Nəsimi rayonunda Xocalı faciəsinin 19-cu ildönümü qeyd olunub

Respublikamızın hər yerində olduğu kimi, Nəsimi rayonunda da Xocalı faciəsinin 19-cu ildönümü geniş şəkildə qeyd olunub. Rayondakı tədbirlərin yekunu olaraq Azərbaycanın Milli Qəhrəmanı, Xocalının müdafiəsi zamanı həlak olmuş Aqil Quliyevin Nizami küçəsindəki yaşadığı binanın qarşısında anım mərasimi keçirildi. Qəhrəmanın xatirə lövhəsi önünə gül dəstələri qoyuldu.Sonra rayon ictimaiyyəti nümayəndələrinin iştirakı ilə mərasim keçirildi. Öncə tədbir iştirakçıları rayon məktəblərində Xocalı mövzusunda keçirilmiş rəsm müsabiqəsinin yekun sərgisinə tamaşa ediblər. Tədbirdə Nəsimi rayon icra hakimiyyətinin başçısı Nəsib Məhəməliyev 19 il əvvəl xalqımızın tarixində ən dəhşətli faciələrdən olan Xocalı soyqırımına məruz qaldığını söyləyib: "Xalqımız düşmənə cavab verən qəhrəman bir xalq olub. Bu hadisə XX əsrin ən dəhşətli və qəddar faciələrindən biri hesab edilə bilər.

Xocalı faciəsi iki yüz ilə yaxın bir müddətdə erməni şovinist-millətçiləri tərəfindən azərbaycanlılara qarşı, müntəzəm olaraq, həyata keçirilən etnik təmizləmə və soyqırımı siyasətinin davamı və ən qanlı səhifəsidir. Öz miqyasına və dəhşətlərinə görə dünya tarixində analoqu olmayan Xocalı soyqırımını törətməkdə erməni şovinistləri və ideoloqları uzağagedən məqsəd güdürdülər. 1992-ci il fevralın 25-dən 26-na keçən gecə Ermənistan silahlı qüvvələri Rusiyanın 366-cı motoatıcı alayının iştirakı ilə Xocalı şəhərini işğal edərək, etnik azərbaycanlılara qarşı soyqırımı aktı törətmişdir". Anımla bağlı tədbirdə 1 və 54 saylı məktəblərin və rayonun özfəaliyyət kollektivlərinin hazırladıqları kompozisiya nümayiş etdirilib. Tədbirin sonunda Nəsimi rayonunda məskunlaşmış 65 Xocalı ailəsinə maddi yardım edildi.

RƏFİQƏ HÜSEYNOVA

Səs.- 2011.- 1 mart.- S. 10.