“Xocalı - şəhid şəhər"

Milli kitabxanada bu adda kitab sərgisi təşkil olunub

Dünən M.F.Axundov adına Milli Kitabxanada Xocalı faciəsinin 19-cu ildönümünə həsr olunmuş "Xocalı - şəhid şəhər" adlı kitab sərgisinin açılışı və kitabxananın əməkdaşları tərəfindən hazırlanmış Xocalı adlı elektron məlumat bazasının "Soyqırımı cinayəti" və "Xocalı soyqırımı" kitablarının təqdimat mərasimi keçirildi. "Xocalı" adlı elektron məlumat bazasının təqdimatı ilə başlayan tədbirdə giriş sözü ilə çıxış edən milli kitabxananın direktoru Kərim Tahirov 1992-ci ilin fevral ayının 25-dən 26-na keçən gecə Xocalı şəhərində baş vermiş dəhşətli faciənin Azərbaycan xalqının qan yaddaşında xüsusi iz buraxdığını bildirdi. Qeyd etdi ki, bu soyqırımı XX əsrin ən dəhşətli və qanlı faciəsi olmaqla yanaşı, İkinci Dünya müharibəsində faşizmin törətdiyi qırğınlardan sonra müasir dövrdə erməni separatçı terrorçuları ilə birlikdə rusların 366-cı motoatıcı alayının törətdiyi kütləvi bir soyqırımıdır.

Tədbirin digər çıxışçısı gənc yazar, publisist Nəzmiyyə Hicran 1992-ci ilin fevral ayının 25-dən 26-na keçən gecə Xocalı şəhərində XX əsrin ən dəhşətli və qanlı faciələrindən birinin törədildiyini qeyd etdi. Bildirdi ki, sivilizasiya mərkəzlərindən olan Xocalı şəhəri hələ işğaldan əvvəl artıq 1991-ci ilin oktyabr ayından etibarən düşmən əhatəsində qalmışdı. Həmin vaxtdan etibarən, Xocalıya avtomobillərin gediş-gəlişi tamamilə kəsilmiş, şəhərlə ancaq hava nəqliyyatı vasitəsilə gediş-gəliş məhdud səviyyədə təmin edilirdi. Bu isə 1992-ci ilin yanvar ayının 28-də içərisində 40 nəfərlik mülki şəxsin olduğu vertolyotun düşmən tərəfindən partladılması ilə sona çatdı deyən N.Hicran bundan əlavə Xocalıya elektrik enerjisinin verilməsinin də dayandırıldığını diqqətə çatdırdı. Bildirdi ki, artıq 1992-ci ilin fevral ayının ikinci yarısından etibarən erməni hərbi birləşmələrinin blokadasına alınaraq, müntəzəm şəkildə ağır hərbi texnikadan atəşə tutulurdu. "Məhz 1992-ci ilin fevral ayının 25-dən 26-na keçən gecə o vaxt Xankəndində olan 366-cı ruslardan ibarət motoatıcı alayın texnikası Xocalıya hücum edərək, dinc, əliyalın insanlara qarşı amansızcasına divan tutmuşlar. Bu dəhşətli qətliam nəticəsində 613 nəfər dinc sakin amansızcasına qətlə yetirilmiş, bəşəriyyət XX əsrin çox müdhiş soyqırımı və etnik təmizləmə cinayətini müşahidə etmişdir" deyən gənc yazar bütün bunlara baxmayaraq, Azərbaycan xalqının mübarizə əzminin heç vaxt sınmadığını düşmənə istənilən an layiqli cavab vermək əzmində olduğunu bildirdi. Mədəniyyət və turizm nazirinin birinci müavini Vaqif Əliyev də öz çıxışında Xocalı müsibətlərini, o ağrılı günləri bir daha yada saldı və bu genosidin heç vaxt Azərbaycan xalqının yaddaşından silinməyəcəyini qeyd etdi. Tədbirin digər çıxışçıları da Xocalı qətliamından, əsrin faciəsindən və xalqımızın başına gətirilən müsibətlərdən bəhs etdilər. Tədbir iştirakçılarının milli kitabxananın hazırladığı 200-dən artıq kitab, jurnal və qəzet materiallarından ibarət "Xocalı - şəhid şəhər" sərgisi böyük marağa səbəb olub.

Tapdıq Qurbanlı

Səs.- 2011.- 1 mart.- S. 10.