Qadınların cəmiyyətdə
rolu olduqca böyükdür
"Səs" qəzeti qarşıdan gələn 8
Mart Beynəlxalq Qadınlar Günü münasibəti ilə
dəyirmi masa keçirdi
(Əvvəli
ötən sayımızda)
Artıq ənənəvi
olaraq ölkəmizin ictimai, siyasi və mədəni həyatında
baş verən əhəmiyyətli hadisələrlə
bağlı hökumət, dövlət nümayəndələrinin,
millət vəkillərinin, ziyalıların iştirakı ilə
"Səs" qəzetində dəyirmi masalar təşkil
olunur. Məhz mətbu orqanın redaksiyasında keçirilən
dəyirmi masanın budəfəki mövzusu da,
qarşıdan gələn 8 Mart Beynəlxalq Qadınlar
Gününə həsr olunub. Dəyirmi masada Yeni Azərbaycan
Partiyasının Nizami rayon təşkilatının sədri,
Milli Məclisin üzvü Sədaqət Vəliyeva, YAP
Qaradağ rayon təşkilatı qadınlar
şurasının sədri Təranə İsmayılova, Səbail
rayon icra hakimiyyəti başçısı aparatı təhsil,
səhiyyə və mədəniyyət şöbəsinin
müdiri Pərvanə Kazımzadə, "Zəngin Azərbaycan
Uğrunda" İctimai Birliyinin sədri İradə Əliyeva,
Azərbaycan Jurnalist Qadınlar Assosiasiyasının rəhbəri
Sevil Yusifova, Ailə Qadın və Uşaq Problemləri
üzrə Dövlət Komitəsinin nümayəndəsi Aynənsə
Paşayeva, Azərbaycan Dövlət Pedaqoji Universitetinin əməkdaşı
Laçın Həsənova, "Demokratik Qadın
dünyası" İctimai Birliyinin sədri Vəsilə Kərimova
iştirak edirdilər.
"Səs" qəzetinin
şöbə müdiri Rəfiqə Kamalqızı dəyirmi
masada giriş sözü ilə çıxış edərək,
kolektiv adından qarşıdan gələn 8 Mart Beynəlxalq
Qadınlar Günü münasibəti ilə Mehriban xanım Əliyevanın
timsalında Azərbaycan qadınlarına təbriklərini
çatdırdı. R.Kamalqızı
qadınların cəmiyyətdəki çoxşaxəli
rolundan bəhs edərək, zərif cinsin nümayəndələrinin
ölkəmizin aparıcı sahələrində tutmuş
olduğu mövqelərindən, onların milli-mənəvi dəyərlərimizin
qorunub saxlanmasında və təbliğində aparıcı
rolunu vurğuladı. Qeyd etdi ki, bu gün belə bir möhtəşəm
bayramı qeyd etməyə Azərbaycan qadınının mənəvi
haqqı var. "Müasir dövrümüzdə Azərbaycan
qadını ölkənin ictimai-siyasi həyatında rol
oynayan bir varlıqdır. Bununla yanaşı, ölkənin həyatında
yüksək fəallıq göstərən Azərbaycan
qadını ictimai-siyasi proseslərdə də yaxından
iştirak edir. Azərbaycanın dünya dövlətləri
sırasında tanınmasında, müstəqillik
dövrümüzün ilk illərində ölkəni
mövcud olan xaoslardan xilas edən Ümummilli Lider Heydər Əliyevin
qadınlarımıza verdiyi qiymət hər kəsə bəllidir.
