Milli Məclisin yaz sessiyası sona çatdı

Millət vəkilləri bir sıra qanun və məcəllələrə vacib dəyişikliklər etdilər

Dünən Milli Məclisin yaz sessiyasının son iclası keçirildi. İclasda bir sıra qanunvericilik aktlarına dəyişikliklər edildi. Öncə “Azərbaycan Respublikasının İnzibati Xətalar Məcəlləsində dəyişiklik edilməsi haqqında” qanun layihəsi müzakirə olundu. Layihə ilə bağlı Milli Məclisin Hüquq Siyasəti və Dövlət Quruculuğu Komitəsinin sədri Əli Hüseynli məlumat verdi: “İnzibati Xətalar Məcəlləsinin 116.0.7-ci maddəsinə təklif olunan dəyişiklikdə yazılı bildiriş göndərilmədən vətəndaşlara verilən təbii qazın, elektrik və ya istilik enerjisinin verilməsinin dayandırılmasına görə müfəttişlərin məsuliyyətini nəzərdə tutmuşdur. Belə ki, vətəndaşa istifadə etdiyi təbii qaz, elektrik və istilik enerjisinə görə borcun ödənilməsi ilə bağlı yazılış bildiriş verilmədən ona verilən mavi yanacaq, elektrik və istilik enerjisi kəsilə bilməz. Bu baş verdikdə müfəttiş məsuliyyət daşıyacaqdır”.

Daha sonra “Yol hərəkəti haqqında” qanuna dəyişikliklər layihəsi müzakirə olunub. Hüquq Siyasəti və Dövlət Quruculuğu Komitəsinin sədri Əli Hüseynli bildirib ki, son vaxtlar parlament tərəfindən bir sıra məcəllələrə və qanunlara edilən dəyişikliklər müvafiq dövlət orqanlarının fəaliyyətində şəffaflığın təmin olunmasına xidmət edir. Ə.Hüseynli bildirib ki, bu dəyişikliklərin təşəbbüskarı dövlət başçısıdır. Onun sözlərinə görə, həmin layihələr məhz Azərbaycan Prezidentinin qanunvericilik təşəbbüsü ilə parlamentə daxil olub. Komitə sədri qeyd edib ki, qanunvericiliyə edilən mütərəqqi dəyişikliklər bilavasitə vətəndaşların mənafeyinə uyğundur və bütün sahələrdə şəffaflığın təmin edilməsilə şərtlənir. Layihə haqqında məlumat verən Ə.Hüseynlinin sözlərinə görə, qanunun 85-ci maddəsinə 85-1 əlavəsi edilib. Qanuna təklif olunan dəyişiklikdə inzibati xəta törətmiş şəxsə cəriməni müvafiq icra hakimiyyəti orqanının əməkdaşında olan xüsusi texniki vasitədən (POS-terminal) istifadə etməklə plastik kart vasitəsi ilə ödəmək imkanı verilir. Qəbul edilən qərar və təyin olunan cərimənin məbləği protokolda göstərilir.

Müzakirələr zamanı deputatlar bu dəyişikliyin əhalinin sosial müdafiəsinin gücləndirilməsi istiqamətində mütərəqqi addım olduğunu qeyd etmişlər. Sonda qanun layihəsi səs çoxluğu ilə təsdiq edildi.

