Gədəbəy: inkişaf və quruculuq dövrü

Rayonda sahibkarlığın inkişafına 4,7 mln manat kredit verilib

İqtisadi inkişaf yolunda inamla irəliləyən, regionun aparıcı dövlətinə çevrilən Azərbaycanın bölgələri gündən-günə daha da çiçəklənir, ölkəmizin hər bir guşəsində irimiqyaslı layihələr icra olunur. Prezident İlham Əliyevin rəhbərliyi altında regionlarda yeni sənaye müəssisələri, nəhəng sağlamlıq mərkəzləri, təhsil ocaqları, müasir idman kompleksləri, göz oxşayan parklar istifadəyə verilir, minlərlə insanın əməyə cəlb olunması onların rifah halının yaxşılaşması ilə nəticələnir. Gədəbəy rayonunda da bu inkişaf bütün sahələrdə özünü göstərir.

"Regionların sosial-iqtisadi inkişafı Dövlət Proqramı" çərçivəsində genişmiqyaslı işlər görülür

Gədəbəy rayon icra hakimiyyətindən əldə etdiyimiz məlumata görə, "Regionların sosial-iqtisadi inkişafı Dövlət Proqramı" çərçivəsində genişmiqyaslı işlər görülür. Bu proqramın uğurla həyata keçirilməsində məqsəd əhalinin sosial təminatını və güzəranını yaxşılaşdırmaqdan ibarətdir. Verilən məlumata görə, proqram çərçivəsində rayonda bütün sahələrdə sürətli inkişaf gedir. Rayon mərkəzində tikinti-quruculuq, abadlıq işləri, demək olar ki, başa çatıb. 2009-cu ildə 8 məktəb tikilərək istifadəyə verilib, sərhəd kəndlərin qazlaşdırılması işləri davam edir. Rayonda 85 məktəbdən 76-sı yenidən tikilib və ya əsaslı təmir olunub. İcra başçısı vurğulayıb ki, Gədəbəy ölkənin ən böyük heyvandarlıq rayonlarından biridir. Hazırda rayonda 350 min baş qoyun və keçi var. 85 min baş iri buynuzlu mal-qara var. Gədəbəy, həmçinin, iri kənd təsərrüfatı və kartofçuluq rayonudur. 2009-cu ildə rayonda 200 min ton kartof istehsal olunub. 2003-cü ilə nisbətən rayonda minimum əmək haqqı 7 dəfə artıb. 2003- cü ildə 44 manat idi isə indi 290 manatdır. 2009-cu ildə yaşayış sahələrinin ümumi həcmi 130 min kvadratmetr olub. Kənd təsərrüfatı məhsullarının emalı, kəndarası yolların təmiri nəzərdə tutulub. Bilirsiniz ki, Gədəbəy mineral sularla zəngindir. Slavyankada 3 turizm obyekti Maarif kəndində Kiçik Qafqaz Turizm Mərkəzi açılıb.

Sürətli sənayeləşmə prosesi

Vurğulamaq lazımdır ki, bu gün respublikamızın bütün bölgələrində olduğu kimi, Gədəbəy rayonunda da sahibkarlığın inkişafı üçün münbit şərait yaradılıb. Bu səbəbdən də kənd təsərrüfatı ilə yanaşı, rayonda sənayeləşmə də sürətlənib. Belə ki, ötən il mayın 26-da Gədəbəy qızıl emalı zavodunun açılışı bunun bariz nümunəsidir. Bununla da dünya qızıl istehsalçılarının siyahısına Azərbaycan da qoşulub. Eyni zamanda, yeni Mis zavodu istifadəyə verilməsi, Gümüş zavodunun tikilməsi Gədəbəy rayonunda sənayeləşmə prosesinin getdikcə sürətləndiyini təsdiq etməklə yanaşı, həmçinin, rayonda sahibkarlara yaradılan əlverişli şəraitin olduğunu da sübut edir.

Sahibkarlığa diqqət və qayğı

Güzəştli kreditlər hesabına layihələrin həyata keçirilməsi prosesi Gədəbəy rayonunda da uğurla aparılır. Belə ki, ötən dövr ərzində Gədəbəy rayonunda kartof saxlanması üçün ümumi tutumu 10 min ton olan soyuducu anbar kompleksinin yaradılması, gündəlik 10 ton süd və 10 ton kartof emalı sahəsinin yaradılması məqsədilə dəyəri 4,1 mln. manat, illik istehsal gücü 12,8 mln. litr olan müasir tələblərə cavab verən mineral su və limonad istehsalını nəzərdə tutan dəyəri 2,8 mln. manat olan 2 investisiya layihəsinə fond tərəfindən 4,7 mln. manat güzəştli kredit verilib. Həmçinin, bu layihələrin reallaşdırılması Gədəbəy rayonunda 100-ə yaxın yeni iş yerinin yaradılmasına da imkan verəcək.

Həyata keçiriləcək layihələr Gədəbəy rayonunun sosial- iqtisadi inkişafına təkan verməklə yanaşı, ölkədə kartofçuluğun inkişafında, əhalinin keyfiyyətli yerli ərzaq məhsulları ilə təmin edilməsində əhəmiyyətli olacaq.

