Çində 28 May - Respublika Günü münasibətilə rəsmi qəbul təşkil edilib

Azərbaycanın Çindəki səfirliyi Azərbaycan Xalq Cümhuriyyətinin (AXC) yaranmasının 93-cü ildönümü münasibətilə rəsmi qəbul təşkil edib. Azərbaycan Mədəniyyəti Günlərində iştirak etmək üçün Çində səfərdə olan nümayəndə heyətinin üzvləri - mədəniyyət və turizm naziri Əbülfəs Qarayev, Milli Məclisin Azərbaycan-Çin parlamentlərarası əlaqələr üzrə işçi qrupu sədrinin müavini, Yeni Azərbaycan Partiyası (YAP) icra katibinin müavini Siyavuş Novruzov, Milli Məclisin deputatı Rauf Əliyev, Səbail Rayon İcra Hakimiyyəti başçısının birinci müavini Xalidə Bayramova, habelə Çin hökumətinin və ictimaiyyətinin, Pekində fəaliyyət göstərən diplomatik korpusun nümayəndələri, azərbaycanlılar, tələbələr və mətbuat nümayəndələri iştirak ediblər.

Azərbaycanın və Çinin dövlət himnləri səsləndirilib. Mədəniyyət və turizm naziri Əbülfəs Qarayev 1918-ci il mayın 28-də müsəlman Şərqində ilk demokratik respublikanın yarandığını qeyd edib. Ölkəmizin hazırda bütün sahələrdə sürətlə inkişaf etdiyini diqqətə çatdıran Ə.Qarayev, Azərbaycan-Çin əlaqələrinin son illər daha da genişləndiyini bildirib. Çin xarici işlər nazirinin müavini Çenq Quoping tədbirdə çıxış edərək, öz hökuməti adından Azərbaycan xalqını milli bayram münasibətilə təbrik edib, ən xoş arzularını bildirib. Çenq Quoping deyib ki, hazırda Azərbaycan-Çin əlaqələri ölkələrimizin rəhbərlərinin dəstəyi ilə daha da inkişaf edir. Üzərində Azərbaycanın və Çinin dövlət bayraqlarının təsviri əks olunduğu tort kəsildikdən sonra mərasim iştirakçıları Azərbaycan mətbəxinin nümunələrini dadıblar.

Səs.- 2011.- 1 iyun.- S. 4.