“Yol hərəkəti haqqında” Azərbaycan Respublikasının Qanununda dəyişikliklər edilməsi barədə” qanun layihəsini də müzakirəyə Ə.Hüseynli təqdim etdi. Qeyd olundu ki, Qanuna təklif olunan dəyişikliklərdən birinin məqsədi şəxslərin yol hərəkəti qaydalarının pozmaları ilə əlaqədar barələrində tətbiq edilən inzibati tənbeh haqqında qərarlarla və onların nəticələri (cərimələr və onların ödənilməsi, balların sayı və ya silinməsi) ilə bağlı rəsmi internet informasiya ehtiyatlarından məlumat almalarını təmin etməkdir: “Qanuna 85-1-ci maddənin əlavə edilməsi də nəzərdə tutulmuşdur. “Yol hərəkəti qaydaları pozuntusunun aşkar edilməsi və məsuliyyətə cəlb etmə qaydası” adlanan bu maddəyə görə inzibati cərimə növündə inzibati tənbeh barədə qərarın qanuni qüvvəyə mindiyi gündən 30 iş günü müddətində inzibati xəta törətmiş şəxs cərimə bildirişi üzrə müvafiq məbləği banka ödəməlidir. Barəsində inzibati cərimə tənbeh növü tətbiq edilən şəxs qərarı dərhal və ya qərar qanuni qüvvəyə mindiyi gündən 3 iş günü müddətində icra edərsə, tətbiq olunan cərimənin 10 faizi miqdarında məbləğinin ödənişindən azad edilir. İnzibati cərimə növündə inzibati tənbeh tətbiq etmə haqqında qərar qanuni qüvvəyə mindiyi gündən 30 iş günü müddətində cəriməni qanunla müəyyən edilmiş əsaslar olmadan ödəməyən şəxsə onun ödənilmədiyi hər növbəti gün üçün cərimə məbləğinin 2 faizi miqdarında dəbbə pulu tətbiq edilir”.

Cavid Qurbanov: “Bakıda 76 taksi dayanacağı tikiləcək”

Müzakirələr zamanı çıxış edən millət vəkili Elmira Axundova dəyişiklikləri müsbət qiymətləndirib. Digər millət vəkili Xanhüseyn Kazımlı bu dəyişiklikləri müsbət qiymətləndirsə də, Bakının bəzi küçələrindəki tıxaclardan şikayətlənib. Onun sözlərinə görə, dövlət yol polisləri tıxacların aradan qaldırılması üçün fəaliyyətlərini gücləndirməlidirlər.

“Azəryolservis” ASC-nin sədri, millət vəkili Cavid Qurbanov isə Bakıda 76 taksi dayanacağının tikiləcəyini bildirib. Onun sözlərinə görə, artıq bununla bağlı qərar hazırlanıb və hökumətə təqdim olunub. Millət vəkili deyib ki, bundan başqa, dövlət başçısının Sərəncamına əsasən Bakı şəhərində 120-dən artıq dayanacaq tikilməlidir. C.Qurbanovun fikrincə, görüləcək bu işlər tıxacların aradan qaldırılması kömək edəcək.

Zeynəb Xanlarova: “Dünyanın hər yerini gəzmişəm və belə işlərin yalnız gecələr görüldüyünü görmüşəm”

Millət vəkili Zeynəb Xanlarova çıxışında yol polislərinin fəaliyyətini yüksək qiymətləndirib. Onun fikrincə, Bakıda tıxacların yaranmasının əsas səbəbi yolların qazılması, tikinti işlərinin aparılmasıdır: “Əlbəttə, mən tikinti- quruculuq işlərinin əleyhinə deyiləm. Amma faktdır ki, gündüzlər görülən bu işlər yolda hərəkətə mane olur. Mən dünyanın hər yerini gəzmişəm və şahidi olmuşam ki, belə işlər gecələr görülür. Burada məqsəd isə nəqliyyatın, insanların gediş-gəlişinə mane olmamaqdır. Mən hesab edirəm ki, bu təcrübədən bizdə də istifadə olunmalıdır”.

Siyavuş Novruzov: “Şəhərdə nəqliyyatın sıxlığı iqtisadi inkişafın göstəricisidir”

YAP İcra katibinin müavini, millət vəkili Siyavuş Novruzov da bu dəyişikliklərin tərəfdarı olduğunu bildirdi. Onun sözlərinə görə, şəhərdə nəqliyyatın sıxlığı iqtisadi inkişafın göstəricisidir. Millət vəkili qeyd edərək bildirdi ki, MDB ölkələrində adambaşına düşən maşınların sayına görə Azərbaycan birinci yerdə gedir: “Tikinti-quruculuq işlərinin getməsi insanların gələcək həyatını təmin etmək üçündür. Bu işlər zamanı yaranan narahatlıqlar müvəqqəti xarakter daşıyır. Digər tərəfdən, yeraltı və yerüstü keçidlər var, amma çox zaman onlardan istifadə olunmur. Ona görə də, bu məsələ ilə bağlı insanlar arasında hüquqi maarifləndirmə aparılmalıdır, eyni zamanda, qanunlar tətbiq olunmalıdır. Həmçinin, taksi istifadəsi ilə bağlı dünya təcrübəsi tətbiq edilsə yaxşı olar. Məsələn, İstanbul kimi şəhərdə 14 min taksi var və bundan artıq ola bilməz. Bu gün bizdə isə kimsə sərəncam alaraq nə qədər istəyir, taksi gətirir və onlardan da şəhərdə istifadə edir. Bu da problem yaradır. Həmçinin, müxtəlif adamlar öz maşınlarından taksi kimi istifadə edirlər. Hesab edirəm ki, bu məsələlər tənzimlənməlidir”.

