Kitabxanaların elmi-texniki bazası gücləndirilir
Azərbaycan Milli Elmlər Akademiyası Naxçıvan Bölməsində fəaliyyət göstərən kitabxana oxucularına yüksək informasiya xidməti göstərir. Xidmət üçün hər cür şəraitə malik olan və elmi-texniki bazası günü-gündən gücləndirilən kitabxana bu gün müxtəlif elmi müəssisələrdə çalışan alim, elmi işçi, universitet müəllim və tələbələri, xalq təsərrüfatının müxtəlif sahələrində çalışan mütəxəssislərə xidmət göstərir.
Azərbaycan Milli Elmlər Akademiyasından verilən məlumata görə, kitabxana 1972-ci ildə Azərbaycan SSR Elmlər Akademiyasının Mərkəzi-Elmi kitabxanasının filalı kimi Naxçıvan Elm Mərkəzinin nəzdində ilk dəfə fəaliyyətə başlamış, daha sonra Ümummilli Lider Heydər Əliyevin 2002-ci il avqust tarixli Sərəncamı ilə yaradılan AMEA Naxçıvan Bölməsinin tərkibində fəaliyyətini davam etdirmişdir. Elmi kitabxanada iki kitab fondu, referativ jurnal fondu, dövrü mətbuat fondu və zalı, kataloqlaşdırma, biblioqrafiya şöbələri, müvəqqəti mühafizə və kitab mübadiləsi fondları fəaliyyət göstərir. Kitab fondları universal xarakterli olub elmi-texniki, ictimai-siyasi, ədəbi-bədii ədəbiyyatlarla komplektləşdirilmişdir.
Qeyd edək ki, fondları əks etdirən 52798 ədəd çap məhsulları kataloq-kartoteka sistemi vasitəsilə oxucuların xidmətindədir. Fəaliyyəti dövründə elmi kitabxanaya 32108 nüsxə Azərbaycan və rus dillərində kitab daxil olmuşdur. Daxil olan kitabların 9030-u Azərbaycan Respublikası Prezidenti cənab İlham Əliyevin Sərəncamı əsasında latın qrafikası ilə çap olunmuşdur. Elmi kitabxanada xarici ədəbiyyat şöbəsi də fəaliyyət göstərir ki, burada Qərbi Avropa və Şərq dillərində ədəbiyyatlar sistemləşdirilmişdir. Bu gün kitabxanada ümumi həcmi 3209 nüsxə təşkil edən ingilis, türk, ərəb və fars dillərində kitab və jurnallar oxucuların xidmətindədir. Ümumi jurnal fondu isə cəmi 17645 nüsxədir.
Elmi kitabxanada informasiya təminatı məqsədilə müxtəlif mövzu kartotekaları, ümumi kartoteka, bibloqrafik kartotekalar, diyarşünaslıq kartotekası və digər kartotekalar təşkil olunmuşdur. Bu kartotekalar qəzet və jurnal materiallarını, kitabları əhatə edir.
Elmi kitabxananın oxucuları həm də vaxtaşırı olaraq fondlara daxil olan yeni
ədəbiyyatlarla tanış
edilir. Bunun üçün burada yeni ədəbiyyat sərgiləri təşkil
olunur və yeni ədəbiyyatların
siyahısı hazırlanır.
Həmçinin kitabxanada
yubiley, tarixi, əlamətdar günlərə
və müxtəlif mövzulara aid kitab sərgiləri də təşkil edilir. Artıq 2011-ci ildə "Qanlı 20 Yanvar", "Naxçıvan
Muxtar Respublikası-87", "Xocalı-əsrin faciəsi"
mövzusunda kitab sərgiləri təşkil
olunmuşdur. Bu məqsədlə
176 ədəd kitab, jurnal və qəzet materiallarından istifadə edilmişdir.
Kitabxanada respublikamızda
müdafiə olunmuş bütün namizədlik və
doktorluq dissertasiyalarının avtoreferatlarının, həmçinin
də, dissertasiyaların özlərinin sistemli kataloqu təşkil
olunmuşdur. Avtoreferatların sayı artıq 3013 nüsxə,
dissertasiyalar isə 32 nüsxə təşkil edir. Elmi
kitabxanada 2005-ci ildən kitabların elektron
kataloqlaşdırılması işləri aparılır. Hazırda 10230 nüsxə
kitablar kataloqlaşdırılmışdır.
Zümrüd
Səs.- 2011.- 8 mart.- S. 12.