Bakı Slavyan Universitetinin jurnalistika fakültəsində təhsil alan tələbələrlə görüş keçirilib

Dünən Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) təşəbbüsü ilə Bakı Slavyan Universitetinin jurnalistika fakültəsində təhsil alan tələbələrlə ölkənin aparıcı media və informasiya qurumlarının rəhbərləri arasında görüş keçirilib. Tədbirdə KİVDF-nin icraçı direktoru Vüqar Səfərli, Bakı Slavyan Universitetin (BSU) rektoru, professor Kamal Abdulla, Mətbuat Şurasının sədri Əflatun Amaşov, "Səs" qəzetinin baş redaktoru və SİA-nın baş direktoru Bəhruz Quliyev, "Yeni Azərbaycan" qəzetinin baş redaktoru Hikmət Babaoğlu, "İki sahil" qəzetinin baş redaktoru Vüqar Rəhimzadə eləcə də 20-dən artıq digər mətbu orqanların rəhbərləri iştirak edib.

Tədbiri giriş sözü ilə açan BSU-nun rektoru, professor Kamal Abdulla qonaqları və tədbir iştirakçılarını salamlayaraq bildirdi ki, bu görüş tələbələr üçün böyük əhəmiyyətə malikdir: “Tədbirin əsas məqsədi jurnalistika fakültəsində təhsil alan istedadlı tələbələrə qəzet redaksiyalarında təcrübə keçmək və gələcəkdə işlə təmin olunmaları üçün şərait yaratmaqdır".

KİVDF-nin icraçı direktoru Vüqar Səfərli çıxışında qeyd etdi ki, belə görüşlərin təşkil olunmasında məqsəd bu sahədə çalışanlara, jurnalistika peşəsini sevənlərə dəstək verməkdir: "BSU-nun jurnalistika fakultəsinin sonuncu kursunda təhsil alan tələbələr 5 ay müddətində müxtəlif qəzetlərdə təcrübə keçəcək və hər ay 100 manat məbləğində əmək haqqı alacaqlar. 5 aydan sonra onlar özlərini doğrultsalar və ya işləri ilə redaksiya rəhbərliyini qane etsələr, həmin yerdə işə qəbul olunacaqlar. Hər il jurnalistikada oxuyan tələbələr müxtəlif redaksiyalarda təcrübə keçir, amma onların təcrübəsi bizləri qane etmir. Onlar təcrübə müddətində işləmək əvəzinə, sanki sonda kağıza qol çəkilməsini gözləyirlər. Bizim isə istəyimiz ondan ibarətdir ki, istedadlı tələbələr, həqiqətən, jurnalist olmaq istəyənlərin hamısı işlə təmin edilsin. Qeyd edim ki, fevralın 23-də analoji tədbir Bakı Dövlət Universitetində keçirilib və artıq BDU-nun jurnalistika fakültəsinin 22 tələbəsi qəzet redaksiyalarında işə başlayıblar".

Azərbaycan Mətbuat Şurasının sədri Əflatun Amaşov çıxışında bu məsələlərə optimist yanaşdığını bildirib. Onun fikrincə, bu görüşlər KİVDF-nin həyata keçirdiyi ən mühüm və vacib layihələrdəndir: "Bu layihədən sonra jurnalistika fakültəsini bitirən 5-10 tələbə müxtəlif redaksiyalarda işləyəcəksə, bu, artıq mətbuatımızın uğuru kimi qəbul oluna bilər. Hazırda jurnalist işləmək istəyən tələbələrin çoxu televiziyaya üstünlük verirlər. Ancaq unutmaq lazım deyil ki, televiziya jurnalistikası öz spesifik xüsusiyyətlərinə görə, yazılı mətbuatdan fərqlənir". Ə.Amaşov tələbələrə məsləhət gördü ki, iş yerlərini seçərkən, qəzetlərdən başlasınlar. Məhz bundan sonra böyük uğurlar qazanmaq olar:" Bir məsələni də qeyd edim ki, son zamanlar elektron jurnalistika yaranıb və bu da yeni bir sistemdir. Ancaq unutmayaq ki, qəzetlərin də onlayn sistemləri var və gənclər sosial şəbəkələrdə, bloklarda daha çox vaxt keçirməkdənsə, jurnalist olmaq istəyənlərsə, qəzetlərə daha çox yazılar versin və onlarla əməkdaşlıq etsinlər".

