Azərbaycan gəncliyi müxalifətin təxribatçı çağırışlarını birmənalı şəkildə rədd edir

Əli Əhmədov: "Mən bütün Azərbaycan gənclərinə üzümü tutub deyirəm ki, siz ermənilərin dəstəklədikləri şüarları irəli sürən gənclərlə bir ola bilməzsiniz"

Dünən Yeni Azərbaycan Partiyasının Nərimanov rayon təşkilatının qərargahında YAP Sədrinin müavini, İcra katibi, millət vəkili Əli Əhmədov partiyanın Gənclər Birliyinin fəalları ilə görüşüb. Öncə qarşıdan gələn Novruz bayramı münasibətilə gəncləri təbrik edən Əli Əhmədov onlara gələcək fəaliyyətlərində uğurlar arzulayıb.

Ə.Əhmədo çıxışı zamanı bildirib ki, hazırda Azərbaycan gəncliyinə böyük diqqət yetirilir. Ölkəmizdə gənclər siyasətinin Ümummilli lider Heydər Əliyev tərəfindən müəyyənləşdirildiyini deyən YAP Sədrinin müavini onu da söyləyib ki, hazırda bu siyasət Prezident İlham Əliyev tərəfindən uğurla davam etdirilir: "Azərbaycan hökuməti gəncliyin inkişafı ilə bağlı vacib tədbirlər həyata keçirir, gənclərin yüksək təhsil alması, öz bilik və bacarıqlarını, potensiallarını nümayiş etdirmək üçün müvafiq addımlar atır. Bildiyiniz kimi, hökumətimiz tərəfindən gənclərimizin dünyanın ən nüfuzlu ali məktəblərində təhsil almaları ilə bağlı Dövlət Proqramı həyata keçirilir. Hesab edirəm ki, həmin gənclər təhsillərini uğurla başa vuraraq, dövlətimizin inkişafı istiqamətində öz töhfələrini verəcəklər. Bu gün Azərbaycan sürətlə inkişaf edir, bütün sahələr üzrə böyük uğurlar qazanır. Gənclər bizim gələcəyimizdir və ölkəmizin sabahı onlarla bağlıdır".

Ə.Əhmədov qeyd edib ki, bu gün Azərbaycan gəncliyi ölkə Prezidenti İlham Əliyevin həyata keçirdiyi uğurlu siyasət, eləcə də, dövlətin xüsusi diqqət və qayğısı sayəsində sürətlə inkişaf edir. Məhz bunun nəticəsidir ki, bu gün gənclərimiz Azərbaycan Prezidenti İlham Əliyevin ətrafında sıx birləşərək, onlara göstərilən etimadı yüksək səviyyədə doğrultmağa çalışır və bu istiqamətdə səylərini davam etdirirlər.

YAP Sədrinin müavini Ə.Əhmədov, həmçinin, vurğulayıb ki, gənclər yüksək təhsil almaq, müxtəlif faydalı işlərlə məşğul olmaqla yanaşı, ölkəmizin ictimai-siyasi həyatında da fəal iştirak etməlidir: "Ölkəmizin ən güclü siyasi qüvvəsi olan YAP bu amilə böyük önəm verir. Son 20 ildə ölkə əhalisinin sayı 2 milyon nəfər artıb və yaş tərkibi baxımından gənclərin sayı xüsusi çəkiyə malikdir. 1990-cı illərin əvvəlində Azərbaycanda əhalinin sayı 7 milyon idisə, indi bu göstərici 9 milyonu ötüb. Demoqrafik göstəricilər baxımından gənclərin mövqeyi yüksəkdir. Təbii ki, insan amili hər bir cəmiyyətin başlıca potensialıdır, hər bir millətin sərvətidir, dəyəridir. Azərbaycan gəncliyi yaxşı təhsil almış, müasir texnologiyaya yiyələnən, istedadlı gənclikdir. Bu isə etibarlı gələcək deməkdir. Ancaq bununla yanaşı, biz istəyirik ki, belə gənclər ölkənin ictimai-siyasi həyatında da fəal olsunlar. Hazırda YAP üzvlərinin sayı 530 minə çatıb ki, onların da 40 faizini məhz gənclər təşkil edir. Ölkə Prezidenti İlham Əliyev hər zaman gənclərə böyük önəm verir, dövlət başçısının təşəbbüsü ilə ölkədə həyata keçirilən gənclər siyasəti uğurla davam etdirilir. Azərbaycanın ən fəal gəncləri isə məhz YAP-ın sıralarındadır. Son vaxtlar YAP Gənclər Birliyinin fəaliyyəti xeyli genişlənib. Ölkənin ictimai-siyasi həyatında partiyanın gəncləri fəal iştirak edirlər. Beləliklə, onlar ölkə Prezidentinin həyata keçirdiyi siyasətə dəstək olurlar".

YAP Sədrinin müavini Ə.Əhmədovun sözlərinə görə, dünya dəyişir, inkişaf edir, yeni texnologiyalar yaranır: "Bu gün nəinki Azərbaycan, bütün dünya gənclərinin maraq göstərdiyi sosial şəbəkələr formalaşıb. Ölkəmizin bütün gəncləri kimi, YAP-ı təmsil edən gənclər də bu sosial şəbəkələrdə fəal iştirak edirlər, müzakirələrə qatılırlar. Bununla gənclərin cəmiyyətə inteqrasiyası sürətlənir, ictimai fikrə təsir imkanları artır. Nəticədə gənclərlə işin yeni məqamları meydana çıxır. Bütövlükdə, hesab edirik ki, ölkə gənclərinin fəal bir hissəsi olan YAP-ın gəncləri respublikanın ictimai-siyasi həyatında yaxından iştirak edir və bundan sonra da edəcəklər."

YAP-ın İcra katibi son vaxtlar müxalifət partiyalarının nəzarətində olan və xüsusilə də, ölkədən kənardakı qruplarla əlaqəsi olan bir qrup gəncin sosial şəbəkələrdən istifadə edərək, müəyyən çağırışlar etdiyini, təxribatçı ideyalar ortaya atdığını bildirdi: "Birmənalı şəkildə bildirmək istəyirəm ki, Azərbaycan gəncləri bu ideyaları dəstəkləmirlər. Belə çağırışlara səs verənlərin sırasında ermənilər var. Azərbaycanın torpaqlarını işğal etmiş ermənilər tərəfindən dəstəklənən bir ideyanın ölkəmizin əleyhinə olduğunu sübut etməyə heç bir ehtiyac yoxdur. Mən təklif edərdim ki, bu gənclər Azərbaycanın torpaqlarının işğaldan azad edilməsi ilə bağlı çağırışlar versinlər. Mən bütün Azərbaycan gənclərinə üzümü tutub deyirəm ki, siz ermənilərin dəstəklədikləri şüarları irəli sürən gənclərlə bir ola bilməzsiniz".

Tədbirdə YAP Gənclər Birliyinin sədri Seymur Orucov, fəal gənclərdən Əmir Hacılı, Aytən Əliyeva, Nicat Nəbiyev, Sahil Hacıyev və Lamiyə Cəfərova çıxış etdilər.

RƏFİQƏ KAMALQIZI

Səs.- 2011.- 10 mart.- S. 4.