“Zəriflik"...

YAP Qadınlar Şurasının təşkilatçılığı ilə bayram ərəfəsində bu adda jurnalın ilk nömrəsinin təqdimatı keçirildi

Dünən "Ramada" otelində YAP Qadınlar Şurasının təşkilatçılığı ilə nəşr olunan "Zəriflik" jurnalının təqdimat mərasimi keçirildi. Təqdimat mərasimində Yeni Azərbaycan Partiyasının rəhbərliyi, millət vəkilləri, ziyalılar, respublika qadın ictimai birliklərinin nümayəndələri iştirak edib. Tədbirdə çıxış edən YAP Qadınlar Şurasının sədri, professor Nurlana Əliyeva ilk öncə xalqımızın ən əziz bayramı olan Novruz bayramı münasibəti ilə bütün qonaqları, eləcə də, Azərbaycan xalqını təbrik etdi.

N.Əliyeva bildirdi ki, milli bayram respublikamızın hər yerində yüksək səviyyədə qeyd olunur: "Novruz bayramının ölkəmizdə ənənəvi şəkildə qeyd edilməsi, bilavasitə, Ulu Öndər Heydər Əliyevin adı ilə bağlıdır. Bu gün Yeni Azərbaycan Partiyasının Sədri, ölkə Prezidenti İlham Əliyev bu ənənəni dünya miqyasında keçirilməsinə şərait yaradıb. Artıq bir çox xarici dövlətlərdə yaşayan həmvətənlərimiz, soydaşlarımız bu əziz bayramı öz evlərindəki kimi keçirirlər".

N.Əliyeva onu da bildirdi ki, təqdimatı keçirilən "Zəriflik" jurnalının ünvanı Azərbaycan anası, Azərbaycan qadınıdır: "Bu qadın tarixin ən çətin anlarında canından keçərək öz sözünü deyib, şərəfli yol keçərək, XXI əsrə qədəm qoyub. Üçüncü minillik isə qadının cəmiyyətdəki mövqeyini daha da gücləndirib. Bu qadın böyük qüvvə olduğunu bir daha diktə edib. Bu gün Azərbaycan qadın hərəkatındakı fəallaşma və canlanma hamımızı sevindirir. İndi cəmiyyətin bütün sahələrində aparıcı mövqeyə malik qadınlar öz bilik və bacarıqlarını dövlətimizin güclənməsinə, daha da çiçəklənməsinə və inkişaf etdirilməsinə sərf edirlər. Onların hərtərəfli fəaliyyəti üçün isə ölkəmizdə mühüm şərait mövcuddur. Bunun üçün biz ən əvvəl Azərbaycanda qadın dövlət siyasətinin əsasını qoyan Ulu Öndər Heydər Əliyevə borcluyuq. Bu gün isə Azərbaycan qadınının cəmiyyətdə yeri, nüfuzu, ona münasibət çox ucadır. Buna görə Ümummilli Liderimiz Heydər Əliyevin dövlət, qadın siyasətini qətiyyətlə davam etdirən Prezident İlham Əliyevə minnətdarıq."

Əli Əhmədov: "Zəriflik qadının boynuna biçilib"

Təqdimat mərasimində çıxış edən YAP İcra katibi, millət vəkili Əli Əhmədov qonaqları, həmçinin, bütün Azərbaycan xalqını Novruz bayramı münasibəti ilə təbrik etdi. Bildirdi ki, bu gün bayramlar ərəfəsindəyik və bir-birinin ardınca bayram keçiririk: "Novruz bayramı, bunun ardınca müstəqilliyimizin 20 illiyi və "Zəriflik" jurnalının cəmiyyətə təqdim olunması. Doğrudur, Azərbaycan mətbuat tarixi böyük ənənələrə malikdir. Bu ənənələr illərin, zamanın sınağından keçərək, özünü təsdiq etmiş və dünya mətbuatının tərkib hissələrindən birinə çevrilmişdir. Təbii ki, söz sənətimiz rəngarəng, çoxşaxəli olduğu kimi, bu sözə könül verənlər də müxtəlif cinslərin, müxtəlif zümrələrin nümayəndələridir."

Yeni Azərbaycan Partiyasının İcra katibi Ə.Əhmədov qadın hərəkatında fəallaşmanın yüksək olduğunu vurğuladı: "Ölkə əhalisində qadınlara olan münasibət mətbuat aləminə təqdim olunan "Zəriflik" jurnalının adına uyğun seçilib. Bu adın özü qeyd etməyə imkan verir ki, Şərq qadını, Azərbaycan qadını həmişə zərif, həmişə ülvi olub. Xatırlatmaq yerinə düşər ki, müstəqil Azərbaycanın azad söz meydanı xalqına və dövlətçiliyinə xidmət edən hər kəsin üzünə açıqdır."

Həmçinin, tədbirdə Heydər Əliyev Fondunun prezidenti, YUNESKO və İSESKO-nun xoşməramlı səfiri Mehriban xanım Əliyevanın hərtərəfli və geniş əhatəli fəaliyyəti xüsusi vurğulandı. Qeyd edək ki, jurnalda Azərbaycanın birinci xanımı Mehriban xanım Əliyevanın "Xeyirxah əməllərin davamçısı" adlı məqaləsi dərc olunub. Bu məqalədə Mehriban xanım Əliyeva insanlığa əsas münasibət örnəyi, qadın hüquqlarının müdafiəçisi, millətinə, xalqına sədaqət nümunəsi kimi səciyyələndirilir.

Tədbirin sonunda Azərbaycan Dövlət Pedaqoji Universititenin tələbələrinin rəqsləri və muğam müsabiqəsi qaliblərinin ifaları dinlənildi.

Rəfiqə KAMALQIZI

Səs.- 2011.- 17 mart.- S. 4.