Yol infrastrukturunda yeni həyat, yeni nəfəs, yeni mədəniyyət...

İlham Əliyev: "Körpülərimiz, yol ötürücülərimiz nəqliyyat infrastrukturu olmaqla yanaşı, eyni zamanda, memarlıq nümunələridir"

Yol infrastrukturunun yeniləşdirilməsi, yol tikintisi, sərnişinlərin rahatlığı, nəqliyyat vasitələrinin təhlükəsiz hərəkəti üçün körpülərin, yeraltı keçidlərin istifadəyə verilməsi bu gün respublikamızda, ölkəmizdə geniş və əhatəli miqyasda aparılan yenilik, quruculuq-abadlıq işlərinin tərkib hissəsidir. Bu sahədə görülən davamlı işlərin beynəlxalq standartlara uyğun yüksək keyfiyyətlə icra olunduğunu xatırladaraq, qeyd etmək mümkündür ki, təqribən 10 il əvvəl ölkədə böyükmiqyaslı yol çəkilişlərini yalnız xarici şirkətlər gerçəkləşdirirdi. Yəni o dövrlər Azərbaycanın maliyyə imkanları o səviyyədə deyildi ki, yerli şirkətlər, yaxud da Nəqliyyat Nazirliyinin müvafiq bölmələri bu işləri öz hesabına görsünlər. Ələt-Qazıməmməd, Ələt-Salyan yolunun bir hissəsinin tikintisini məhz xarici şirkətlərin işi kimi göstərmək mümkündür. Həmin yolların tikinti-bərpa işlərini Türkiyə şirkətləri bağlanmış müqavilə əsasında əsaslı şəkildə yenidən qurdu.

Lakin bir neçə ildir ki, ölkəmizin enerji ehtiyatlarının dünya bazarlarına nəqlindən əldə olunmuş gəlirlər iri maliyyə tutumlu yol-nəqliyyat layihələrini icra etməyə imkan verməkdədir. Məhz bu amilin əsaslı və əməli nəticəsidir ki, son 3-4 il ərzində Bakı ilə yanaşı, paytaxtı regionlarla birləşdirən magistral avtomobil yollarının əksəriyyəti ən yüksək beynəlxalq standartlar səviyyəsində yenidən qurularaq istifadəyə verilmişdir. Buna misal kimi Bakı-Şamaxı, Bakı-Sumqayıt-Rusiya sərhədi, Bakı-Kürdəmir-Ucar-Yevlax-Gəncə-Qazax-Gürcüstan sərhədi yollarını və digər magistralları göstərmək mümkündür.

Son illər ərzində inşa olunmuş bu magistral yolların üstün cəhətlərindən biri asfalt salınmamışdan öncə, həmin yolların betonla bərkidilməsidir. Bununla bağlı ölkə Prezidenti İlham Əliyevin dediyi fikirləri bir daha xatırlatmaq yerinə düşər: "Beton yollar Avropanın ən inkişaf etmiş şəhərlərində tikilir. Ancaq biz nəinki aeroportdan şəhərə gələn yolu beton örtüyü ilə tikmişik, eyni zamanda, Bakı-Sumqayıt və Bakı-Rusiya sərhədinə qədər yolu belə tikirik. Bu yollar insanlara rahatlıq gətirəcək. Əsas məqsəd budur".

Cənab Prezidentin ifadəsi onu da təsdiq edir ki, O, yeni yolların müasir tələblərə uyğun olması ilə yanaşı, bu yollardan istifadə edən insanların rahatlığını da önəmli hadisə kimi dəyərləndirir.