Gədəbəy raon icra hakimiyyətinin verdiyi məlumata əsasən, 2010-cu ildə rayonda 3686 istehsalçıya 2 min 762 ha əkin sahəsinin becərilməsində istifadə etdikləri yanacaq və motor yağlarına görə dövlət büdcəsinin vəsaiti hesabına 110 min 486 manat yardım verilmişdir. Bundan əlavə, 303 buğda istehsalçısına 10 min 862 manat əlavə yardım verilməsi üçün sənədlər Respublika Komissiyasına təqdim olunmuşdur. Həmçinin, rayon "Aqroservis" xidməti tərəfindən istehsalçılara 50 faiz güzəştlə 213513 kq azot, 8080 kq superfosfat gübrələri satılmışdır. 2010-cu ildə Dövlət Proqramına (2009 - 2013-cü illər) əsasən Gədəbəy "Aqroservis" filialı tərəfindən ümumi dəyəri 114 min 895 manatlıq kənd təsərrüfatı texnikaları gətirilmişdir. Rayonda kənd təsərrüfatı məhsullarının istehsalı 2003-cü illə müqayisədə nəzərəçarpacaq dərəcədə artmışdır. Belə ki, kartof istehsalı 2010-cu ildə 208 min 777 ton olmuşdur, bu da 2003-cü illə müqayisədə, 57 min 277 ton çoxdur. Rayon üzrə adambaşına 2 ton 225 kq kartof düşür. Həmçinin, 2010-cu ildə 16698 sentner taxıl istehsal olunub. Ötən il 11223 ton ət istehsal edilib ki, bu da 2003-cü illə müqayisədə 8597 ton olub. Rayonda digər kənd təsərrüfatı məhsulları istehsalı da dinamik şəkildə artmışdır. Gədəbəydə iribuynuzlu mal-qaranın sayı 2003-cü ildə 44 min 827 baş olduğu halda 2010-cu ildə bu rəqəm 84 min 634 başa, yəni 39 min 207 baş çox, qoyun və keçilərin sayı 2003-cü ildə 206 min 824 baş olduğu halda, 2010-cu ildə 354 min 444 baş, yəni 145 min 620 baş çox olub. Rayonda istehsal olunan yüksək keyfiyyətli kənd təsərrüfatı məhsulları Bakı şəhərində keçirilən "kənd təsərrüfatı məhsullarının satışı yarmarkaları"na mütəmadi olaraq göndərilir. 2010-cu ildə kənd təsərrüfatı məhsullarının satışı yarmarkalarına 738 ton kartof, 146 ton kök, 245 ton kələm, 28,3 ton pendir, 13,1 ton bal, 5,1 ton armud, 9,3 ton alma, 97,7 ton çuğundur məhsulu göndərilib.

Təhsil və səhiyyədə yeniləşmə faktorları

"Regionların sosial-iqtisadi inkişafı Dövlət Proqramı"na əsasən son 6 ildə Gədəbəydə tikinti-quruculuq işləri geniş vüsət almış, yeni-yeni məktəb binaları, mədəniyyət ocaqları, xəstəxanalar tikilmiş, parklar salınmışdır. Belə ki, 2003-cü ilə kimi rayonda 1 ədəd də kompyuter olmadığı halda, hazırda 400-ə yaxın kompyuter var. Bu illərdə məktəblərə 3500-ə yaxın parta, 300-dən çox lövhə, 600-dən artıq stol, 1400-ə yaxın stul, 400-dən çox rəf verilmişdir. Məktəblərin hamısı pulsuz dərsliklərlə təmin olunmuşdur. Son 6 ildə rayonda 26 yeni məktəb binası tikilib istifadəyə veriləcək. 44 məktəb binası əsaslı təmir olunmuş, 60-dan artıq əlavə sinif otaqları tikilmişdir. Ötən il dövlət proqramı çərçivəsində 200 yerlik Dəyəqarabulaq, 220 yerlik Xarxar kənd orta, 180 yerlik Arısu kənd əsas məktəbi inşa olunaraq şagirdlərin istifadəsinə verilmişdir. Bundan başqa, Çalburun kənd orta, 2 saylı şəhər orta, Ərtəpə və Mormor kənd məktəbləri əsaslı təmir edilmişdir. Nəzərə çatdıraq ki, 20-25 il əvvəl rayonun 86 ümumtəhsil məktəbinin yalnız 4-ü birtipli layihə əsasında inşa olunmuşdu və qalanları uyğunlaşdırılmış, həm də çoxu qəza vəziyyətində olan binalarda yerləşirdi.

Səhiyyə də əvvəlki səhiyyə deyil. İndi akademik Zərifə Əliyeva adına Mərkəzi rayon xəstəxanası ən müasir tibbi avadanlıqlarla təchiz edilibdir. Hazırda əhalinin sağlamlığı keşiyində 455 nəfər tibb işçisi dayanır ki, onun da 90 nəfəri ali təhsilli həkimdir. Rayonda 35 çarpayılıq uşaq xəstəxanası, 9 kənd sahə xəstəxanası, 9 həkim ambulatoriyası, 49 feldşer-mama məntəqəsi, Gigiyena Epidemiologiya Mərkəzi fəaliyyət göstərir. Bütövlükdə, əhalinin hər min nəfərinə 9 həkim düşür. Bütün bu nailiyyətlər, onu deməyə əsas verir ki, regionların sosial-iqtisadi inkişafına dair Dövlət Proqramı Gədəbəy rayonunda böyük uğurla reallaşır.

RƏFİQƏ KAMALQIZI

Səs.- 2011.- 4 mart.- S. 6.