da reallaşmaqdadır. Ölkənin regionlarında müasir infrastruktur yaradılması məsələlərinə toxunan Prezident İlham Əliyev demişdir: “Regionlarda müasir infrastrukturun yaradılması məsələsi öz həllini tapdı. Regionların siması dəyişdi, şəhərlərimiz öz qədim simasını saxlamaqla müasirləşdi, gözəlləşdi, abadlaşdı. İnsanlar üçün çox gözəl şərait yaradıldı, infrastruktur layihələri icra edildi, sosial obyektlərin tikintisinə böyük diqqət göstərildi. Bir sözlə, bölgələrdə, ən ucqar yerlərdə yaşamaq üçün daha da yaxşı şərait yaradılmışdır”.

Beyləqan: qədim bölgənin ən yeni tarixi hərtərəfli inkişafla əlamətdardır

Mil düzünün zəhmət meydanı, hünər qalası olan Beyləqan bu gün özü boyda quruculuq, yeniləşən bödgəyə çevrilib. Kürlə Araz arasındakı bu münbit ərazi tarixi yüksəlişin, çiçəklənmənin şahidi olmuşdur. Ulu Öndər Heydər Əliyevin Azərbaycana birinci dəfə rəhbərliyi dövründə də Beyləqanda iqtisadi həyat dirçəlmiş, sosial-mədəni sahə inkişaf etmişdi. Ümummilli Lider Heydər Əliyevin 1993-cü ilin yayında xalqın tələbi ilə hakimiyyətə qayıdışı Beyləqanın taleyində həlledici rol oynamış, bölgənin işğalı təhlükəsi sovuşdurulmuş, rayon dirçəliş və yeniləşmə yoluna qədəm qoymuşdur. Prezident İlham Əliyevin təşəbbüsü və rəhbərliyi ilə həyata keçirilən regional inkişaf proqramı isə qədim torpağa yeni həyat gətirmişdir. Beyləqan şəhəri, bütün yaşayış məntəqələri tanınmaz dərəcədə dəyişmişdir. Rayona budəfəki səfərimiz zamanı hər addımda yeniliklə, yüksək inkişaf göstəriciləri ilə üzləşdik, uğurlarla tanış olduq.

Uğurların möhkəm təməli

Ərazisi 1131 kv.km olan Beyləqan rayonunda 87 min nəfərdən çox əhali yaşayır. Son bir ildə rayonda əhalinin sayı 1,4 min nəfər artaraq 86,5 min nəfərə çatmışdır. Rayona gələnlərin sayı 316, gedənlərin sayı isə 21 nəfər olub. Bu, son 12 ildə ən yaxşı göstəricidir. Rayon iqtisadiyyatının əsasını aqrar sahə təşkil edir. Əkinçilik və maldarlıq aparıcı sahələrdir. Ötən ildə rayon iqtisadiyyatında məhsul istehsalının ümumi həcmi faktiki qiymətlərlə 93,2 milyon manat təşkil etmişdir. Məhsul buraxılışının adambaşına düşən həcmi 1050 manat təşkil edərək, əvvəlki ilin müvafiq dövründəkinə nisbətən 1,0 faiz artmışdır. Ümumi həcmin 50 milyon manatı (73,8 faiz) iqtisadiyyatın istehsal, 17,8 milyon manatı (26,2 faiz) xidmət sahələrinin payına düşür. Bu sahələrdə əlavə dəyər müvafiq olaraq 0,7 və 4,0 faiz artmışdır.

Ötən ildə rayonun iqtisadi və sosial sahələrinin inkişafı üçün bütün maliyyə mənbələri hesabına qoyulan vəsaitin məbləği 8,3 milyon manatı təşkil etmişdir. Onun 6,1 milyon manatı və ya 73,3 faizi tikinti-quraşdırma işlərinə yönəldilmişdir.