Tədbirin davamında çıxış edən "Ayna-Zerkalo" qəzetinin baş redaktoru Elçin Şıxlı da bu görüşün KİVDF-nin ən maraqlı layihələrindən biri olduğunu deyib. O bildirib ki, bir çox hallarda jurnalistika fakültəsində oxuyan, yüksək səviyyəyə və dünyagörüşünə malik olub və xarici dil bilən tələbələr sonradan jurnalist peşəsi ilə məşğul olmaq istəmirlər. "Bunun bir çox obyektiv və subyektiv səbəbləri var" deyən baş redaktor jurnalistika ixtisası üzrə universitetlərə qəbul sistemində də müəyyən çatışmazlıqların olduğunu deyib: "Bu gün jurnalistikaya qəbulda qabiliyyət imtahanlarının keçirilməsinə ehtiyac var. Jurnalistika həyat tərzidir. Əgər kimsə öz həyat tərzini jurnalistikada görürsə, ondan nəsə çıxacaq. Jurnalist hərtərəfli, yüksək məntiq, təfəkkürə və öz fikirlərini ifadə etmək bacarığına malik olmalıdır".

Sonra BSU-nun professoru Etibar Babayev universitetin jurnalistika fakültəsinin fəaliyyəti barədə məlumat verdi. Ardınca isə tələbələrin mətbuat orqanlarının rəhbərlərinə ünvanladıqları suallar cavablandırıldı.

Tələbənin sualını cavablandıran "Səs" qəzetinin baş redaktoru və "Səs" İnformasiya Agentliyinin baş direktoru Bəhruz Quliyev, ümumilikdə, Bakı Slavyan Universitetində tələblərin fəal olduğunu qeyd etdi. Bildirdi ki, bir neçə il ərzində bu universitetdən redaksiyaya təcrübə keçmək üçün praktikantlar gəlir və bu gün onlar arasında işləyənlər də var. Lakin ümumi olaraq nəzərə aldıqda, bu gün Azərbaycanda jurnalist buraxılışı aşağı səviyyədədir: "Təcrübəyə gələn jurnalistə "bu ixtisası nəyə görə seçdin" sualını verdikdə, "bu peşəni təsadüfən seçdim" deyir. Belə tələbələrə yenidən dərs keçə və jurnalistikanı sevdirə bilmərik. Əgər bu tələbə bəxtəbəxt bu sahəyə təsadüfən gəlibsə, onun üstündə əziyyət çəkməyə dəyməz. Gələcəkdə jurnalist işləmək istəyən, bu peşəyə marağı olan tələbələrin üzərində daha çox işləmək lazımdır. Qəzetlərin səviyyəsinin qaldırılması jurnalistlərin peşəkarlığından asılıdır. Jurnalistləri kəşf etmək və tapmaq üçün bu cür görüşlərdən istifadə etmək vacibdir".

Tələbələrin suallarını cavablandıran "Yeni Azərbaycan" qəzetinin baş redaktoru Hikmət Babaoğlu isə qeyd etdi ki, vətəndaş cəmiyyətinin əsas atributlarından biri vətəndaş-dövlət münasibətlərinin hüquq əsasında formalaşmasıdır: "Hər birimizin sosial statusu gün ərzində dəyişilir. Siz bu gün burada tələbə, burdan çıxdıqdan sonra isə ailənizin vətəndaşı olacaqsınız və sairə. Bütün vətəndaşlar hüquqi dövlətlə dövlət-vətəndaş münasibətlərində bərabər statusa malikdir. Ancaq bir də peşə məsələsi var. Azərbaycan jurnalist peşəsinin statusu cəmiyyətin sosial piramidasında kifayət qədər üst mərtəbələrdədir. Son dövrlərdə Azərbaycan dövlətinin, prezidentinin həyata keçirdiyi siyasət nəticəsində bu statusun peşə nüfuzu daha da artıb. Bu gün informasiya erasında hər bir jurnalistin əsas borcu vətəndaşlıq borcu olmalı və bütün məsələlərdə məhz vətəndaşlıq öhdəçiliyindən və milli maraqlarından çıxış etməlidir. Ona görə də nə peşənin daşıyıcısı olursunuzsa-olun, ilk növbədə, vətəndaş olmaq lazımdır".

Görüşdə tələbələri maraqlandıran digər suallar da media kapitanları tərəfindən cavablandırıldı.

R.RƏSULOV

Səs.- 2011.- 11 mart.- S. 10.