Gənc Tamaşaçılar Teatrı "Əcəl atı"nı təqdim edib

Azərbaycan Dövlət Gənc Tamaşaçılar Teatrında "Əcəl atı" tamaşasının premyerası nümayiş etdirilib. Yazıçı-publisist Vaqif Əlixanlının "Hardasan oğul" əsəri əsasında səhnələşdirilən "Əcəl atı" tamaşası yüksək vətənpərvərlik ruhunda qələmə alınaraq xalqımızın başına gətirilən müsibətləri əks etdirir. İki hissədən ibarət olan tamaşanın quruluşçu rejissoru Ağalar İdrisoğlu, quruluşçu rəssamı Mustafa Mustafayev, bəstəkarı, əməkdar incəsənət xadimi Sərdar Fərəcov, rejissoru Sərvər Əliyev, rəqslərin və plastik hərəkətlərin quruluşçusu Vüsal Mehrəliyevdir.

Torpaqlarımızın azadlığı uğrunda şəhid olmuş soydaşlarımızın əziz xatirəsinə həsr olunmuş səhnə əsərində rolları əməkdar artistlər Qəmər Məmmədova (Sədəf qarı), Rahib Əliyev (İrvahim, ata), Lətifə Əliyeva (Məsmə), Gülər Nəbiyeva, aktyorlar Şəfəq Əliyeva (Mariya), Xalidə Şərifova (Gülnaz), Yasəmən Məmmədova (Züleyxa), Hüsniyyə Əhmədova (gəlin), Məhərrəm Musayev (Şəmi), Sərvər Əliyev (Səftər, Əbdülqasım), Vahid Əliyev (urus), Elxan Qurban (Karen), Sabir Məlikov (şofer), Elşən Çarhanlı (Feliks), Zenfira Əbdülsəmədova (II gəlin), Natiq Fərzəliyev (Səftərin oğlu), Ədalət Əbdülsəmədov (Coqaş, Sarvan), Kərəm Hadızadə (Marlen), Qədirhüseyn İsmayılov (Əlvahim), Elşən Hacıbabayev (Hətəm), Rəşad Səfərov (Seyfi, müəllim), Fidan Abbasova (uşaq), Nuriyə Əliyeva canlandırmışlar.

Tamaşa kəskin konfliktlər, dramatik məqamlar, maraqlı epizodlar üzərində qurulmuşdur. Qorxudulan əhali doğma yurd-yuvalarını qoyub qaçmağa hazırlaşır. Kəndin ağbirçəyi Sədəf qarının insanları geri qaytarmaq istəyi baş tutmur. Sədəf qarıdan başqa heç kimin gözünə görünməyən yəhər-yüyənli əcəl atı sonda kənddə yalqız qalan qarını özü ilə aparır. Tamaşaçılar tərəfindən maraqla qarşılanan səhnə əsəri Qarabağ həqiqətlərini bir daha soydaşlarımızın yaddaşına həkk edərək, Gənc Tamaşaçılar Teatrın repertuarında uzunömürlü tamaşalardan biri olacaq.

Zümrüd

Səs.- 2011.- 1 mart.- S. 12.