Bakıda yeni nəqliyyat infrastrukturunun yaradılması, avtomobil tıxaclarının qarşısının alınması bu gün ölkə rəhbəri İlham Əliyevin daim diqqətdə saxladığı önəmli sosial məsələlərdən biridir. Həmin işlərlə əlaqədar görülmüş bir sıra təxirəsalınmaz işləri xatırladaq. Şəhərin mərkəzindən Heydər Əliyev adına Beynəlxalq Aeroporta gedən yolun bir müddət əvvəl hansı vəziyyətdə olduğu, yəqin ki, unudulmayıb. Eyni zamanda, metronun Əzizbəyov stansiyası qarşısındakı, Sabunçu, "Komsomol dairəsi" və Suraxanı dairələrində avtomobillər yarım saatdan çox, hətta günün sıx zamanları bir saat tıxacda qalırdı. Artıq iki ildir ki, yuxarıda adları çəkilən həmin dairələr yoxdur. Bu dairələrin əvəzində yeni, müasir körpülər tikilib, Zığ qəsəbəsi istiqamətindən aeroporta beynəlxalq standartlı bond yol çəkilib. Hazırda bu yolun davamı olaraq, Mərdəkan və Bilgəh istiqamətlərində yeni yolötürücü qurğular inşa olunur.

Şəhər daxilində nəqliyyatın fasiləsiz hərəkətini təmin etmək üçün, ölkə başçısının tapşırığı ilə piyadalar üçün yeraltı keçidlər tikilməsi, körpülər inşa olunması əhali tərəfindən sevinc və rəğbətlə qarşılanır. Ötən ilin sonları, 2010 -cu il dekabrın 29-da paytaxtın bir neçə yerində müasir yeraltı keçidlər istifadəyə verildi. Həmin keçidlərin istifadəyə verilməsi mərasimlərində Prezident İlham Əliyev çıxış edərək, bildirdi ki, şəhər nəqliyyatının tənzimlənməsi bu gün qarşıda duran əsas vəzifələrdəndir. Dairəvi yol, demək olar ki, hazırdır. Bu yol paytaxt üçün əvəzolunmaz bir qovşaq olacaq. Avtomobillər şəhərə girmədən həmin yolla hərəkət edəcəkdir.

Dövlət başçısının qeyd etdiyi kimi, yeni yol infrastrukturunun yaradılması, yolların beynəlxalq standartlara uyğun şəkildə qurulması, eyni zamanda, sırf sosial xarakter daşıyır. Bu isə, o deməkdir ki, yeni iş yerləri açılır, bölgələrdə canlanma yaranır, yeni müəssisələr işə salınır.

Habelə, şəhər nəqliyyatının davamlı inkişafı üçün, son illər nəhəng işlər görüldüyü göz qabağındadır. Bakıda şəhəriçi hesab edilən və təqribən 200 kilometri əhatə edən yeni yollar salınmış, mövcud yollar əsaslı şəkildə yenidən qurulmuşdur. 20-yə yaxın yol ötürücüsü, 32 piyada keçidi və bir neçə nəhəng körpü tikilib istifadəyə verilmişdir. Nəqliyyatın inkişafı və müasir tələblərə cavab verməsi üçün ölkəmizə 2 min 500-ə qədər sərnişin avtobusu gətirilmişdir. Bakıda ən müasir standartlara cavab verən nəqliyyatın intellektual idarə edilməsi mərkəzi yaradılır.

Prezident İlham Əliyev paytaxtda və ölkənin digər şəhərlərində nəqliyyatın tənzimlənməsi üçün görülmüş işləri yüksək qiymətləndirərək, qeyd edir ki, körpülərimiz, yol ötürücülərimiz nəqliyyat infrastrukturu olmaqla yanaşı, eyni zamanda, memarlıq nümunələridir: "Bunlar görünüşü, dizaynı, gözəlliyi və müasirliyi ilə paytaxtımıza yaraşıq verir".

Bir sözlə, görülən bütün bu genişmiqyaslı, nəhəng işlər Prezident İlham Əliyevin təşəbbüsü, rəhbərliyi, diqqət və qayğısı ilə həyata keçirilir, reallaşdırılır. Azərbaycanda ilk beton yolun tikilməsinin təşəbbüskarı da məhz Dövlət başçısı İlham Əliyevdir. O, Azərbaycan iqtisadiyyatına çox böyük, əvəzsiz töhfələr verməklə yanaşı, müasirləşən, yeniləşən yol infrastrukturuna da yeni həyat, yeni nəfəs, yeni mədəniyyət gətirib.

RÖVŞƏN RƏSULOV

Səs.- 2011.- 8 mart.- S. 3.