Ulu Öndərimiz Heydər Əliyev Azərbaycan
qadınına nə qədər zərif, mədəni bir
şəkildə yanaşaraq, onun incə ruhuna xoş ovqatlar
bəxş edirdi. Onu da qeyd edim ki, hər il 8 Mart Beynəlxalq
Qadınlar Günü ərəfəsində Ümummilli
Lider Heydər Əliyev qadınlarla görüş təşkil
edir, onların bayramını təbrik edirdi. Bu, qadına
dövlət tərəfindən göstərilən
qayğının təzahürü
idi. Azərbaycan qadınının adını ən yüksək
və layiqli formada Avropa, Amerika
kimi ölkələrdə daha da ucalara qaldıran Azərbaycanın
birinci xanımı, YUNESKO və İSESKO-nun xoşməramlı
səfiri, millət vəkili
Mehriban xanım Əliyevanın timsalında da qadına
münasibət, inam tamamilə başqa bir səpkidə
olduğunu aydın şəkildə görmək
mümkündür" deyən R.Kamalqızı Ulu Öndər
Heydər Əliyevin zəngin irsinin ən layiqli
davamçısı olan cənab Prezident İlham Əliyev tərəfindən
uğurla həyata keçirilən siyasətin tərkib hissəsində
də, qadın faktoruna böyük önəmin yer
almasından bəhs etdi. Məhz dəyirmi masa
iştirakçılarına da ölkədə
qadınların rolu və cəmiyyətimizin aparıcı
qüvvəsi olan zərif cinsin nümayəndələrinin tutmuş
olduqları vəzifələrdən asılı olmayaraq,
onların bir ana kimi sağlam övlad böyütmələrinə
toxunan R.Kamalqızı bu mövzu ətrafında müzakirələrin
aparılmasının zəruriliyini vurğuladı.
“Heydər Əliyev Fondunun prezidenti, YUNESKO və
İSESKO-nun xoşməramlı səfiri Mehriban xanım Əliyevanın
timsalında qadınlarımızın nə dərəcədə
böyük işlər görməyə qadir olduğunu hər
kəs görüb"
Sədaqət Vəliyeva:
- Ölkəmizdə aparılan geniş quruculuq, abadlıq işləri, həyata keçirilən məqsədyönlü siyasət qadınların da müxtəlif sferalarda təmsilçilik hüququ əldə etməsinə böyük imkanlar yaradır. Ona görə də, bugünkü reallıqda cəmiyyətimizin ayrı-ayrı təbəqələrində qadınlarımızın aparıcı qüvvə kimi iştirakını müşahidə etmək mümkündür. Çünki Azərbaycan qadını, qeyd etdiyimiz kimi, özünün milli-mənəvi keyfiyyətlərini qorumaqla yanaşı, həmçinin, çalışdığı təhsil, səhiyyə və digər spektrlərdə aktiv bir nümunə olmağı da bacarır. Bu isə zərif cinsin nümayəndələrinin dövlət idarəçilik sistemində, ictimai-siyasi proseslərdə yaxından iştirakına böyük təkan vermiş olur. Məhz bu səbəbdən də təhsil, səhiyyə, mədəniyyət sahələrində qadınlarımızın böyük çoxluq təşkil etməsini də görmək mümkündür. Azərbaycanın birinci xanımı, Heydər Əliyev Fondunun prezidenti, YUNESKO və İSESKO-nun xoşməramlı səfiri Mehriban xanım Əliyevanın timsalında qadınlarımızın nə dərəcədə böyük işlər görməyə qadir olduğunu da hər kəs görmüşdür. Bundan əlavə, ölkə siyasətinin və həyata keçirilən genişmiqyaslı uğurlu siyasətin tərkib hissəsində qadınlara da böyük önəmin verilməsi təqdirəlayiq hal kimi qiymətləndirilir. Əsası Ulu Öndərimiz Heydər Əliyev tərəfindən milli inkişaf strategiyamızın, eyni zamanda, müxtəlif spektrləri əhatə edən siyasətin tərkib hissəsində qadın faktoruna da böyük önəm verilmişdir. Ümummilli Lider Heydər Əliyev siyasətinin ən layiqli davamçısı olan möhtərəm cənab Prezidentimiz İlham Əliyev də həyata keçirdiyi uğurlu daxili və xarici siyasətin əsas parametrlərində qadınların təmsilçiliyinə xüsusi önəm verir. Eyni zamanda, seçkili orqanlarda qadınlarımızın say tərkibinin xeyli dərəcədə artması, parlament və bələdiyyə sistemində zərif cinsin nümayəndələrinə ayrıca yer verilməsi dövlətimizin gender bərabərliyinə nə dərəcədə xüsusi diqqət yetirdiyinin bariz nümunəsi kimi qiymətləndirilir. Ona görə də, həyata keçirilən bu cür böyük işlər Azərbaycan qadınlarında böyük stimul yaratmaqla yanaşı, onların ictimai-siyasi proseslərdə, mədəni-kütləvi tədbirlərdə də fəallığına əhəmiyyətli dərəcədə öz təsirini göstərmiş olur.
