"Cənnət anaların ayaqları altındadır"

YAP Nərimanov rayon təşkilatının təşkilatçılığı ilə 8 Mart Beynəlxalq Qadınlar Günü münasibəti ilə tədbir keçirilib

Dünən YAP Nərimanov rayon təşkilatının təşkilatçılığı ilə təşkilatın qərargahında 8 Mart Beynəlxalq Qadınlar Günü münasibətilə tədbir keçirilib. Tədbirdə rayonun ictimai-siyasi həyatında fəal iştirak edən dövlət, elm və təhsil, səhiyyə, mədəniyyət və digər sahələrdə çalışan, həmçinin, bir çox ictimai təşkilat və birliklərə rəhbərlik edən qadınlar iştirak edib. Görüşdə çıxış edən YAP Nərimanov rayon təşkilatının sədri Təhmiraz Tağıyev qarşıdan gələn 8 Mart Beynəlxalq Qadınlar Günü münasibətilə bütün Azərbaycan qadınlarını - analarımızı, bacılarımızı, ömür-gün yoldaşlarımızı, dostlarımızı və qızlarımızı səmimi-qəlbdən təbrik etdi, onlara cansağlığı və səadət arzulayıb.

T.Tağıyev demişdir: "Məhəmməd peyğəmbər demişdir: "Cənnət anaların ayaqları altındadır. Bütün tarix boyu Azərbaycan qadını şərəfli ana adını daşımaqdan əlavə, qəhrəmanlıq göstərmiş, qəhrəman adını şərəflə yaşamışdır. 8 Mart Beynəlxalq Qadınlar Günü qadınların mübarizə hərəkatı ilə yaransa da, bu gün inkişaf etmiş ölkələrdə qadınlar bayramı keçirilir. Azərbaycanda ənənəsi olan bu bayram böyük sevinc və fərəh hissi ilə keçirilir. Təkcə qadınlar deyil, elə kişilər də bu bayramın xoş ruhunu hiss edir, duyur. Qadın, birinci növbədə, ana olduğu üçün, tərbiyəçi, zəhmətkeş, eyni zamanda, həyat yoldaşına arxa, dayaq, qızlarımız valideynlərinə övlad, qardaşlarına bacı olduğu üçün diqqətə və qayğıya layiqdirlər. Bu bayramda oğlanlar, kişilər öz bacılarını, analarını və qadınlarını təbrik edirlər".

T.Tağıyev onu da vurğulayıb ki, bu bayram dünya miqyasında geniş surətdə qeyd edilir: "Bu sahədə dövlət siyasəti prinsiplərinin bünövrəsi Ümummilli Liderimiz Heydər Əliyev tərəfindən qoyulmuş və prioritet istiqamətləri dəqiqləşdirilmişdir. Çox sevindirici haldır ki, Azərbaycanın birinci xanımı, Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyeva da ailə, qadın və uşaq məsələlərinə böyük diqqət göstərir. Milli dəyərləri və müasir meyilləri özündə birləşdirən ailə modelinin yorulmaz təbliğatçısı olan Mehriban xanımın bu sahədə fəaliyyəti bütün dövlət strukturları və cəmiyyət üçün örnəkdir".

YAP Nərimanov rayon təşkilatının sədri tədbirdə gənc və sevilən müğənni Sevda Yahyayeva partiyaya qəbul olunmaq üçün ərizə verib: "YAP ətrafında birləşən, iqtisadiyyatımızın inkişafında, cəmiyyətin müxtəlif təbəqələrində özlərini təsdiqləmiş, sayı 200 mindən artıq olan gənclərimiz tək respublika daxilində deyil, ölkədən kənarda da Azərbaycanı layiqincə tanıtmışlar. Sıralarımızda belələri çoxdur. Belə gənclərdən biri də gənc və sevimli müğənnimiz Sevda Yahyayevadır. Bu gün bu əziz bayram ərəfəsi YAP-ın üzvlük vəsiqəsini ona təqdim edirik".

YAP-ın üzvü olmaqdan şərəf duyduğunu, bu adı Ulu Öndər Heydər Əliyev ideyalarına, ölkə Prezidenti, Yeni Azərbaycan Partiyasının Sədri İlham Əliyev siyasətinə sadiq qalmaqla doğruldacağını bildirən Sevda Yahyayeva hər zaman Azərbaycanın adını uca tutacağını bildirib.

RƏFİQƏ KAMALQIZI

Səs.- 2011.- 8 mart.- S. 5.