"Torpağın oyanışı"

Nəsimi rayon icra hakimiyyətinin təşkilatçılığı ilə aztəminatlı ailələr üçün Novruz bayramı keçirildi

Novruz bayramı ilə əlaqədar respublikamızda və ölkəmizin hüdudlarından kənarda silsilə tədbirlər keçirilir. Nəsimi rayon icra hakimiyyətinin Novruz bayramı ilə bağlı silsilə tədbirlər planı hazırlanmışdır. Belə tədbirlərdən biri də dünən rayonun Səməd Vurğun küçəsi ilə Vaqif prospektinin kəsişməsində yerləşən parkda keçirilib. "Torpağın oyanışı" mövzusunda keçirilən tədbirdə çıxış edən Nəsimi rayon icra hakimiyyətinin başçısı Nəsib Məhəməliyev bütün ictimaiyyəti xalqımızın əziz bayramı - Novruz bayramı münasibəti ilə təbrik etdi.

N.Məhəməliyev bildirdi ki, 2009-cu ildən Novruz bayramı YUNESKO tərəfindən qeyri-maddi, mədəni irs siyahısına daxil edilib. Həmçinin, BMT Baş Assambleyasının builki sessiyasının iclasında mart ayının 21-i "Beynəlxalq Novruz Günü" elan edilib. "Hər bir xalqın milli-mənəvi dəyərlərini şərtləndirən dil, din və adət-ənənə onun mənəvi aləminin formalaşmasına həlledici təsir göstərən amillərdəndir. Hər hansı bir ölkədə xalqın milli-mənəvi dəyərlərinin qorunması və mədəniyyətinin inkişaf etdirilməsi vətəndaşların milli birliyinin təmin olunmasına xidmət edir. Hər xalqın öz adət-ənənəsi var, öz milli-mənəvi və dini dəyərləri var. Biz öz milli-mənəvi dəyərlərimizlə, öz dini dəyərlərimizlə, adət-ənənələrimizlə fəxr edirik" fikrini söləyən Ümummilli Liderimiz Heydər Əliyev Azərbaycana rəhbərlik etdiyi dövrlərdə həmişə xalqımızın milli-mənəvi dəyərlərinin qorunmasına, milli mədəniyyətimizin inkişafına, xalqın adət-ənənələrinin zənginləşdirilməsinə çalışmışdır".

N.Məhəməliyev onu da vurğuladı ki, eyni zamanda, Ulu Öndər gənclərimizi xalqımızın milli-mənəvi dəyərləri, milli əxlaq prinsipləri əsasında tərbiyə etməyi tövsiyə edirdi. Bu baxımdan, Ulu Öndər gənclərimizin milli-mənəvi dəyərlər əsasında tərbiyələndirilməsindən bəhs edərək demişdir: "Biz öz milli-mənəvi dəyərlərimizi, adət-ənənələrimizi, əxlaqi dəyərlərimizi bütün istiqamətlərdə qorumalıyıq, saxlamalıyıq və gənc nəsli əsrlər boyu böyük sınaqlardan keçmiş bu mənəvi-əxlaqi dəyərlər ruhunda tərbiyələndirməliyik".

Bayram tədbirində digər çıxış edənlər bütün Azərbaycan xalqını təbrik etdilər. Ölkəmizdə əmin-amanlığın, ruzi-bərəkətin bol olmasını, soydaşlarımızın öz doğma yerlərinə qayıtmasını arzuladılar.

Tədbirin sonunda həm iştirakçılara, həm də rayon ərazisində yaşayan 500 nəfərdən çox şəhid, əlil və aztəminatlı ailəyə bayram sovqatı verildi.

RƏFİQƏ KAMALQIZI

Səs.- 2011.- 18 mart.- S. 9.