“Azərbaycan qadınları ən yüksək dəyərlərə
malikdir"
İradə Əliyeva:
- Azərbaycan qadını çox güclü və qüvvətlidir. Tarix boyu da mərd və cəsur Azərbaycan qadını igidlərimizlə yanaşı, böyük qəhrəmanlıq səlnamələri yaratmışlar. Onların göstərmiş olduğu şücaətlər, ailələrinin, həyat yoldaşlarının, özlərinin mənəvi keyfiyyətlərini qorumaq üçün nə dərəcədə çətin əzablara qatlaşmağı bacarması Azərbaycan qadınının özünün milli kimliyini də isbat etmişdir. Təkcə Dağlıq Qarabağ münaqişəsi tarixində ermənilər tərəfindən başımıza gətirilən müsibətlərdə qadınlarımız böyük iztirablar çəkmiş, öz övladlarını itirmiş, ailə başçılarını şəhid vermişlər. Bu günlərdə 19-cu ildönümünü qeyd etdiyimiz əsrin faciəsi olan Xocalı soyqırımında da Azərbaycan qadınına ağır zərbələr dəymişdir. Amma bütün bunlara baxmayaraq, özünün milli-mənəvi keyfiyyətlərini daima hər şeydən uca tutan ailə dəyərlərinin toxunulmazlığına heç bir halda razı olmayan cəsur qadınlarımız öz canlarına belə qıymağı bacarmışlar. Bütün bunlar isə qadınlarımızın nə dərəcədə yüksək dəyərlərə malik olduğunu sübut edir.
Aynənsə Paşayeva:
- Bizim təmsil olunduğumuz komitənin, geridə buraxdığımız 5 ildə gördüyü işlər dövlətimizin böyük dəstəyi diqqət və qayğısı sayəsində mümkün olmuşdur. Qadınlarla iş sahəsində və gender bərabərliyinin təmin olunmasında uğurlu işlər və mükəmməl nəticələr əldə olunmuşdur. Bu gün qadınlarımızın müxtəlif dövlət strukturlarında çalışması zərif cinsin nümayəndələrinə göstərilən diqqət və qayğının, böyük etimadın bariz nümunəsi kimi qiymətləndirilir. Amma bütün bunlara baxmayaraq, qadınlarımız ölkəmizin bütün strukturlarında, ictimai-siyasi proseslərdə, mədəni-kütləvi tədbirlərdə daha aktiv, fəal iştirak etməklə geniş imkanlar əldə etməyi düşünürlər.