Təhsil və səhiyyədə modern standartlar

Regionların sosial-iqtisadi inkişafı Dövlət Proqramının digər rayonlarda olduğu kimi, Beyləqan rayonunun həyatında özünün səmərəli həllini tapmaqdadır. Rayonda sosial-iqtisadi və mədəni-quruculuq işləri yüksək templə aparılır. 2010-2011-ci tədris ilinin əvvəlində Beyləqan rayonunda 54 orta ümumtəhsil məktəb fəaliyyətdə olubdur. Məktəblərdə təhsil alan şagirdlərin sayı 12925 nəfərdir. Mövcud pedaqoji işçilərin sayı 1910 nəfərdən çoxdur. Məktəblərdə 1038 sinif otağı, 65 laboratoriya, 5 akt zalı, 20 idman zalı, 12 yeməkxana, 51 kitabxana var. Rayonda 30 məktəbdənkənar uşaq müəssisəsi fəaliyyət göstərir. Rayon əhalisinə 1 mədəniyyət və istirahət parkı, 55 idman qurğusu, 47 kitabxana, 4757 yeri olan 17 kənd mədəniyyət evi, 1470 yeri olan 18 klub, 700 yerlik rayon mədəniyyət sarayı xidmət göstərir. Rayonda tarix-diyarşünaslıq və Heydər Əliyev muzeyləri var. Son beş ildə dövlət proqramı çərçivəsində, Heydər Əliyev Fondunun təşəbbüsü ilə 1680 yerlik 7 ümumtəhsil məktəbi binası, yardımçı korpus tikilib istifadəyə verilibdir. 22 məktəbdə əsaslı, 23 məktəbdə isə cari təmir işləri aparılıb, 220 yerlik 1 orta məktəb tikilib, 6 məktəbdə əsaslı və cari təmir işləri görülübdür.

Rayon əhalisinə 565 çarpayısı olan 11 xəstəxana, 28 ambulator-poliklinika müəssisəsi, 113 həkim, 327 nəfər orta tibb işçisi xidmət göstərir. Bu statistik məlumatları qeyd edərkən həm də onu nəzərdə tuturuq ki, Dövlət Proqramının icrasına uyğun olaraq növbəti illərdəki tədbirləri müqayisə edərkən ölkəmizin ildən-ilə necə böyük sürətlə inkişafının qürurunu ayrı bir ovqatla yaşayaq.

Tikinti-quruculuq

Dövlət Proqramında yol infrastrukturu üzrə nəzərdə tutulmuş tədbirlərə uyğun olaraq respublika və yerli əhəmiyyətli avtomobil yollarının 43,1 kilometr hissəsi əsaslı təmir olunubdur. 45,4 kilometr yol dənəvər asfalt-beton qarışığı ilə tikilib, 31,6 kilometr qara örtüklə üzlənibdir. Bu yolların 93,5 min kvadratmetrində orta təmir işləri aparılıbdır. 15 yaşayış məntəqəsinin daxili yollarına 92,8 min kvadratmetr yeni asfalt örtüyü salınıb, 84,1 kilometrdə müvafiq təmir-tikini işləri aparılıbdır. Şəhərdaxili küçə və prospektərin 31,5 min kvadratmetr, səkilərin və ictimai həyətlərin isə 7,7 min kvadratmetr hissəsi dənəvər asfalt beton qarışığından tikilibdir. 4,5 kilometr uzunluqda yeni səkilər salınıb, 99 min kvadratmetr tamet və üzlük dekorativ daş döşənibdir. Rayonda uğurlu start götürmüş yenidənqurma, tikinti-abadlıq və mədəni quruculuq işləri ötən il daha intensiv davam etdirilir. Qarabağ müharibəsi əlilləri və şəhid ailələri üçün 24 mənzilli yaşayış binası tikilib, 81 saylı Beyləqan Dairə Seçki Komissiyasına, Meliorasiya İdarəsinə, Əhalinin Sosial Müdafiəsi Mərkəzinə, Məşğulluq Mərkəzinə və Əmək Müfəttişliyinə, “Texnikabank”a yeni inzibati binalar tikilib istifadəyə verilibdir.

Ümumiyyətlə, bütün bu uğurlu işlər, onu deməyə əsas verir ki, Beyləqan rayon ictimaiyyəti Ümummilli Liderimiz Heydər Əliyevin ideyalarını uğurla həyata keçirən ölkə Prezidenti İlham Əliyevin daxili və xarici siyasət xəttini dəstəkləyir və müdafiə edirlər.

RƏFİQƏ KAMALQIZI

Səs.- 2011.- 17 iyun.-S. 7.