S.Novruzov bu sahədə Naxçıvan Muxtar Respublikasının yaxşı təcrübəsinin olduğunu bildirdi. Onun sözlərinə görə, Muxtar Respublikada həm avtobus, həm də taksi sürücülərinin müəyyən qaydalara əməl etmələri vacib şərtdir. Bütövlükdə, Naxçıvanda nəqliyyat sistemi ciddi şəkildə tənzimlənib.

Məsələyə münasibət bildirən spiker Oqtay Əsədov bildirdi ki, qanunlara edilən dəyişiklər vacibdir. Onun sözlərinə görə, dövlət başçısının imzaladığı sərəncamlar da insanların maraqları baxımından böyük əhəmiyyət kəsb edir. Spiker qeyd etdi ki, görülən müsbət işlər təqdir olunmalıdır.

Sonda qanun layihəsi millət vəkillərinin səs çoxluğu ilə qəbul edildi.

Sonra “Azərbaycan Respublikasının İnzibati Xətalar Məcəlləsində dəyişikliklər edilməsi haqqında” qanun layihəsinə baxıldı. Hüquq Siyasəti və Dövlət Quruculuğu Komitəsinin sədri Ə.Hüseynli bildirdi ki, bu dəyişikliklər bundan əvvəl müzakirə olunan məsələ ilə bağlıdır. Belə ki, qanun layihəsinə əsasən İnzibati Xətalar Məcəlləsinə 159-1-ci maddənin əlavə edilməsi təklif olunur. Bu maddəyə görə yol hərəkəti qaydaları əleyhinə olan inzibati xətaların törədilməsinə görə inzibati cərimə növündə inzibati tənbeh tətbiq etmə haqqında qərarın qanuni qüvvəyə mindiyi gündən 3 ay müddətində qanunla müəyyən edilmiş əsaslar olmadan icra edilməməsinə görə nəqliyyat vasitələrini idarə etmək hüququ 6 ay müddətinə məhdudlaşdırılır.

Qanun layihəsi səsə qoyularaq təsdiq olundu.

İclasda “Azərbaycan Respublikasının Mülki Prosessual Məcəlləsində dəyişiklik edilməsi haqqında” qanun layihəsi də müzakirə olundu. Qeyd edildi ki, Məcəlləyə təklif olunan dəyişikliklər Azərbaycan Respublikası Ali Məhkəməsinin Plenumu tərəfindən ərizələrə baxılması ilə bağlı məsələləri özündə ehtiva edir.

Deputatlar qanun layihəsinin lehinə səs verdilər.

İclasda son olaraq “Azərbaycan Respublikasının Cinayət Məcəlləsində dəyişikliklər edilməsi haqqında” və “Azərbaycan Respublikasının Cəzaların İcrası Məcəlləsində dəyişikliklər edilməsi haqqında” qanun layihələrinə münasibət bildirildi.

Qısa müzakirədən sonra hər iki qanun layihəsi səs çoxluğu ilə qəbul edildi.

Gündəlikdəki məsələlərin müzakirəsi başa çatdıqdan sonra spiker Oqtay Əsədov Azərbaycan Respublikası Milli Məclisinin 2011-ci il yaz sessiyasının başa çatdığını elan etdi.

Sonra Azərbaycan Respublikasının Dövlət Himni səsləndirildi.

Bununla da Milli Məclisin yaz sessiyası başa çatdı.

RƏFİQƏ KAMALQIZI

Səs.- 2011.- 1 iyun.- S. 5.