“Azərbaycan qadını haqqında ən gözəl fikir formalaşıb"
Sevil Yusifova:
- Bu gün örnək ola biləcək qadınların həyatı, fikirləri mətbuatımızda daha çox önə çəkilməlidir. Azərbaycan Milli Elmlər Akademiyasında və digər ali təhsil müəssisələrində kifayət qədər savadlı, intellektli qadınlarımıza rast gəlmək mümkündür ki, bu gün onların fəaliyyəti də cəmiyyətimizüçün örnək göstərilə bilər. Bir faktı da qeyd edim ki, bu yaxınlarda Xocalı soyqırımı ilə bağlı beynəlxalq bir tədbirdə iştirak edərkən, oradakı xarici dövlət təmsilçilərinin böyük əksəriyyəti Azərbaycanın birinci xanımı Mehriban xanım Əliyevanın gördüyü böyük işləri sadalayırdılar. 48 ölkənin nümayəndəsinin qatıldığı bu tədbirdə Azərbaycan qadınının nəyə qadir olduğu və bütün dünya üçün örnək ola biləcək nümunə nümayiş etdirdiyi daha açıq şəkildə vurğulandı. Ona görə də tam əminliklə demək olar ki, Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyeva öz fəaliyyəti ilə Azərbaycan qadını haqqıda ən gözəl fikri formalaşdırıb. İstər Onun gördüyü mərhəmətli işlərlə bağlı, istərsə də mədəniyyətimizin, milli tarixi ənənələrimizin təbliği ilə bağlı görmüş olduğu böyük işlər biz qadınlara daha həvəslə çalışmağa bir stimul vermiş olur. Digər bir tərəfdən isə, artıq dünyanın nüfuzlu qadın təşkilatları və xarici ölkələrin qadın təmsilçiləri Azərbaycan qadını haqqında bilgi əldə etmək üçün hörmətli millət vəkilimiz Mehriban xanım Əliyevanın fəaliyyətinə nəzər salaraq, qadınlarımız haqqında müfəssəl fikir formalaşdırırlar.
“Azərbaycan qadını bütün hallarda ən yüksək intellektə və milli mənəvi
keyfiyyətlərə malik olduğunu isbatlayıb"
Təranə İsmayılova:
- Azərbaycan qadınları ziyalı olduğu qədər ölkənin ictimai-siyasi həyatında baş verən proseslərdə də yaxından iştirak edirlər. Təbii ki, Yeni Azərbaycan Partiyası da Azərbaycanın ən aparıcı siyasi partiyası olaraq öz sıralarında qadınların say tərkibinin daha da artmasına xüsusi önəm verir. Bu da partiyamızın fəaliyyətinin daha da çoxşaxəli olmasına öz töhfəsini vermiş olur. Bir sıra məktəblərə, səhiyyə müəssisələrinə rəhbərlik edən qadınlarımız ailənin bir xanımı olmaqla yanaşı, öz üzərlərinə düşən vəzifənin də öhdəsindən layiqincə gəlməyi bacarırlar. Bir faktı da diqqətinizə çatdırım ki, son bələdiyyə və parlament seçkilərində qadınların iştirak faizi əhəmiyyətli dərəcədə yüksəlmiş və onlar seçki orqanlarında yüksək təmsilçilik hüququ əldə etmişlər. Bütün bunlarla yanaşı, Azərbaycan qadını həmişə böyük istedadı və ziyalılığı ilə seçilib. Çünki Azərbaycan qadını bütün hallarda ən yüksək intellektə və milli-mənəvi keyfiyyətlərə malik olduğunu isbatlamış olur.
Pərvanə Kazımzadə:
- Qadınlarımızın yüksək dövlət strukturlarında yüksək təmsilçilik hüququ əldə etməsi Yeni Azərbaycan Partiyasının və ümumilikdə, ölkəmizdə qadınlara olan diqqət və qayğının bariz nümunəsidir. Eyni zamanda, bü gün sadə Azərbaycan qadını da sadaladığımız bütün yüksək mənəvi, əxlaqi keyfiyyətləri özündə əks etdirə bilir. Çünki qadınlarımız hər zaman öz ailəsinə, övladına, həyat yoldaşına sadiqliyi və onların daha da xoşbəxtliyi üçün əlindən gələni etməyi bacarırlar.
RƏFİQƏ KAMALQIZI,
TAPDIQ QURBANLI
Səs.- 2011.- 4 mart.- S. 8-9.